Read NQAARIIT NE ROOG 2 Caloori ke 9 Bible Online

2 Caloori ke 9 - NQAARIIT NE ROOG bible

2 Caloori ke 9

¹O maad o tew oxe Saba a nana o jeg gon ole Salomo a layteel. Maaga a gara Yeerusaleem, a ɗeetloortiidin a nax-o-gut, a yoon fo a ƭat a maak fo keeleemb kaa sufna pelu tuñ fa wurus fa mayu fo a ƥil a cafeñu. A gara me Salomo, a laamtin fop ke ta fof’ina no xeeñ um.

²Salomo a tekta o tew oxe fop ke ta laamit’uuna, too jeg’ee dara kaa laqoox’ina a Salomo boo waagiran o tekit.

³O maad o tew oxe Saba a horooxa o and o maak ole Salomo, a ga mbind ne ta maxin’ina

⁴fo xa tox axe ndiƈiidoogeena, o genand ole no dag we ten, o far ole fo a tokax ake no we njalanooguuna fo ake no we topatooxoogna a yer ale ten, a ga itam sadax toxel ke Salomo a ɓoxotoogna kam Mbind ne no Yaal oxe. A dama o don,

⁵soo a lay o maad oxe yee: «Ke nantuuma no saax es kañ no kaa farna na fa lay of fo no and of, ndigil kak oo.

⁶Ye um helkaa fo gar, ga’an a xoox es, gim’iim ke layoogeema. Kaa koy, fop ndigil oo, too sax wetandoox’aandeem genwal fee no and o maak ole wo. Hupaa fop ke nan’uuma ta layteel.

⁷Wiin of fo dag of a ƭaaya, den we ngenna fa wo kili, a nan-gilooxaa o and ole wo.

⁸O Yaal oxe Roog of a hela o simatel, ten fee feloona boo ta fi’ong o maad um ndax o jalan o Yaal oxe Roog of. Ne Roog of a fexna a Isra’el ndax ta maadnooran boo faw, taxu ta dalnong o maad den, ndax o lalit a ƭat fo o cofel.»

⁹Cinj kaaga, o maad o tew oxe Saba a ci’a o maad Salomo ngap parig qarɓeen nahik wurus fo pelu tuñ fo a ƥil a cafeñu mayu mayu. Qeeñe-xeeñe peltu naaga tuñ mos’ataand o ƥisiid kam saax le Isra’el.

¹⁰Dag we Hiiram fo we Salomo ƥistiid’ina wurus no saax laa Ofiir, a ngarit’a itam a teex ndaxar santal fo a ƥil a cafeñu.

¹¹O maad Salomo a fi’ta a teex ndaxar santal ake o toŋ-toŋ ole no Mbind ne no Yaal oxe fo ole no mbind no maad ne. A sexan’ahina teen giigim we fo nqilimb fo a tiiti. Kaa nandna naaga mos’aand o ga kam saax le Yudaa.

¹²O maad Salomo koy, a ci’a o maad o tew oxe Saba fop ke ta bug’ina too ta xeɗ’un o ten, kupu ke ta ɓisiid’ina o maad Salomo. Cinj kaaga, o maad o tew oxaa fo a ƭat um a nqaada no saax den.

¹³O meɗel ole na wurus fee Salomo a daawoogna o hiid oo hiid a reeƭa ngap parig teemeed ƭik fo parig qarɓeen ƭik,

¹⁴fogreerna fo ke hatoogna na bateer ake no jula maak we fo no jiijikax we fa wurus fee fa xaaliis fa nqoolu fee maad we Arabi fop fo gofornoor ke no saax le a ƥisiidoogna.

¹⁵Salomo a jalna pegoor maak teemeed ƭik wurus fa nqawe, too nuu refna teen a fi’it’e ngap kilo ɓetuu fa leng fo liibar.

¹⁶A jalnahina pegoor teɓ teemeed tadik wurus fa nqawe, nuu refna teen a fi’tel ngap kilo tadik. A ɓeka a den no tabax ne na xoyeel Suungaan le Libaŋ.

¹⁷O maad oxe a jalna uum-maamaad maak laa mosandteena a ñiiñ fa ñiig soo a laarel wurus fa nqoolu.

¹⁸Uum-maamaad leene a jeg’a o toŋ-toŋ olaa jegna xa takand ɓetaa fo leng fo o dakand wurus. A jeg’a toonir xa ƥay, a mbi’el no saax oluu refna, nitaal cogoy ƭik keenooxu a ndef na xa saax axe.

¹⁹Nitaal cogoy xarɓaxay fo cogoy ƭik keenooxu a mbi’’e no toŋ-toŋ ole, ɓetaa fo leng na janoon, ɓetaa fo leng na ñamaak. Kaa nandna neen, mos’aand o fi’an maat leng.

²⁰A tokol ake no maad Salomo fop wurus a ndeeƭu, xa ƥaxañ axe no tabax ne na xoyeel Suungaan le Libaŋ fop a ndef wurus fa nqoolu. Na jamaane Salomo xaaliis fa nqoolu fee kaa ɗeetoogel nen kaa mayeerna o njiriiñ.

²¹O maad oxe a jeg’a no maag ole a kaal a maak a cula’ir akaa na ndetaa Tarsis, a yoon fo maamaag we Hiiram. Jaf leng na xa kiid xa tadaq axuu ndefna, a kaal akeene a ngatoogu, a ƥisiid wurus, xaaliis, a ñiiñ fa ñiig, a koy fo a lamjaata.

²²O maad Salomo hup’u maad lakas we no lanq ke fop halal, a hup a den o and itam.

²³Maad we no lanq ke fop a inoorooga muu refna, a ƭeetiidaa a Salomo, ndax da nan-giloox o and o maak ole Roog a ci’’uuna.

²⁴O hiid oluu refna, wiin weene fop a ƥisiidooga a Salomo ci’it: Kaa jalteena xaaliis, kaa jalteena wurus, ñirax, ƥonax, pelu tuñ, pis fo perkele.

²⁵Salomo a jeg’a kud cuni nahik yaam pis ke fo a sareet-xire ke ten fo ŋaaŋaay pis cuni xarɓaxay fo ŋaaŋaay pis cuni ƭik. A geek’a leng-leng teen paam um kam Yeerusaleem, lakas ke mat, ta pasar a den no teeru yetooxand ke.

²⁶Salomo doon’u o ɓay no maad we fop nqotitna no xuluɓ olaa Ofrat, a gar no ŋat ole no saax le no Fiifilista we boo no ŋat olaa Misira.

²⁷O maad oxe a tax’a boo xaaliis fee a mayit nen a ƥil ake kam Yeerusaleem, soo taxar seedar ke a mayit nen paƭat ke ndefna no jegel ole na yulanq ake.

²⁸Pis ke Salomo Misira[7] fo na saax a lakas ake a ƥistiidooge.

²⁹Ke xotitna no mberaandoong ne na cosaan fee Salomo boo no muukandoong ne kaa bindel na safe ke na nqoyeel «A pi ake no tuleer Natan» fo «A co’it ale Ahiya fee inoorna Silo» fo «Mbeeñil ne no ƭeet Ido». Safe falakaand leene kaa laytaa cosaan fee Yerobowam fee o ƥiy Nebat.

³⁰Salomo a maadooxana xeet fee Isra’el fop boo xa kiid qarɓeen nahik kam Yeerusaleem.

³¹Cinj kaaga, Salomo a daba daan um, a gasel na ƥak ale Dawid fee faap um, soo o ƥeem Rehabewam a rondandin.