Read NQAARIIT NE ROOG 2 Caloori ke 5 Bible Online

2 Caloori ke 5 - NQAARIIT NE ROOG bible

2 Caloori ke 5

¹Ye Salomo a ƴutna calel ke no maq ne no Mbind ne no Yaal oxe, a simta ndax ke faap um Dawid a kesan’ina o Yaal oxe a ɓisiidel: Xaaliis fa nqoolu fee fa wurus fee fo tig oo tig lakas ke fop, soo da ƥekel na kamba le no Mbind Roog ne.

²Maaga, o maad Salomo a fokata kam Yeerusaleem maak we Isra’el fo yaal a carind ake fo yaal ƥasil ke no Ii-isra’el we ndax da nqotit arka ne no ngiɓoor ne no Yaal oxe na ƥak ale Dawid na xoyeel a xoy Siyoŋ, a ƥisin no Mbind Roog naa.

³Goor we Isra’el fop a mbokatoora me no maad oxe ndax da ndoofand xew fee no nqool o ɓetuu ƭikandeer onqe.

⁴Ye maak we Isra’el fop a mbadiidna, Leelewi we a meeɓa arka ne.

⁵Neene, saasadax we ndefna ndef Leelewi we a ƥisa arka ne fo Ƭiif ne o Yaal oxe a xetteel fo tig oo tig tedu lakas ke ndeeƭna kam fee.

⁶O maad Salomo fo mbokatax ne Isra’el ndeeƭna fo ten fop mbaambir arka ne a sadaxta cegel katu na ked ake fo qoox mayu kaa mbaagaandeena o lim, o hapel ne’aand.

⁷Cinj kaaga, saasadax we a ƥeka arka ne no ngiɓoor ne no Yaal oxe kam Mbind Roog ne no Mbiñ onqe moƴna o ted, ɗuga a nafir ake no pindel yeeyetax ke.

⁸Pindel yeeyetax ke kaa letin’u a nafir den, da yooroox me arka ne a refna. Kaa yookoogu arka ne fo a teex ake ta meeɓteel.

⁹A teex akeene kaa njigid’u boo o fodangaa na Ndok a maak ale adooxan’ina o Mbiñ onqe moƴna o ted, o ga’aa a den, ndaa koy, waag’iro o fod tafil boo ga a den. Boo no ñaal ne xaye sax, arka ne a maada maaga.

¹⁰Jeg’ee lakas kam arka ne a refangee a alfa ƭak ake Moyiis a ɓek’ina teen no joong olaa Horeb, ye o Yaal oxe a hiɓoorna fo Ii-isra’el we a cinj ye ta sutna a den Misira.

¹¹Saasadax we ngar’ina fop koy kaa tedlandoox’u, ndaa refit’ee ne da ndeepatiritna. Ye da sutooxiidaa o Mbiñ o tedu nqe,

¹²Leelewi giigim we fop ndefna Asaf fa Hemaan fa Yedutun fo xa taan den fo fog den kaa ndokoox’u kaa fi’teena xa ƭis, a ngeenoox no batand ne no sadaxand ole, a saq a qiin fo a liit fo fo nqilimb. Paam den, a jeg’a saasadax teemeed fo saasadax qarɓeen ƭik waa luuƥoogna.

¹³Ye luuluuƥ we fo giigim we a yoɗandoorna ndax da niw o Yaal oxe, a simatin, a njibin a luuƥ ake, a mbangin a qiin ake fo pakir lakas ke, a simata o Yaal oxe fo xa ƭelem axene yee: «Yaam kaa faax, too o mbeq um xan a maadaa boo faw.» Maaga, eel a mayƭanda Mbind ne no Yaal oxe,

¹⁴boo saasadax we mbaag’atee o yoq maaga ndax da mbadin o far den yaam eel le no ndam onqe no Yaal oxe kaa mayƭand’u Mbind Roog naa.