Read NQAARIIT NE ROOG 2 Caloori ke 4 Bible Online

2 Caloori ke 4 - NQAARIIT NE ROOG bible

2 Caloori ke 4

¹O sadaxand xanjar a fi’’e, o cigdel um a ref xa noonoong qarɓeen ƭik, o yaajel um a ref xa noonoong qarɓeen ƭik, soo geel um a ref xa noonoong xarɓaxay.

²Huram a fi’a o waaŋaan xanjar o maak olaa fi’na wurmbal. Ke xotitna no cat boo no cat no waaŋaan oleene a reeƭa xa noonoong xarɓaxay, geel um a ref xa noonoong xa ƥetaq soo wurmbal fee a fi xa noonoong qarɓeen tadik.

³Ɗuga a kiig ale no waaŋaan ole me widuuna fop kaa mosandit’el qoox. A jeg’a qoox xarɓaxay no noonoong oluu refna soo a mbi a cur a ƭak. Mosandir keene fo o waaŋaan ole a fi’andoor’e, a muum fo ten.

⁴O waaŋaan ole kaa diƈoox’u took nitaal qoox xarɓaxay fo qoox ƭik kaa mbi’teena xanjar. Tadik no qoox keene kaa mbaambir’u no ɓemb-roog o janoon, tadik a mbaambir no mudand, tadik no ɓemb-roog o ñamaak, tadik no batand. Den fop koy, ɗuga o waaŋaan ole a mbes’u a cinj.

⁵O tinqel ole a reeƭa o yaajel dang o ɓay, soo a kiig ale a fi’tel nen a kiig a tokol alaa saxitna nen buñit ñamb. O waaŋaan oleene a yipooga ngap xa liitar cuni teemeed fo xa liitar cuni ɓetuu tadik.

⁶Huram a fi’a xa baaŋaan xanjar xarɓaxay, xa ƥetaq axe a ndiƈel no saax o ñamaak ole no Mbind Roog ne, xa ƥetaq xa lakas axe a ndiƈel no saax o janoon ole, da ndef xa baaŋaan xa ƥogdinoor axe. Meene cegel ke ƥoxotiidoogeena nen sadax fa ndoxel a ƥogtooge. Foofi le no waaŋaan o maak ole mat kaa refan’u a ƥogdinax ale no saasadax we.

⁷Huram a fi’a a pagal wurus xarɓaxay ake na xa lampa xe ne ta ɗaapit’eena na den, soo da ndiƈel na Ndok a maak ale no Mbind Roog ne, a ƥetak na ñamaak, a ƥetak na janoon.

⁸A fi’a a taabul xarɓaxay, a ɓek a den na Ndok a maak ale, a ƥetak na ñamaak, a ƥetak na janoon. A fi’a xa toon wurus xa biisir teemeed.

⁹A fi’a o maax ole no saasadax we fo o maax o lakas olaa moƴna o yaaj, a jeg begax kaa laareena xanjar.

¹⁰O waaŋaan ole kaa diƈ’el no saax o ñamaak ole no Mbind Roog ne paam kooñ ne ndeer o ɓemb-roog o ñamaak fo batand.

¹¹Huram a fi’a xa ƥaxañ xa yipir ndaw axe, xa lang xanjar axe fo xa toon xa biisir axe. Neene, a fadna fop ke o maad Salomo a sim’uuna no Mbind Roog ne:

¹²A toodook a ƭak fo a qoox a ƭak akaa na mbadkeel no cat ke na toodook ake, piic ƭik ke na muuritkeel a qoox ake na toodook ake,

¹³xa goronaad teemeed nahik axe mbi’’ina xa per xa ƭaq no piic ƭik ke muur’ina a qoox ake.

¹⁴A fi’a itam tiƈir ke fo xa baaŋaan axaa ndooneena took den,

¹⁵o waaŋaan o maak o leng fo qoox xarɓaxay fo qoox ƭik kaa mbaxooxuuna,

¹⁶xa ƥaxañ xa yipir ndaw axe, xa lang axe fo xa cuutir-a-tegeƴ axe. Tig oo tig keene fop Huram-Abi a fi’an’ina Mbind ne no Yaal oxe ne o maad Salomo a heblit’uuna o ten xanjar fa ƥodaxne a ndeeƭu.

¹⁷No njanaaw o maad oxe a jawnit’u a den na xa saawit axaa Yordaan ndeer Sukot fa Sereda.

¹⁸Salomo a fi’na tig oo tig keene fop may’ina lool boo o leng waaƭ’atee o and ne o meɗel ole na xanjar fee jiriiñooreena a fodna.

¹⁹Salomo a jalnahina tig oo tig lakas ke ngelna fop no Mbind Roog ne: O sadaxand wurus ole, a taabul ake na xa kaf puuru xe ƥoxoteena a Roog,

²⁰a pagal wurus fa nqoolu ke fo xa lampa wurus fa nqoolu xe mbarna kaƥaa mbaambir o Mbiñ onqe moƴna o ted, ne ta ɗaapit’eena na den,

²¹piɗ ke fo xa lampa xe fo xa caƥir wurus axe too fop a fi’tel wurus fee moƴna o xool,

²²capil ke fo xa toon-xa-biisir axe fo a tokol a lakas ake fo fo njaq ne too fop a fi’tel wurus fa nqoolu. Begax ke no Mbind Roog ne andoona yee o reefangaa teen o ret no Mbiñ onqe moƴna o ted fo axe na Ndok a maak ale wurus a ndeeƭu.