Read NQAARIIT NE ROOG Esdaraas 3 Bible Online

Esdaraas 3 - NQAARIIT NE ROOG bible

Esdaraas 3

¹Ye o nqool o ɓetuu ƭikandeer onqe a fadiidna, Ii-isra’el we ndal’ina no teeru ke den a mbokatoora Yeerusaleem nen o koor o leng.

²Yesuwa[11] fee o ƥiy Yosadak fo fog um saasadax we, Serubabel fee o ƥiy Se’alti’el fo fog um a inooxa soo a maxatin o sadaxand ole Roog fee Isra’el, ndax da ƥoxot teen sadax toxel, ne kebil ke Moyiis fee o kiin Roog a simtituuna.

³Ke da saɗar’ina qeet ke no saax le fop oo, a ndalnatina o sadaxand ole took a per ake ten soo a ƥoxotaa teen o Yaal oxe sadax toxel, nqes fo kirand.

⁴A ndoofanda Xew fee no ƭiif ke, ne ta hebliteena, a yoonandtan sadax toxel ñaal oo ñaal, a ndeefandin no sadax podne simteena na bes fuu refna.

⁵Cinj kaaga, a ƥoxotooga sadax fa ndoxel fee na bes fuu refna, sadax toxel ke no nqool o ndeɓ onquu refna, ke no qew ke kesaneena o Yaal oxe fo ke no xuu ɓoxotooguuna o Yaal oxe no fud o letu.

⁶No ke xotitna no ñaal eetaand ne no nqool o ɓetuu ƭikandeer onqe, a ndefa no ƥoxotaa o Yaal oxe sadax toxel. Kaa koy, soƥ’ee a per ake no Mbind ne no Yaal oxe a ndoonel.

⁷Ii-isra’el we a cooxa seesex we na ƥil ake fo daadaaƴ we xaaliis soo Siisidoŋ we fo Tiitiir we, da coox a den ñoowir, a yer fo diwliin, ndax da ƥistiid Libaŋ a teex ndaxar seedar, a ndeef no maag ole, boo Yope, ne Kiirus fee o maad Persi a ci’it’uuna a den.

⁸No hiid o ɗikandeer ole a cinj ye da mbadiidna no Mbind Roog ne kam Yeerusaleem, no nqool o ƭikandeer onqe, Serubabel fee o ƥiy Se’alti’el fa Yesuwa fee o ƥiy Yosadak, yoqatin we no fog den saasadax we, Leelewi we fo fop we nomtoortiid’ina no mbaƭ naa, a ngar Yeerusaleem, a ndefa no calel soo a ngadin Leelewi we njeg’ina xa kiid qarɓeen ƭik a jof took da yetooxaa maq ne no Mbind ne no Yaal oxe.

⁹Yesuwa, xa ƥeem xa koor, fog um, Kadmi’el, xa ƥeem xa koor ndefna xa taan Yudaa, xa taan axe Henadad, xa ƥiy xa koor den fo fog den Leelewi we a ngadooxa den fop a yetax ale no jaajal we no Mbind Roog ne.

¹⁰Ye maamax we a ndoonaa a per ake no Mbind ne no Yaal oxe, saasadax we a ngeenoox’a, a ndokoox sabadoor den, a saq a luuƥ ake fo Leelewi we ndefna xa taan Asaf saq’ina a qiin ake, ndax da nqaanan o Yaal oxe, ne Dawid fee o maad Isra’el a heblit’uuna.

¹¹Kaa njaaɓanroogu, a nqaanaa, a simataa o Yaal oxe fo a ƭelem akene: «Yaam a faaxa, too o mbeq um na Isra’el xan a maadaa boo faw!» Xeet fee fop kaa njibnoogu xa buuq xa maak, a simataa o Yaal oxe yaam fer le no Mbind ne no Yaal oxe.

¹²Kaa koy, mayu no saasadax we, Leelewi we fo yaal ƥasil ke nogoyna too a nga’’u Mbind Roog eetaand ne kaa looloogu a maak, ye a per ake no Mbind neene a ndooneel na kid den. Lakas mayu koy, kaa njibnoogu xa soroxole,

¹³boo xa soroxole xe fo xa lool axe mbaag’ataand o njektiran a ndeer xeet fee, yaam xeet fee kaa njibnoogu xa buuq xa maak axaa nannooxoogna koƭu.