Read NQAARIIT NE ROOG Esdaraas 5 Bible Online

Esdaraas 5 - NQAARIIT NE ROOG bible

Esdaraas 5

¹O tuleer Age fo o tuleer Sakari fee o ƥiy Ido a yegna Yaawuur we Yudaa fo we Yeerusaleem kaa inoorna na Roog fee Isra’el reeƭna fa den.

²Maaga, Serubabel fee o ƥiy Se’alti’el fa Yesuwa fee o ƥiy Yosadak a inooxa, a ndef no maxaa Mbind Roog ne kam Yeerusaleem, too duleer we Roog a ndeeƭa fa den, a ndimle’aa a den.

³No ngap onqaaga, Tatenay fee gofornoor fee no mudand ne no xuluɓ ole Ofrat, Setar-Bosnay fo gend den a ngara me den soo a lay a den ee: «An ci’u a nuun nu maxatinaa Mbind Roog ne soo yoɗatinaa saŋe keeke?»

⁴A layahina a den[19] ee: «Cooxyo a in a kon no we na maxaa mbind neeke.»

⁵Kaa koy, o Yaal oxe kaa yetooxoogu maak we no Yaawuur we, too a nqaƴe a suur no calel ke boo yaa Daryus a lulitkeel o leetar no kaa farna no keene, soo o doonanqol a daawel.

⁶Keeke refu yiƥadax ne no leetar ole Tatenay fee gofornoor fee no mudand ne no xuluɓ ole Ofrat, Setar-Bosnay fo gend um we Afarsak[20] ngenna no mudand ne no xuluɓ ole Ofrat a lulitna o maad Daryus.

⁷A lultaan yegnit naa bindteena neeke: «O maad Daryus, in we simnang!

⁸Fat o maad oxe a yeg fo and ee i ndeta no jegel olaa Yudaa, no Mbind ne na Roog fa maak fee. Kaa maxatinteel a ƥil a maak soo a teex a ƥekel no tabax ne. Calel keene a mboda too a ñof.

⁹Maaga, i laamta maak we soo lay a den ee: ‹An ci’u a nuun nu maxatinaa Mbind Roog neeke soo yoɗatinaa saŋe keeke?›

¹⁰I laamta a den itam a kon den, ndax i andnoorong a den too i mbinda a kon no we adooxanna a den.

¹¹Keeke refu ke da ndoonna a in: ‹In ndefu dag we Roog fee na asamaan fo lanq too kaa i maxatinaa Mbind Roog ne max’eena no camaane miñu kaa. O maad Isra’el o maak max’un boo a muukin.

¹²Kaa koy, a cinj ye daan in a mbuuxnoorna a Roog fee na asamaan, a ɓoxota a den na xa ƥay Nebukadnesaar, o Kaakalde xe, refna o maad oxe Babilon, ta yaq Mbind Roog neene soo a ɓis xeet fee took o hup doole kam Babilon.

¹³Yaqanee koy, no hiid o feraand ole no maat Kiirus fee o maad oxe Babilon, o maad Kiirus a heblita Mbind Roog neene a maxatinel.

¹⁴O maad Kiirus a watnita sax no faɗoorand ole Babilon xa ƥaxañ wurus axe fo axe mbi’teena xaaliis Nebukadnesaar a watnit’ina no Mbind Roog ne Yeerusaleem, a ɓis a den no faɗoorand ole Babilon. Kiirus a cooxa a den oxaa ne’eena Seesbasar fee ta dalin’ina gofornoor

¹⁵soo a layin ee: Jangi xa ƥaxañ axeeke, ret doon a den kam Mbind Roog naa Yeerusaleem, too fat Mbind Roog ne a maxatinel me ta ref’ina.

¹⁶Seesbasar feene a gara boog, a doon a per ake no Mbind Roog ne kam Yeerusaleem. Yaaga boo fa ndiik kaa maxeel ndaa ƴutafulee.›

¹⁷Ndiiki koy, a soƥangaa yee a jofooxa o maad oxe, fat a ɓaalel kam a kamba le no maad oxe, maaga Babilon, boo ga ndax o maad Kiirus a heblit’a Mbind Roog neene a maxatinel kam Yeerusaleem. Cinj kaaga, fat o maad oxe a daawin a in o bug ole ten no keene.»