Read NQAARIIT NE ROOG Nehemi 3 Bible Online

Nehemi 3 - NQAARIIT NE ROOG bible

Nehemi 3

¹Eliyasib fee o saasadax o maak fo fog um saasadax we a inooxa, a maxatin Ndokand ne no paal ke. A tedlandaan soo a mbad teen begax ke. Cinj kaaga, a maxatina saŋe ne boo no Taax-took naa no teemeed ke, a tedlandin, soo a suur boo no Taax-took naa Hananel.

²Denda fa den, wiin we Yeriko a maxooga, denda fa den, Saakur fee o ƥiy Imri a maxooga.

³Wiin we Senaa[5] a maxatina Ndokand ne no liƥ ke. A ndaaƴa teen a qanq ake, a mbad teen begax ke, begir ke fo a kinglir ake.

⁴Denda fa den, Meremot fee o ƥiy Uriya too a ref o ndaan Hakos a jalooga, denda fo ten, Mesulam fee o ƥiy Berekiya too a ref o ndaan Mesesabel a jalooga, denda fo ten, Saadok fee o ƥiy Baana a jalooga,

⁵denda fo ten, wiin we Tekowa a njalooga, ndaa garmi ke den kaa mbañoogu o njal no kebil no we adooxanna calel ke.

⁶Yoyada fee o ƥiy Paseya fa Mesulam fee o ƥiy Besodiya a nqendanda Ndokand ngiid ne. A ndaaƴa teen a qanq ake, a mbad teen begax ke, begir ke fo a kinglir ake.

⁷Denda fa den Melatiya, o Kiigibe’on oxe, Yadon, o Meemeronot oxe, wiin we Gibe’on fo we Mispa a njalooga paam ngenand ne na gofornoor fee[6] no jegel ole no mudand ne no xuluɓ ole Ofrat.

⁸Denda fa den, Usi’el fee o ƥiy Harhaya too a ref o leng na xaaxaw wurus we a jalooga, denda fo ten Hananiya fee o leng no we na mbi’aa cuuraay a jalooga. A muuka calel den kam Yeerusaleem[7], ye da mbadiidna no saŋe yaaju naa.

⁹Denda fa den, Refaya fee o ƥiy Xuur, kelfa’oogna genwal fee no fiisel ole Yeerusaleem, a jalooga.

¹⁰Denda fo ten, Yedaya fee o ƥiy Harumaf a jalooga me jasnoorna fo mbind um. Denda fo ten Hatus fee o ƥiy Hasabneya a jalooga.

¹¹Malkiya fee o ƥiy Harim fa Hasub fee o ƥiy Pahat-Mowaab a njalooga na ƥak a lakas no saŋe ne fo Taax-took ne no Cuɗand ke.

¹²Denda fa den, Saalum fee o ƥiy Halohes kelfa’oogna genwal fa lakas fee no fiisel ole Yeerusaleem a jalooga fo xa ƥeem xa tew.

¹³Hanuun fo we ngenna Sanowa a nqendanda Ndokand ne na yulanq ale. A maxatinaan, a mbad teen begax ke, begir ke fo a kinglir ake. A maxatina itam xa noonoong juni no saŋe ne boo no Ndokand ne no suqi ke.

¹⁴Malkiya fee o ƥiy Rekab kelfa’oogna o fiisel ole Bet-Hakerem a xendanda Ndokand ne no suqi ke. A maxatinaan, a wad teen begax ke, begir ke fo a kinglir ake.

¹⁵Saalum fee o ƥiy Kol-Hose kelfa’oogna o fiisel ole Mispa a xendanda Ndokand ne na cur ale. A maxatinaan, a bombin, a wad teen begax ke, begir ke fo a kinglir ake. A xendanda itam saŋe ne na mbeel ale na Ƥaaxaand ale, paam a ƭing ale no maad oxe, boo no toŋ-toŋ ole fudoortiidna na teeru fee Dawid.

¹⁶Kaltaa um, Nehemi fee o ƥiy Asbuk kelfa’oogna genwal fee no fiisel ole Bet-Suur a jalooga boo maa jasnoorna fo poy ke Dawidiin, a suur boo na mbeel ale waqeena fo no ngenand ne no xir say we[8].

¹⁷Kaltaa um, Leelewi wene a njalooga: Rehum fee o ƥiy Bani, soo denda fo ten Hasabiya fee kelfa’oogna genwal fee no fiisel ole Keyla a jalanooga o fiisel um.

¹⁸Kaltaa um, fog den weeke a njalooga: Baway fee o ƥiy Henadad kelfa’oogna genwal fa lakas fee no fiisel ole Keyla,

¹⁹soo denda fo ten Eseer fee o ƥiy Yesuwa kelfa’oogna Mispa a xendandooga a ƥak a lakas no saŋe ne, me jasnoorna fo o ŋaayand ole no ngeekand ƥonax ke, no Kooñ ne[9].

²⁰Kaltaa um, Baruk fee o ƥiy Sabay a jalooga fo njambaar a ƥak a lakas, no ke xotitna no Kooñ ne boo na carind ale no mbind Eliyasib fee o saasadax o maak oxe.

²¹Kaltaa um, Meremot fee o ƥiy Uriya too a ref o ndaan Hakos a jalooga na ƥak a lakas, no ke xotitna na carind ale no mbind Eliyasib boo no cat ke no mbind ne.

²²Kaltaa um, saasadax we ngenna me widna a Yeerusaleem a njalooga.

²³Kaltaa den, Bensame fa Hasub a njalooga me jasnoorna fo mbind den. Kaltaa den, Asariya fee o ƥiy Maseya too a ref o ndaan Ananiya a jalooga denda fo mbind um.

²⁴Kaltaa um, Binuy fee o ƥiy Henadad a xendandooga a ƥak a lakas, no ke xotitna no mbind Asariya boo no Kooñ ne saŋe ne a ɓolitna.

²⁵Palal fee o ƥiy Usay a jalooga me jasnoorna fo Kooñ ne fo taax-took ne moƴna o jigid, sutooxna saŋe ne no ke xotitna no mbind ne no maad oxe, paam o maax ole na kaso fee. Kaltaa um, Pedaya fee o ƥiy Paros a jalooga.

²⁶Diidimle we no Mbind Roog ne ngenna na ƥak ale Ofeel[10] a njalooga boo me jasnoorna fo Ndokand ne no poofi ke.

²⁷Kaltaa den, Teetekowa we a njalooga a ƥak a lakas me jasnoorna fo taax-took maak ne sutooxna saŋe ne boo no saŋe ne Ofeel.

²⁸No ke xotitna no Ndokand ne no pis ke saasadax we a njalooga, oxuu refna me jasnoorna fo mbind um.

²⁹Kaltaa den, Saadok fee o ƥiy Imer a jalooga me jasnoorna fo mbind um. Kaltaa um, Semaya fee o ƥiy Sekaniya too a ref o yeeyetax oxe no Ndokand ne no batand a jalooga.

³⁰Kaltaa um[11], Hananiya fee o ƥiy Selemiya fa Hanuun, o ƥiy ɓetaa fo lengandeer onqe Salaf, a nqendandooga a ƥak a lakas no saŋe ne. Kaltaa den, Mesulam fee o ƥiy Berekiya a jaloooga me jasnoorna fo a ndok um.

³¹Kaltaa um, Malkiya fee o leng no xaaxaw wurus we a jalooga boo no mbind ne no diidimle we no Mbind Roog ne fo ne no jula we me jasnoorna fo Ndokand ne Mifkad fo boo na ndok-took ale no ƥol ne no saŋe ne.

³²Xaaxaw wurus we fo jula we a nqendandooga saŋe ne ndeer a ndok-took ale fo Ndokand ne no paal ke.

³³Ye Sanbalat a yegna yee in we maxatinaa saŋe ne, a fuuxa boo a buɓaa too sawar’ee tus. Kaa xaadnooxoogu a in, in Yaawuur we.[12]

³⁴A laya mbaambir no fog we ten fo mbaambir xiixire we Samari yee: «Xar Yaawuur heesu wene a mbi’aa? Ndax xan a nqaƴel a suur? Ndax xan a ƈutand calel den? Ndax xan a sadaxit? Ndax xan a ñoowdandatin a ƥil ake uptiteena no juum fo ut too a ndoxel?»

³⁵Tobiya, o Aa-amon oxe, reeƭna denda fa Sanbalat a laya itam ee: «Fat da max rek! O ɓox-a-koƥ a ŋaayangaan sax, xan a girid saŋe ne den maxteena a ƥil.»

³⁶«Wo Roog in, ngela nan-gilooxi, yaam kaa i nqeefel! Fi’i boo a ben ake da mbenaa a in a sagoox took den, ɓoxot a den da ngefel no saax laa da ƥiskeel took o hup doole.

³⁷Ba o waasanit tooñ den, too ba o forit pakaad den, yaam a tooña we na maxaa.»

³⁸Yaqanee koy, i suura no maxatinaa saŋe ne, too a ƴuta fop boo na genwal fee no geel le ten. Xeet fee kaa ƥek’u jom den no calel keene.