Read NQAARIIT NE ROOG 2 Caloori ke 35 Bible Online

2 Caloori ke 35 - NQAARIIT NE ROOG bible

2 Caloori ke 35

¹Yosiya a roofandana o Yaal oxe Xew fee na colandax ale kam Yeerusaleem. Paal ke na Colandax ale a mbare no ñaal xarɓaxay fo ñaal nahkandeer naa no nqool o eetand onqe.

²A dalna saasadax we no far den, a saƭkin a den no calel ke kam Mbind ne no Yaal oxe.

³A laya Leelewi we na njangnaa Ii-isra’el we too a kesanel o Yaal oxe yee: «Ƥekyo arka tedu ne kam mbind ne Salomo fee o ƥiy Dawid fee o maad Isra’el a maxna, nu ngadooxkatiran. Ndiiki koy, ndagooxyo o Yaal oxe Roog nuun fa Isra’el fee xeet um.

⁴Mbi’yo a yaj ndeefandin no ƥasil nuun fo na qaw nuun ne Dawid fee o maad Isra’el fa Salomo fee o ƥeem a mbindtuuna.

⁵Fat a qaaj aluu refna na qaw ake no ƥasil ke no Leelewi we a geenooxaa no mbiñ o tedu nqe, a jalanaa o fog ole.

⁶Mbaryo paal ke na Colandax ale, tedlandoox, mbaajan o fog ole, mbi’tin naa mengoorna fo ne o Yaal oxe a heblituuna, a reefandin na Moyiis.»

⁷Yosiya a cooxa o fog ole cegel kaa ngatna na ked ake, paal fo pambe kaa mbadna cuni qarɓeen tadik a njagandanel a Colandax ale. A doona teen qoox cuni tadik, too fop a hat no jeg no maad oxe.

⁸Kelfa ke itam a cooxa xeet fee fo saasadax we fo Leelewi we ci’it o fud o letu. Hilkiya fa Sakari fa Yehi’el we adooxan’ina Mbind Roog ne a cooxa saasadax we cegel cuni ƭik fo cegel teemeed ɓetuu fa leng kaa inoorna na ked ake a njagandanel a Colandax ale, fo qoox teemeed tadik.

⁹Konaniya fo fog um we ndefna Semaya, Netanel, Hasabiya, Ye’iyel fa Yosabad ndefna we adooxanna Leelewi we a cooxa a den paal fo pambe cuni ƥetik, da njagandanel a Colandax ale fo qoox teemeed ƥetik.

¹⁰Neene mat xew fee a jagandit’e, saasadax we a ndef na seek den, Leelewi we na yaj den, ta reefandtel ne o maad oxe a heblit’uuna.

¹¹Wiin we a ndefa no nqirsaa cegel ke na Colandax ale, a cooxaa saasadax we fo’oy le no cegel keene, da mbiisan took o sadaxand ole. Leelewi we o mat a ngutanaa wiin we.

¹²A kesa sadax toxel ke, ndax da cooxin ƥasil pogreer ke no fog ole, da ƥoxotan o Yaal oxe ne ta bindteena no safe le Moyiis. A mbi’a leng kut ke fo qoox ke.

¹³A njuɗa paal ke na Colandax ale ne ta hebliteena, a njaw sadax tedu lakas ke na kaleera fo no fo nquɗoox fo na xa ƥaxañ xa lakas, soo a ñof o naqan o fog ole fop.

¹⁴Cinj kaaga, a njawana a qoox den, a njawan saasadax we xa taan Aaroon, yaam weene kaa ƥoxotoogu sadax toxel ke fa neebam fee boo neen a yengu. Ten taxu Leelewi we a njawan’u a qoox den, a njawan saasadax we xa taan Aaroon.

¹⁵Xa taan axe Asaf ndefna giigim we kaa ndeeƭu na seek den ne Dawid fa Asaf fa Hemaan fa Yedutun fee o ƭeet oxe no maad oxe a ngeblit’uuna, yeeyetax we na xa ton-maax axe a mbod no don-maax oluu refna. O leng na den koy xaƴee o far um, yaam Leelewi we fog den kaa njawanoogu a den.

¹⁶Neene calel ke no Yaal oxe a njagandit’e no ñaal naaga, ndax da ndoofand a Colandax ale soo a ƥoxot sadax toxel took o sadaxand ole no Yaal oxe ne o maad Yosiya a heblit’uuna.

¹⁷Ii-isra’el we ndeeƭna maaga a ndoofanda Xew fee na colandax ale na jamaane faaga fa Xew fee no puuru canja’e ke boo ñaal ɓetuu ƭik.

¹⁸No kaa xotitna na jamaane no tuleer Sami’el boo na Yosiya mosee jeg a Colandax alaa roofandteena nen aleene kam Isra’el. O maad o leng kam Isra’el mosee o roofandit a Colandax ale ne Yosiya fo saasadax we fo Leelewi we, Yuuyudaa we fo we Isra’el maad’uuna fo we ngenna Yeerusaleem fop a mbi’it’uuna.

¹⁹A Colandax aleene oxe roofand’e no hiid xarɓaxay fo hiid o ɓetuu dadkandeer ole no maat Yosiya.

²⁰A cinj ye keene fop a faafna fo a cinj ye Yosiya a xendandna Mbind ne no Yaal oxe, Neko fee o maad Misira a gara Karkemis paam o xuluɓ ole Ofrat, a inooxan xire soo Yosiya a xetik fo ten.

²¹Neko a lula wiin ndax ta layin ee: «Wo o maad oxe Yudaa daawriim fa wo! Refee yee wo inooxanum xaye, ndaa kaa jeg mbind ne um xire’taa too Roog kaa layaam ee um ñof o yaang. Ba o siiknoor fa Roog fee refna fa mi yaam ndik ta saŋkong.»

²²Kaa koy, Yosiya waas’iran, a fapooxa ndax ta songin. A faña o nan-giloox fa lay fee Neko hat’ina no don Roog. A gariida na yulanq alaa Megido ndax ta songin.

²³Xaaxaƴ a qali we Neko a ndooma o maad Yosiya soo ta lay dag we ten ee: «Ƥisaamoo, yaam kaam ɗomeel tigi.»

²⁴Dag we ten a mbudnitaan na sareet-xire le ten, a ndoonin na sareet a lakas soo a ƥisin Yeerusaleem. Yosiya a xona soo a gasel me no daan um. Yeeyeerusaleem we fo Yuuyudaa lakas we fop a ñaawooxaan.

²⁵Yeremi a gimana a Yosiya a kim a mboy, giigim we fop, goor fo rew, a ngimana a Yosiya a kim a mboy akaa maadna o ngimeel boo no ñaal roog ne xaye, ne ta dalniteena kam Isra’el. A kim akeene kaa mbindel na kim a ƭomatax ake.

²⁶Ke xotitna no mberaandoong ne na pi ake Yosiya boo no muukandoong ne fo ngor ne ten mengoorna fo ke bindeena no kebil ke no Yaal oxe, kaa mbindel no «Safe le no maad we Isra’el fo we Yudaa».