Read NQAARIIT NE ROOG 2 Caloori ke 7 Bible Online

2 Caloori ke 7 - NQAARIIT NE ROOG bible

2 Caloori ke 7

¹Ye Salomo a ƴutna a qeƭ rek, fiɗel a inoora na asamaan a dox sadax fa ndoxel faa fo sadax camsa’oor kaa, soo o ndam onqe no Yaal oxe a mayƭand Mbind Roog ne.

²Saasadax we mbaag’atee o ndok kam Mbind ne no Yaal oxe, yaam o ndam onqe no Yaal oxe kaa mayƭand’u Mbind naa.

³Ye Ii-isra’el we fop a nga’na fiɗel le fo o ndam onqe no Yaal oxe a mbudooxiidaa no Mbind naa, a ndalfooxa o ngooknoox, a ngung a lanq, a ngidmaa o Yaal oxe yee: «Yaam kaa faax, too o mbeq um xan a maadaa boo faw.»

⁴O maad oxe fa xeet fee fop a ƥoxota o Yaal oxe sadax.

⁵O maad Salomo a ɓoxota qoox cuni qarɓeen ƭik fo qoox cuni ƭik fo cegel teɓ cuni teemeed fo cuni qarɓeen ƭik, da ndef sadax. Neene, o maad oxe fa xeet fee fop a mbarke’a Mbind Roog ne.

⁶Saasadax we kaa ndeeƭu no far den, Leelewi we a saq pakir ke o maad Dawid a fi’in’ina ndax da simatteel o Yaal oxe ne ta heblituuna. Saasadax we kaa njasnoor’u fa den, a njibnaa a luuƥ ake, a ngidmaa o Yaal oxe yee: «Yaam o mbeq um xan a maadaa boo faw.» Ii-isra’el we fop kaa inoox’u a ngeenoox.

⁷Salomo a kesa a ndeer ale no maax ole refna mbaambir Mbind ne no Yaal oxe, yaam o sadaxand xanjar ole Salomo a fi’na kaa neew’u lool no sadax keene. Keene tax’u Salomo a jiriiñoor o maax ole, ndax ta ɓoxotit teen sadax toxel ke fo sadax tuufe-duufe ke fo neebam ke no sadax camsa’oor ke.

⁸Naaga, Salomo a roofanda xew faaga boo ñaal ɓetuu ƭik, a yoon fo Ii-isra’el we fop. Mbokatax maak a inoortiid’a no saax le fop, ke xotitna no ndokand naa Hamat no ɓemb-roog o janoon boo na ƈufnand alaa Misira no ɓemb-roog o ñamaak.

⁹No ñaal ɓetuu ndadkandeer ne, a njega o xet o tedu, yaam a ndoofanda barke fee no sadaxand ole boo ñaal ɓetuu ƭik, soo a ndoofand xew feene boo ñaal ɓetuu ƭik.

¹⁰No ñaal qarɓeen ƭik fo ndadkandeer ne no nqool ɓetuu ƭikandeer onqe, Salomo a nomta xeet faa da nqaad no ƭiif den. Kaa mbelakinooxoogu, a qeeñ den a may fo o ɗaay no paax ke o Yaal oxe a fi’an’ina a Dawid fa Salomo fa Isra’el fee xeet um.

¹¹Neene boog Salomo a ƴuta calel ke no Mbind ne no Yaal oxe fo ke no mbind no maad ne. A fadanda deŋ fop ke ta heboox’ina o fi kam Mbind ne no Yaal oxe fo kam mbind no maad ne ten.

¹²No yeng olaa, o Yaal oxe a feeñooxa a Salomo, a layin ee: «Jaɓaam a qeƭ of too jilaam o mbiñ onqene ndax um ɓoxotteel teen sadax.

¹³Boo weguuma asamaan fee boo a teƥ jegatee, hebliid soƈ ke da nduudin saax le, yooriid piste took xeet es,

¹⁴maaga, xeet es fee ci’uuma gon es a neewandooxangaa, a nqeɗ, a mbaaƭaam, soo a mbes a cinj a ƭat a paaxeer ale den, yaaga xam nan-giloorit a den na asamaan, waasanit paakaad den soo naatandahin saax den.

¹⁵No ke xotitna ndiiki kaa um doon a kid es, rung nof es na qeƭ ake na mbi’teel no mbiñ onqene.

¹⁶Kaam jil Mbind neeke, kesin ndax gon es a gen teen kili, a kid es fo xeeñ es a ndef teen boo faw.

¹⁷Wo o mat, boo damooxoona na mi ne faap of Dawid a damooxit’ina na mi, ndax o fi fop ke hebloonga, gay bargal es fo ke simtuuma,

¹⁸xam saƭkand maat of ne hiɓoorit’anuuma fa faap of Dawid ee: ‹Ñakkiro muk oxaa rondandoonga, a maadooxaa took Isra’el.›

¹⁹Kaa koy, nu mbesangaam a cinj, nqaƴ bargal es fo kebil es ke dalnanuuma a nuun, boo nu mbaɗookna roog lakas ke, ngungaa mbaambir den,

²⁰yaaga, xam sutit a nuun no fiisel ole ci’uuma a nuun, Mbind ne kesanuuma gon es, um naagin buc, fi’in naxoor fo calat a ndeer qeet ke fop.

²¹Oxuu reefna paam Mbind neeke laasoogeena, xan a jaaxiɗ, a laamtooxaa yee: ‹Xar taxu o Yaal oxe a fi kene saax lene fo Mbind nene?›

²²Xan a doonel ee: ‹Ke taxuuna refu yee Ii-isra’el we kaa mbaas o Yaal oxe Roog fee no daan den, sutitna a den no saax laa Misira, soo a ndamoox no roog lakas, a ngungaa mbaambir den, a mbaɗooxaa a den. Ten taxu ta ɓisiid took den taamaala feene fop.› »