Read NQAARIIT NE ROOG 2 Caloori ke 36 Bible Online

2 Caloori ke 36 - NQAARIIT NE ROOG bible

2 Caloori ke 36

¹Wiin we Yudaa a nqota a Yowahas fee o ƥiy Yosiya, a ndodin o maad, ta rondand a faap um kam Yeerusaleem.

²Yowahas a jeg’a xa kiid qarɓeen ƭik fo xa kiid xa tadaq, ye ta sogna refaa o maad. A maadooxa a qool a tadak kam Yeerusaleem.

³Neko fee o maad oxe Misira a fudnaan no maat naa kam Yeerusaleem soo a ser saax laa a bateer ngap parig qarɓeen tadik xaaliis fa nqoolu fo ngap kilo qarɓeen tadik wurus.

⁴Cinj kaaga, a dalna a Eliyakim fee o ndeɓ Yowahas ta ref o maad kam Yudaa fo kam Yeerusaleem soo a supit gon um ta ne’atel Yoyakim. Yowahas fee o maag um o mat a ɓisaan Misira.

⁵Yoyakim a jeg’a xa kiid qarɓeen ƭik fo xa kiid xa ƥetaq, ye ta sogna refaa o maad. A maadooxa xa kiid xarɓaxay fo o hiid o leng kam Yeerusaleem. A fi’a kaa faaxeerna na kid no Yaal oxe Roog um.

⁶Nebukadnesaar fee o maad oxe Babilon a inooxana a Yoyakim, a damin, a jengtin ceen xanjar soo a ɓisin Babilon.

⁷A ɓisa kam Babilon ƥaxañ leng-leng ke no Mbind ne no Yaal oxe soo a ɓek a den kam mbind no maad ne ten.

⁸Ke yoqna na pi ake Yoyakim, cednooxu ke ta fi’na fo ke daluuna kaa mbindel no «Safe le no maad we Isra’el fo we Yudaa». O ƥeem Yoyakin a rondandaan.

⁹Yoyakin a jeg’a xa kiid ɓetaa tadaq[20], ye ta sogna refaa o maad. A maadooxa a qool a tadak fo ñaal xarɓaxay kam Yeerusaleem. A fi’a kaa faaxeerna na kid no Yaal oxe.

¹⁰Farna fo o hiid o xas[21] ole, o maad Nebukadnesaar a ɓisaan Babilon ten fo xa ƥaxañ xa cegu njiriiñ axe no Mbind ne no Yaal oxe soo a dalin a Sedekiya fee faap ndeɓ Yoyakin ta maadooxaa kam Yudaa fa Yeerusaleem.

¹¹Sedekiya a jeg’a xa kiid qarɓeen ƭik fo o hiid o leng, ye ta sogna refaa o maad. A maadooxa xa kiid xarɓaxay fo o hiid o leng kam Yeerusaleem.

¹²A fi’a kaa faaxeerna na kid no Yaal oxe Roog um, a fañ o neewandoox mbaambir o tuleer Yeremi fee jo’tanoogna o Yaal oxe.

¹³A siiknoora sax fo o maad Nebukadnesaar fee daaɓooxnoor’uuna na Roog. A jikooxa o saƭik xoox, a ŋaj, a fañ o nomtooxiid no Yaal oxe Roog fee Isra’el.

¹⁴Aa-adax we no saasadax we fop fa xeet faa kaa moƴ’u o ngore’aƭaraa, a ndeefaa a pi a cednooxu ke no qeet lakas ke. A nqoolaƭaranda Mbind ne no Yaal oxe kam Yeerusaleem ta tedland’ina.

¹⁵O Yaal oxe Roog fee no daan den a maƭoox’a a den teelu, a reefandin no duleer we ten, yaam a bug’u o yirim xeet um fo Ngenand ne ten.

¹⁶Kaa koy, Ii-isra’el we kaa nqaadnooxoogu duleer we Roog, a nqeefaa fa lay um, a njalaa a den boo neen fuux ɗomu le no Yaal oxe a biltooxanu xeet um too mbaag’atiran o ndaɗ.

¹⁷Maaga, o Yaal oxe a inaniida a den o maad oxe no Kaakalde we, ta gar a warit mbes ke laƥ kam mbind tedu ne. O Yaal oxe yirim’ee o fes mbaat o toog mbaat o maak mbaat oxaa fuumna, ndaa a ɓoxota fop na xa ƥay um.

¹⁸Nebukadnesaar a ɓisa kam Babilon tig oo tig ke no Mbind Roog ne, maak fo teɓ fa halal fee no Mbind ne no Yaal oxe fa fee no maad oxe fa fee no cawdiin ke ten.

¹⁹A ndaaɓa Mbind Roog ne, a njiƭit saŋe ne Yeerusaleem, a ndaaɓ pind mosu ke soo a yaq tig cegu njiriiñ ke fop.

²⁰Nebukadnesaar a ɓisa kam Babilon we ƥostoox’ina boo mbaraand, da ndefik faɗ um fo faɗ na xa taan um boo na jamaane fee no maat ne Persi.

²¹Neene, ke o Yaal oxe a lay’ina, a reefandin no tuleer Yeremi a fadnooxa: «Xan saax leeke a xaƴel boo xa kiid qarɓeen ɓetuu ƭik ndax ta rafoox camaane ke na ñootnax ale ndeef’andeena ne waritna.»

²²No hiid o eetaand ole no maat Kiirus fee o maad Persi, o Yaal oxe a fosooxa fadand ke ta yegnit’ina, a reefandin no tuleer Yeremi. A ci’a a Kiirus yiif, ta simit o lambnanel, a bindel itam, ndax maat um fop a yeg kene:

²³«Keeke refu ke Kiirus fee o maad Persi a layna: O Yaal oxe Roog fee na asamaan a ɓoxotaxam maat ke na adna fee fop. A heblaxam um maxanin Mbind Yeerusaleem kam Yudaa. Oxuu fogna na xeet um na nuun, yaasam o Yaal oxe Roog um a ref fo ten, ta nomtoox Yeerusaleem.»