Read NQAARIIT NE ROOG Esdaraas 4 Bible Online

Esdaraas 4 - NQAARIIT NE ROOG bible

Esdaraas 4

¹Fañ we na carind ale Yudaa fo we na le Bensame a yega yee we nomtoortiidna no mbaƭ naa kaa maxanoogu o Yaal oxe Roog fee Isra’el mbind.

²A soƥiida a Serubabel fo yaal ƥasil ke, a lay a den ee: «Kaa i mbug o maxatin fa nuun Mbind Roog nene, yaam Roog nuun i mbaɗooxaa nen a nuun too ten i ƥoxotaa sadax[12] no kaa xotitna na jamaane faa Esar-Hadon[13] fee o maad oxe Asuur a ɓisiidna a in mene.»

³Kaa koy, Serubabel, Yesuwa fo yaal ƥasil lakas ke no Ii-isra’el we a ndoona a den ee: «I mbaagee o mbokatoor fa nuun, ndax i maxan a Roog in Mbind, yaam in doŋ na maxankan o Yaal oxe Roog fee Isra’el, ne Kiirus fee o maad Persi a heblituuna a in.»

⁴Maaga, wiin we no saax le a ndefa no ngooynooraa xeet fee Yudaa, a ndiidnooraa a den, ndax da yaqan a den da max

⁵soo a ndabid aa-as we no maad oxe, ndax da mbinq calel ke den. Neene a refit’u no ñoow o ñis Kiirus fee o maad Persi boo no maat Daryus fee o maad Persi.

⁶No mberaandoong ne no maat ne no maad Asuwerus[14], we no saax le a mbindaan o leetar, a njambtin we ngenna Yudaa fa Yeerusaleem.

⁷Na jamaane Artaserkesees[15] fee o maad Persi, Bislam, Mitredat, Tabel fo gend den a mbindaan. O leetar ole koy a pindooƭ a araam a bindit’e fo no ɗelem araam[16].

⁸Rehum fee gofornoor fa Simsay fee o piibind oxe a mbinda o maad Artaserksees no kaa farna na Yeerusaleem o leetar olaa feritna neeke:

⁹«Keeke kaa inoor na Rehum fee gofornoor, Simsay fee o piibind oxe, gend den we Din, we Afarsatak, we Tarpel, we Afaras, we Erek, we Babilon, we Suusaan, we Deeha, we Elam

¹⁰fo qeet lakas ke Osnapar[17] fa maak fa njegu gon fee a ɓisiid’ina took o hup doole soo a dalin a den na teeru fee Samari fo no fo mbiñ fo lakas ne no mudand ne no xuluɓ ole Ofrat fo lakas fo lakas.»

¹¹Keeke refu yiƥadax ne no leetar ole da lulit’uuna: «O maad Artaserkesees, dag of we ngenna no mudand ne no xuluɓ ole Ofrat fo lakas fo lakas.

¹²Daali maad, fat o yeg fo and ee Yaawuur we inoorna me wo, a ngat me in meeke Yeerusaleem, owe maxatinaa teeru fa mbaafañ fa mbaaxaƭaru fee, a yoɗatinaa saŋe ke ten soo a nqendandaa a per ake ten.

¹³Daali maad, fat o yeg fo and boog ee boo teeru fene a maxatineena, saŋe ke ten a yoɗatinel, ndabidkatee a bateer, juuti fo a ñaaƈ, too keene xan a ref ngaañ na kamba le no maad oxe.

¹⁴Feek dag gore’u i ndefu no maad oxe too i nga ta xeefel jagooxee a in, in we lultaa o maad oxe yegnit keeke,

¹⁵ndax ta ɓaalel kam safe le no caloori ke no daan of. Xan o ga teen too and ee teeru fene naa ta moofu kaa fañanaa soo a oraa o njakad no maad we fo na xa cegel axe. No kaa xotitna no camaane kaa yaaga, we ngenna teen kaa oroogu siiknoor. Keene mat taxu teeru fee a gefel tuƈ.

¹⁶Kaa i andnooraa o maad oxe boog ee boo teeru fene a maxatineena, saŋe ke ten a yoɗatinel, yaaga o ñak xa cegel axe no mudand ne no xuluɓ ole Ofrat.»

¹⁷O maad oxe a lulta a Rehum fee gofornoor, Simsay fee o piibind oxe fo gend den we ngenna Samari fo no fo mbiñ fo lakas ne no mudand ne no xuluɓ ole Ofrat o doonanqol oleeke: «Mexe simnaa a nuun fo lakas fo lakas.

¹⁸O leetar ole nu lultiidna a in a jange deŋ mbaambir es.

¹⁹Heblitaam keene a ɓaalel, too a ga’e yee no kaa xotitna no camaane kaa yaaga teeru feene kaa inooxanoogu maad we, a oraa siiknoor soo a nootaa.

²⁰A jeg’a kam Yeerusaleem maad jegu doole waa maadooxoogna no jegel ole no mudand ne no xuluɓ ole Ofrat fop too a ndabdoogel a bateer, juuti fo a ñaaƈ.

²¹Ten taxu, ngeblityo calel ke no wiin weene a ngeenoox, ndax teeru feene maxatinkaand, a refangee kaam heblitin mi fa xoox es.

²²Mbootooxyo o saganit keene, ndik maad we a njeg ngaañ naa moƴna o ɗom.»

²³Ndak fo ndak, ye yiƥadax ne no leetar ole no maad Artaserkesees a jangeena mbaambir Rehum, Simsay fee o piibind oxe fo gend den, a ñofa o ndet Yeerusaleem, maa no Yaawuur waa, a ser a den da mbaas calel ke.

²⁴Maaga[18], calel ke no maqatin ne no Mbind Roog ne a mbaas’e kam Yeerusaleem, too a ngeenoox’a boo no hiid o ɗikandeer ole no maat Daryus fee o maad Persi.