Read NQAARIIT NE ROOG Nehemi 5 Bible Online

Nehemi 5 - NQAARIIT NE ROOG bible

Nehemi 5

¹Ƭomatax maak a jegta no goor mayu fo rew den took no fog den Yaawuur we.

²Leng we kaa layoogu yee: «In fo xa ƥiy in xa koor fo xa tew kaa i may. Fat i njeg bele, ndax i ñaam too ñoow.»

³Lakas we kaa layoogu yee: «Kaa i mbar o ngaasnit xa qol in, a ƭing taxar biiñ in fo pind in, ndax i njeg bele na jamaane fee no biim le.»

⁴Lakas kaa layahinoogu yee: «Kaa i mbar o luɓ xaaliis took o ndegit xa qol axe in fo a ƭing taxar biiñ ake in, ndax i ndabid o maad oxe a bateer.

⁵Yaag oo toox de, in fo fog in cer leng kut ke i saqu. Xa ƥiy xa koor axe in njektiree fo axe no fog in. Yaqanee koy i ƥoxota xa ƥiy xa koor axe fo xa tew axe in no mbaƭ, too a jega na xa ƥiy xa tew axe in waa ƥoxoteena teen. I njegee pexey lakas, yaam xa qol axe in fo a ƭing taxar biiñ ake in wiin lakas njegatu a den.»

⁶Ye nanuuma ƭomatax den fo fa lay faaga, fuuxaam lool.

⁷Hebooxaam o xasan maak we fo kelfa ke too layaam a den ee: «Kaa nu laacaa fog nuun ndimand ngupu, yaa nu ƥandaa a den xaaliis!» Cinj kaaga, xoytaam mbokatax maak, ndax mbir den a ɓaalel.

⁸Layaam a den ee: «No pexey ke i njeg’ina, i mbata fog in Yaawuur we njikoox’ina a qoox den qeet ke nen faɗ[15], ndaa nuun, kaa nu njikooxaa fog nuun, too in sax a njikooxeel!» A naaga cel, njegee dara kaa da ndoonna.

⁹Layahinaam a den ee: «Ke nu mbi’aa faaxee! Kaa nu mbar o ñaaƴ no saɗar a Roog in, ndax qeet ke fañ in mbenkee a in.

¹⁰Mi itam, fog es fo dag es, i ƥanda a den xaaliis fa bele. Fat i mbaas boog ke da saqanna a in.

¹¹Xaye fee xaye sax, fat nu ƥoxot a den xa qol den, a ƭing taxar biiñ den, a ƭing taxar oliiw den fo pind den, nomit a den a seek ale na xaaliis fee, bele fee, biiñ fee fa diwliin fee nu laac’ina a den nen ndimand.»

¹²A ndoona yee: «Xan i nomit ke i njangna too i laackee a den dara, xan i mbi ke layoona.» Maaga, xoyaam saasadax waa soo daaɓooxnoor raarawnit we mbaambir den o ndam ke da ndegit’ina.

¹³Cinj kaaga, yo’naam njiba ne no sabadoor ne mi, lay ee: «Neeke Roog a yo’nitkaa o kiin oxuu damkeerna a tegit aleene, ta ñak mbind um fa halal um. Neeke a yo’nitkeel soo a xaƴel o ƥor!» Mbokatax ne fop a mbalalooxa yee: «Yaasaam ta jegit neene!» Cinj kaaga, a simata o Yaal oxe soo a mbi ke da ndegit’ina.

¹⁴No kaa xotitna no ñaal naa dod’eema gofornoor no saax le Yudaa, refna ref no kaa xotitna no hiid qarɓeen ƭikandeer ole boo no hiid qarɓeen tadik fo hiid o ɗikandeer ole no maat Artaserkesees, ta fi xa kiid xarɓaxay fo xa kiid xa ƭaq, mi fo fog es, i mosee o laac a bateer ake ngelna a gofornoor fee.

¹⁵Gofornoor ke adooxaxama kaa ñaatlandoogu xeet fee, a seraa a den ñaamel fa biiñ, kaa jolna xa monjong qarɓeen nahik xaaliis fa nqoolu xe[16]. Dag we den sax kaa toroxandoogu xeet fee. Mi o mat, fesooriim neene, yaam o saɗar a Roog.

¹⁶Kaam jaloogu kañ no maqatin ne no saŋe ne, too dag we mi itam kaa njaloogu teen. I njikanee a qoox in xa qol.

¹⁷Yaag oo toox de, kelfa Yaawuur teemeed fo kelfa Yaawuur qarɓeen ƥetik kaa ndeeroogu fa mi o roon es, too we inooriidoogna no qeet ke mbidna a in limtaand.

¹⁸Ke jawoogeena bes fuu refna, ta ref nqoox, paal kude ɓetuu fa leng fo tiiƭ, mi rabdoogun. Ñaal xarɓaxayandeer nuu refna ɓisiidoogeem biiñ fa mayu. Keene fop koy taxee um laac ke helna a gofornoor, yaam calel ke kaa meɗoogu lool na xeet fee.

¹⁹«Roog es, wetandooxaam fo o paaxel yaam fop ke fi’anuuma xeet fene.»