Read NQAARIIT NE ROOG Esdaraas 6 Bible Online

Esdaraas 6 - NQAARIIT NE ROOG bible

Esdaraas 6

¹Maaga, o maad Daryus a heblita o ɓaalanel na kamba le, me a safe ke a ngeekoogeena kam Babilon.

²Kam Ekbatan fee reeƭna teeru fa maak fee no jegel olaa Medi, o laxas a pind olaa saqna betandoor kene a ga’te maaga:

³«No hiid o feraand ole no maat um, o maad Kiirus a heblita no kaa farna no Mbind Roog ne Yeerusaleem: ‹Fat Mbind Roog ne a maxatinel, ndax ta ref o mbiñ onqaa na ɓoxotteel sadax, too fat a per ake ten a yoɗatinel. Geel um xan a fi xa noonoong qarɓeen ɓetuu fa leng, o yaajel um a fi xa noonoong qarɓeen ɓetuu fa leng.

⁴Xan a jeg a cur a tadak a ƥil a maak fo a cur a leng a teex a qas. Ke na ñakkeel teen fop, mbind no maad ne na rabidkan.

⁵Kaa jolna keene, xa ƥaxañ wurus axe fo axe mbi’teena xaaliis no Mbind Roog ne Nebukadnesaar a watnit’ina no Mbind Roog ne Yeerusaleem, a ɓisiid a den Babilon, xan a ndaknel, a ƥisel no Mbind Roog naa Yeerusaleem, a ndiƈel kam faa no fo mbiñ naa da ndeeƭna.› »

⁶Ndiiki koy, wo Tatenay, gofornoor fee no mudand ne no xuluɓ ole Ofrat, Setar-Bosnay fo gend nuun we Afarsak ngenna no mudand ne no xuluɓ ole Ofrat, baa a ƭat nuun a yongat teen.

⁷Nqaƴyo calel ke no Mbind Roog neene da suur. Fat gofornoor fee no Yaawuur we fo maak we den a maxatinin me ta ref’ina.

⁸Keeke refu kebil ne um cooxtaa ta jagin no ke nu mbarna o mbi’an maak wene no Yaawuur we no maqatin ne no Mbind Roog neene: Ke na ñakkeel xan a rabdel deŋ goor weene, ta inoor no ke o maad oxe a daawtaa na bateer ake ngatna no mudand ne no xuluɓ ole Ofrat, too baa ɗegir.

⁹Ke soxla’eena no sadax toxel ke Roog fee na asamaan, qoox, a suk paal, fo mbaal, bele, fo jem, biiñ fa diwliin, xan a cooxeel saasadax we Yeerusaleem ñaal oo ñaal no ne da laamtitkan, ta fañ o yaacaanel,

¹⁰ndax da ƥoxot a Roog fee na asamaan sadax kaa mbeluuna soo a nqeɗan o ñoow ole no maad oxe fo ole na xa taan um.

¹¹Keeke koy refu kebil ne um cooxtaa ta jagin no kiin oxuu ɗapna fa lay feene: Xan a teex a fuurtel no mbind um, a lupel, ndax ta rengel teen soo mbind um a suptel juum kefatin.

¹²Yaasam Roog fee genna no mbiñ onqeene a maaf o maad oxuu mbaat xeet fuu na jeemkaa o ɗap fa lay es, ndax ta yaq Mbind Roog neene kam Yeerusaleem. Mi o maad Daryus o mat cooxtu kebil neene, too fat a reefel noc.»

¹³Tatenay, gofornoor fee no mudand ne no xuluɓ ole Ofrat, Setar-Bosnay fo gend den a ndeefa noc kebil neene o maad Daryus a lulitna a den.

¹⁴Maak we no Yaawuur we a suura no maq ne fo ngoora, yaam a saƭakinoor a ƭelem ake o tuleer Age fo o tuleer Sakari fee o ndaan Ido a ndaawin’ina a den. A ƈutanda maq ne ne Roog fee Isra’el a heblit’uuna fo ne Kiirus, Daryus fa Artaserkesees, maad we Persi, a ngeblit’uuna.

¹⁵Mbind Roog ne a ƴuta no ñaal ndadkandeer ne no nqool Adaar, no hiid ɓetuu fa lengandeer ole no maat Daryus.

¹⁶Saasadax we, Leelewi we fo Ii-isra’el we fop we nomtoortiidna no mbaƭ naa, a ndoofanda fo o ɗaay barke fee no Mbind Roog neene.

¹⁷A sadaxta na barke fee no Mbind Roog neene qoox teemeed, a suk paal teemeed ƭik fo fo mbaal teemeed nahik soo nen sadax fa mbaasnoor pakaad no Ii-isra’el we fop a suk pambe xarɓaxay fo a suk pambe ƭak, a ndeefandin no ne a carind ake Isra’el a mbodna.

¹⁸A ndalna saasadax we, a ndeefandin na qaaj den, fo Leelewi we, a ndeefandin na yaj den, na paɗax ale Roog kam Yeerusaleem, ne ta bindteena no safe le Moyiis.

¹⁹We nomtoortiid’ina no mbaƭ naa a ndoofanda Xew fee na colandax ale no ñaal xarɓaxay fo ñaal nahkandeer naa no nqool o eetaand onqe.

²⁰Saasadax we fo Leelewi we kaa ƥogdinooxandoor’u boo a nqool den fop. Naaga, a mbarana fop we nomtoortiid’ina no mbaƭ naa, fog den saasadax we fo a qoox den fo mbaal ne na Colandax ale.

²¹Ii-isra’el we nomtoortiid’ina no mbaƭ naa a ñaama fo mbaal ne na Colandax ale, den fo fop we ngoƭatir’ina fo qoolaƭaru ke no qeet ke no saax le soo a mbokatooriid fa den, ndax da mbaaƭ o Yaal oxe Roog fee Isra’el.

²²A ndoofanda fo o ɗaay boo ñaal ɓetuu ƭik Xew fee no puuru canja’e ke, yaam o Yaal oxe kaa ɗaaynoor’u a den, ye ta fi’na boo o maad oxe Asuur[21] a damit a den no calel ke no Mbind ne na Roog fee Isra’el.