Read NQAARIIT NE ROOG Esteer 1 Bible Online

Esteer 1 - NQAARIIT NE ROOG bible

Esteer 1

¹Kene oxe xew’a na jamaane no maad Asuwerus fee maadooxoogna took xa cegel teemeed fo xa cegel qarɓeen ƭik fo xa cegel ɓetaa ƭaq, a xotit no saax laa End boo a damik no laa Kuus.

²Na jamaane faaga, uum-maamaad le no maad Asuwerus oxaa reeƭa na teeru fa njegu saŋe faa Suusaan.

³No hiid o dadkandeer ole no maat um, a fi’ana kelfa ke fop fo dag we ndefna no maat um mbumbaay. A jeg’a teen aa-adax we no xiixire we fo wiin maak we fo gofornoor ke na xa cegel axe Persi fa Medi.

⁴No mbumbaay neene fi’’ina a qool ɓetaa fo leng, a lala a den halal fee no maat um njegu o ndam fo o mosel o jegee sen ole ten.

⁵Ye ñaal keene a mbagiidaa, o maad oxe a fi’ana we ngen’ina na teeru faa Suusaan fop, wiin maak we fo fo mboƭomsogor ne, mbumbaay no yongand ne no maax o yaaju le no mbind no maad ne, boo ñaal ɓetuu ƭik.

⁶Coor tan fo kaa nqiiyiiyna a letnit’e gaare fo xa ƥaak xa taalde’u xaa yuuɓeena na xa keɗ xaaliis axaa lokeena na ƥiiɓit marbar[1]. Cong ñaamtel kaa mbi’teena wurus fa xaaliis a sip’e no maax ole dungit’eena a ƥil a cafeñu a ne’e emerod fa marbar fo kaa na nandtaa xa peme fa marbar fa ƥaal.

⁷A yer ale a cooxtitooge a tokol wurus akaa, aluu refna a fogreerna fo a kend um a calooƭ, too biiñ fee gas a fi’’u, ne ta merna o reftaa no mbumbaay no maad.

⁸A yer ale koy, ser’aand o leng, yaam o maad oxe kaa hebil’u aa-adax we no dag we, ndax we na lastaa a yer ale a mbadin o bug ole no we nqureena.

⁹Lingeer fee ne’’eena Wasti yoo, a fi’ana rew we mbumbaay kam mbind no maad ne Asuwerus.

¹⁰No ñaal ɓetuu ƭikandeer naa o maad oxe kaa sawar’u yaam biiñ fee ta yer’ina too a hebla a Mehumaan, Bista, Harbona, Bigta, Abagta, Cetar fa Karkaas, ɓuje ɓetuu ɗik we kesan’eena o maad Asuwerus,

¹¹da ƥisiidin a Wasti, lingeer fee, ta rokooxiid o ndip no maad onqe ten. Kaa bug’u o lal kelfa ke fo lakas we nqureena ne lingeer fee a mositna, yaam kaa mos’u lool.

¹²Kaa koy, lingeer fee a faña o ret, ke o maad oxe a heblit’uuna fop oo a reefandin no ɓuje we. Took kaaga, o maad oxe a xaadooxa, a fuux boo a buɓaa.

¹³O maad oxe a dalfooxa o ga’ir fo yaal-o-and we, yaam tig no maad kaa ɓaaloogel kili a ndeer um fo we andna kebil ke fo a ƭat.

¹⁴Aa-as we moƴ’ina o mat o maad oxe ndeeƭu Karsena, Setar, Admata, Tarsis, Meres, Marsena fa Memukaan, kelfa ɓetuu ƭik ke Persi fa Medi. Weene ndeeƭu we adooxna no maat ne too a njeg sañ-sañ o nga’raa fo o maad oxe a mbanuu da mbuguuna.

¹⁵O maad oxe a laamta a den ee: «Xar a ƭat a layu na Wasti, lingeer fee nananeerna ke hebluuma reefandin no ɓuje we, mi o maad Asuwerus?»

¹⁶Maaga, Memukaan a laya mbaambir o maad oxe fo mbaambir kelfa ke yee: «Wasti, lingeer fee, tooñee o maad oxe soom, ndaa kelfa ke itam fo qeet ke ndefna na xa cegel axe no maad Asuwerus fop.

¹⁷Xan rew we fop a yeg a pañ ale na lingeer fee, too yaaga nanankatee gor den soo a njaɓnooraa yee: ‹O maad Asuwerus kaa lulit’u a Wasti, ndax ta gariid mbaambir um, soo ta fañ.›

¹⁸Xaye sax, xan rew we no kelfa ke kam Persi fa Medi a yeg a pañ ale Wasti, lingeer fee, too xan a mbesoor leng kut ke fo gor den. Neene, nqeefir fo mbuuxoor rek na ngenkataa meen.

¹⁹Daali maad, a felangaang, fat kebil naa inoorna no maat ne a yegnitel, a dalnel kam bargal ke Persi fa Medi, too watkatee muk ee: ‹Wasti gariidkatee muk mbaambir o maad Asuwerus, too xan o maad oxe a dod lingeer fa lakas faa moƴuuna.›

²⁰Yaa kebil of neene a nannooxkaa kam xa kox axe no maat yaaju ne wo fop, xan o tew oxuu refna a nanan o kor um, da ndef wiin maak mbaat fo mboƭomsogor.»

²¹Fa lay faaga a fel’a o maad oxe fo kelfa ke, soo o maad oxe a fi’tin ne Memukaan a layit’uuna.

²²A lulta xa leetar kam xa cegel axe no maat ne fop, o jegel oluu refna na pindooƭ um, xeet fuu refna no ɗelem um, ndax o koor oo koor a ref o yaal mbind um, too keene a yegnite no ɗelem ole oxuu refna a numna.