Read NQAARIIT NE ROOG Nehemi 12 Bible Online

Nehemi 12 - NQAARIIT NE ROOG bible

Nehemi 12

¹Keeke ndefu a kon ake no saasadax we fo Leelewi we nomtoortiid’ina no mbaƭ naa too a yooniid fa Serubabel fee o ƥiy Se’alti’el fa Yesuwa: Seraya, Iremiya, Esdaraas,

²Amariya, Maluk, Hatus,

³Sekaniya, Rehum, Meremot,

⁴Ido, Gineton, Abiya,

⁵Miyamin, Maadiya, Bilga,

⁶Semaya, Yoyarib, Yedaya,

⁷Salu, Amok, Hilkiya fa Yedaya. Weene ndeeƭu kelfa ke no saasadax we fo fog den, na jamaane Yesuwa.

⁸Leelewi we a ndeeƭa: Yesuwa, Binuy, Kadmi’el, Serebiya, Yehuda, Mataniya fee adooxanoogna a kim a niwir ake, a yoon fo fog um,

⁹Bakbukiya fa Uni, mbodoogna mbaambir, ndax da njaaɓanaa a den.

¹⁰Yesuwa rimu a Yoyakim, Yoyakim a rim a Eliyasib, Eliyasib a rim a Yoyada,

¹¹Yoyada a rim a Yoonatan, soo Yoonatan a rim a Yaduwa.

¹²Weeke ndeeƭu yaal ƥasil saasadax ke na jamaane Yoyakim fee o saasadax o maak oxe: No ƥasil ne Seraya, Meraya, no ne Iremiya, Hananiya,

¹³no ne Esdaraas, Mesulam, no ne Amariya, Yohanan,

¹⁴no ne Meliku, Yoonatan, no ne Sebaniya, Yoseef,

¹⁵no ne Harim, Adna, no ne Merayot, Helkay,

¹⁶no ne Ido, Sakari, no ne Gineton, Mesulam,

¹⁷no ne Abiya, Sikiri, no ne Miniyamin, …[28], no ne Mowadiya, Piltay,

¹⁸no ne Bilga, Samuwa, no ne Semaya, Yoonatan,

¹⁹no ne Yoyarib, Metanay, no ne Yedaya, Usi,

²⁰no ne Salay, Kalay, no ne Amok, Ebeer,

²¹no ne Hilkiya, Hasabiya, fo no ne Yedaya, Netanel.

²²No camaane ke Eliyasib, Yoyada, Yohanan fa Yaduwa a ndeeƭna saasadax maak, a kon ake no Leelewi yaal ƥasil ke fo saasadax we a mbindooge, boo no maat Daryus fee o maad Persi.

²³A kon ake no Leelewi yaal ƥasil ke a mbindooge no safe leng no Caloori ke boo na jamaane Yohanan fee o ndaan Eliyasib.

²⁴Kelfa ke no Leelewi we ndefna Hasabiya, Serebiya fa Yesuwa fee o ƥiy Kadmi’el kaa njasnooroogu fo Leelewi lakas we, ndax da simat soo a tagas o Yaal oxe, ne Dawid fee o kiin Roog a simtit’uuna. Kaa njaaɓanroogu a qaaj a qaaj.

²⁵Yeeyetax we na xa ton-maax axe ndefna Mataniya, Bakbukiya, Abjaas, Mesulam, Talmon fa Akub yetooxoogu tok keekand ke paam xa ton-maax axe no Mbind Roog ne.

²⁶Weene njopir’u fa jamaane Yoyakim fee o ƥiy Yesuwa too a ref o ndaan Yosadak fa jamaane Nehemi fee gofornoor fa Esdaraas o saasadax too a ref itam o caajangin oxaa andna kebil ke.

²⁷Ye fa barke fee no saŋe ne Yeerusaleem, Leelewi we a nqottike no fo mbiñ ne da ngen’ina fop, a ngartel Yeerusaleem, ndax xew fee a roofandtel o ɗaay, a simat fo a kim akaa yoonandteena a qiin, a tiiti fo a simb.

²⁸Giigim we no Mbind Roog ne a mbokatoorta me widna a Yeerusaleem, no caate ke Netofa,

²⁹Bet-Gilgal fo na koƥ ake Geba fa Asmawet, yaam kaa maxan’u a qoox den caate me widna a Yeerusaleem.

³⁰Saasadax we fo Leelewi we a ƥogdinooxa soo a ƥogid xeet fee, tokand ke fo saŋe ne.

³¹Ŋaaynaam kelfa ke Yudaa took saŋe ne soo fi a yaj a ƭak a maak no giigim. A leng ale a jagna no saax o ñamaak took saŋe ne, farna fo Ndokand naa no suqi ke.

³²We ndeefan’ina giigim we ndeeƭu: Hosaya fa genwal fee no kelfa ke Yudaa,

³³Asariya, Esdaraas, Mesulam,

³⁴Yehuda, Bensame, Semaya fa Iremiya.

³⁵Saasadax we na luuƥaa ndoonoox’u teen. O eetaand oxe na den reeƭu Sakari fee o ƥiy Yoonatan, daan um a ndefna Semaya, Mataniya, Mise, Saakur fa Asaf.

³⁶Fog um saasadax we ndefna Semaya, Asarel, Milalay, Gilalay, Ma’ay, Netanel, Yehuda fa Hanani ndeefan’un, a saq pakir ke Dawid fee o kiin Roog. Esdaraas fee o caajangin oxaa andna kebil ke adooxan’u a den.

³⁷Ye da mbadiidna no Ndokand ne na cur ale, a njasnoora fo o ŋaayand ole na ƥak ale Dawid, a ŋaaytaan no saŋe ne boo a ngarit mbind no maad ne Dawid took soo a suur boo no Ndokand naa no poofi ke, farna fo batand.

³⁸A yaj a lakas ale no giigim we a jagna no saax o janoon. Reefanaam a den took saŋe ne, yoon fa genwal fa lakas fee no kelfa ke[29] na xeet fee. I ndeefa paam Taax-took ne no Cuɗand ke boo me saŋe ne a yaajitna,

³⁹suur me garitna Ndokand ne Efrayim took fo Ndokand ngiid ne fo Ndokand ne no liƥ ke, njoon fo Taax-took ne Hananel fo ne no teemeed ke boo no Ndokand naa no paal ke soo ngaktik no Ndokand naa na kaso fee.

⁴⁰Cinj kaaga, a yaj a ƭak ake no giigim we a ndoka kam Mbind Roog ne. Mi itam rokaam, yoon fa genwal fee no kelfa ke

⁴¹fo saasadax we saq’ina a luuƥ ake, da ndef Eliyakim, Maseya, Miniyamin, Mikaya, Eliyohenay, Sakari fa Hananiya.

⁴²A jeg’a itam a Maseya, Semaya, Eleyasaar, Usi, Yohanan, Malkiya, Elam fa Eseer. Giigim we a yoɗa a kim, Yisrahiya a adooxan a den.

⁴³No ñaal naaga, wiin we a ƥoxota sadax mayu soo a ndef no mbelakinooxaa, yaam Roog kaa ci’’u a den o ɗaay o maak. Rew we fo xa caaƈ axe a mbelakinooxa itam, too xa ƈeel axe kam Yeerusaleem a nannooxa koƭu.

⁴⁴A koom, goor a ngadne a yetax ale no fo ndok fo-mbulanq ne, me sadax ke fo ke eetna o foor no duufe le fo a seek xarɓaxayandeer ake a ngeekoogeena. A sime itam o mbokataa teen a las ake no saasadax we fo ake no Leelewi we kebil ke a simit’ina, da ngat na xa qol axe no teeru ke. Yuuyudaa we a sawar’a no ke saasadax we fo Leelewi we a ndokatinna no far den.

⁴⁵A mbadnooga a paɗax Roog den fo ale no ƥogid ke. Giigim we no Mbind Roog ne fo yeeyetax we na xa ton-maax axe no Mbind Roog ne itam a mbadnooga o far den, ne o maad Dawid fa Salomo fee o ƥeem a ngeblit’uuna.

⁴⁶Yaam yaa fa yaaga, na jamaane Dawid fa Asaf fee o kiigim no Mbind Roog ne, a jegooga aa-adax no giigim fo a kim a niwir fo a kidmir a Roog.

⁴⁷Na jamaane Serubabel fo na jamaane Nehemi, Ii-isra’el we fop a cooxooga giigim we no Mbind Roog ne fo yeeyetax we na xa ton-maax axe no Mbind Roog ne ke helna a den ñaal oo ñaal. A cooxooga itam Leelewi we sadax tedu ke, soo Leelewi we a coox teen saasadax we ndefna xa taan Aaroon a las den.