Read NQAARIIT NE ROOG Esteer 2 Bible Online

Esteer 2 - NQAARIIT NE ROOG bible

Esteer 2

¹Yaa kaaga a faafna, fuux le no maad Asuwerus a ɓoosa. A refa no xalaataa a Wasti, lingeer fee fo ke ta fi’’ina fo ke dalin’eena no kaa jofna no ten.

²We njalanoogna o maad oxe a layaan ee: «Daali maad, fat o waaƭanel xa caaƈ xa tew axaa andafuleerna adna too a mos bo.

³Fat o jil wiin kam xa cegel axe no maat of fop, o hebil a den da mbokat xa caaƈ xa tew axe andafuleerna adna too a mos bo, a ƥisiid a den no daland ole no rew we refna no mbind no maad ne kam teeru fa njegu saŋe faa Suusaan. Fat Hegay, o ƥuje of oxe doxneena o daland oleene no rew we a topatooxaa a den, a cooxaa a den ƭuum ke mbarna na den fop.

⁴O njaaƈ o ndew onqe na moƴkang o fel na rondandkaa a Wasti.» Fa lay faaga a fel’a o maad oxe lool, soo ta fi’tel naaga.

⁵A jeg’a kam teeru fa njegu saŋe faa Suusaan o koor o Yaawuur oxaa ne’’eena Mordokay, a ref o ƥiy Ya’iir, Ya’iir a ref o ƥiy Simey, Simey a ref o ƥiy Kiis fee fogna na carind ale Bensame.

⁶Kaa fog’u no we yooniid’ina fa Yoyakin fee o maad Yudaa, too Nebukadnesaar fee o maad Babilon a ɓistiid’u a den Yeerusaleem.

⁷Mordokay feene saq’u a Xadasa fee lastitoogeena Esteer fee reeƭna o ƥiy faap maak um. Esteer koy, faap um fa ya um kaa ñak’u, too a cinj fa ñak no weene Mordokay saq’un. O njaaƈ o ndew o mosu tigi a reeƭu.

⁸Ye kebil ne no maad oxe a jootna, xa caaƈ xa tew xa mayu a mbokate na teeru fee Suusaan, soo Hegay a topatooxaa a den. Esteer itam a ɓisiide no mbind no maad ne, too Hegay fee doxin’eena o daland ole no rew we a topatooxoogaan.

⁹O njaaƈ o ndew onqeene a fel’aan lool too a may muud no ten. Hegay a ñofaan o coox fop ke na mosandooreel fo ñaamel ke ta soxla’na fop. A cooxaan itam jeefeer ɓetuu ɗik waa njilit’eena no mbind no maad ne, soo a dalnin me moƴna o faax no daland ole no rew we.

¹⁰Esteer feeñil’ee xeet fee ta fogna fo me ta faqaqoorna, yaam Mordokay kaa fañit’un ta andnoorin.

¹¹Ñaal nuu refna Mordokay kaa joqooyooxoogu paam o daland ole no rew we, ndax ta and nam Esteer a fi’u fo xar xewu fo ten.

¹²O njaaƈ o ndew onquu refna a jeg’a waxtu fee ta war’ina o ret maa no maad Asuwerus. Kaa koy, ye keene a helkaa fo fad, a njeg’a o hiid o muum olaa da mbarna o njagandoox, ne ta dalnit’eena no rew we. Na qool ɓetaa fo leng a eetaand ake, rew we a njagandoortooga diwliin fa mbi’te miir, soo na qool ɓetaa fo leng a paktu ke, da njagandoortaa ƭuum kaa mbi’teena xa moɗel fo ƭuum lakas mayu kaa o tew a jiriiñooraa ndax ta mos.

¹³Bo o njaaƈ o ndew a inoor’ina no daland ole no rew we, a retaa maa no maad oxaa, a cooxooge fop ke ta laac’ina, ndax ta ɓislooxin.

¹⁴No kirand a retoogu, soo no feet nqes olaa ta xaad no daland o lakas olaa keƈ-a-salma ke no maad oxe a ndeeƭna, too Saasga, o ƥuje xe no maad oxe a doxin’el o ten. Garoogatee me no maad oxe a refangee kaa ta fel o maad oxe boo ta xoyin no gon um.

¹⁵Ye Esteer fee o ƥiy Abihayil refna faap maak Mordokay fee yar’ina a Esteer, a warna o ret maa no maad oxaa, laac’ee dara lakas a refangee ke Hegay, o ƥuje xe no maad oxe doxin’eena o daland ole no rew we, a lay’uuna. Esteer koy, kaa yul’u a kid no we nga’ooguuna fop.

¹⁶Esteer oxe ɓis’e maa no maad Asuwerus no mbind no maad ne no nqool xarɓaxayandeer onqe refna ref o nqool Tebet, no hiid ɓetuu ɗikandeer ole no maat um.

¹⁷O maad oxe koy, Esteer a moƴ’u o bug ee rew lakas we fop. Neene, Esteer a hup’a xa caaƈ xa tew xa lakas axe fop muud no maad oxe. O maad oxe a rokanaan o ndip no maad onqe soo a dodin lingeer, ta rondand a Wasti.

¹⁸O maad oxe a fi’ana a Esteer mbumbaay soo a xur kelfa ke no maat um fo dag we ten fop. A waña a bateer ake kam xa cegel axe ten fop soo a lasit ci’it, ne o maad a merna o fi’tan.

¹⁹Yaa xa caaƈ xa tew axe a mbokateena no daland o lakas ole no rew we, a soƥ’a Mordokay a rok no calel no mbind no maad ne.

²⁰Boo fa ndiik Esteer feeñil’ee me ta faqaqoorna, ne’atiim xeet um, ne Mordokay a heblit’uuna o ten. Esteer a maad’a o nananaa a Mordokay, ne ta nananit’uuna yaaga ta refaa na xa ƥay um.

²¹Na bes fa leng, a jopir Mordokay a fadnaa o far um no mbind no maad ne, Bigtaan fa Teres, ɓuje ɗik we yetooxoogna begax ke no maad Asuwerus, a mbuuxana o maad oxe boo a ngiɓanin o ngir, ndax da sakin pexey.

²²Mordokay a yega kaaga soo a layin a Esteer, lingeer fee. Esteer a daawnaan o maad oxe no gon Mordokay.

²³Kaaga a ɓaale soo a jegit naaga. Wiin ɗik waaga a ndoke xa ƥaak no cok, a lokel a saayooxaa. Kaaga fop a bind’e no safe le no caloori ke no maad oxe.