Read NQAARIIT NE ROOG Nehemi 1 Bible Online

Nehemi 1 - NQAARIIT NE ROOG bible

Nehemi 1

¹A betandax Nehemi fee o ƥiy Hakaliya. No hiid qarɓeen ƭikandeer ole no maat Artaserkesees[1], no nqool Kisleew, a soƥaam na teeru fa njegu saŋe faa Suusaan,

²Hanani fee o leng no fog es fo goor leng-leng a inoora Yudaa. Laamtaam a den kaa farna no Yaawuur waa nomtoortiid’ina no mbaƭ naa fo kaa farna na Yeerusaleem.

³A ndoonaxam ee: «We nomtoortiid’ina no mbaƭ naa owaay maaga, no jegel olaa Yudaa, a ndef no ñaat o ɗomu fo na gaci fa maak. Saŋe ne Yeerusaleem kaa jeg xa kur soo begax ke ten a ndoxel riw.»

⁴Ye nanuuma fa lay feene, moofaam, loolaa soo naqadiloox boo ñaal mayu. Kaam hooroogu, xeɗaa mbaambir Roog fee na asamaan

⁵soo lay ee: «Ey, o Yaal oxe Roog fee na asamaan, Roog fa maak fa saɗarnooxu fee, wo fee na geekaa ngiɓoor ne soo laltaa yirmande no we mbexoonga too a ngayaa kebil of,

⁶rungi nof of, wet a kid of, ndax o jaɓ a qeƭ no tag of! Mexey mbaambir of, ñaal fo o yeng, xeɗanaa Ii-isra’el we dag of, weejlaa tooñ ke i tooñoonga. Mi yoo ƥasil es oo i mbakaada.

⁷No ndigil, i mbesoora naa faaxeerna fa wo ye i ngayeerna kebil ke, bargal ke fo bareef ke daawnoona a Moyiis fee o tag of.

⁸Wetandooxi fa lay feeke hebloona a Moyiis fee o tag of, ta daawnitin: ‹Nu ngore’aƭarangaa, xam pasar a nuun a ndeer qeet ke.

⁹Kaa koy, nu nomtooxiidangaa me mi, ngay kebil es, ndeef a den, yaaga nu ƥisange boo no cat adna sax oo, xam fokatit a nuun maaga, nomtiid a nuun no mbiñ onqe jiluuma, ndax ta ref ngenand es.›

¹⁰O Yaal oxe, dag of fa xeet of a ndefu waa wattoona katil fa maak fee wo fo o ɓay o jegu doole le wo.

¹¹Ey, o Yaal oxe, rungi nof of boog na qeƭ ale no tag of fo na le no dag of we mbugna o saɗarong! Xaye, fi’i boo fop no tag of a ñaaƴ ta daaw yirmande fee no maad oxe.» Mi reeƭu koy oxe na topatooxaa a yer ale no maad oxe.