Read NQAARIIT NE ROOG Esteer 5 Bible Online

Esteer 5 - NQAARIIT NE ROOG bible

Esteer 5

¹No ñaal ndadkandeer ne no koor ne, Esteer a rokooxa toki no maad ke ten soo a ret no maax-kam olaa no mbind no maad ne, a jasnoor fo a ndok ale no uum le. O maad oxe kaa moof’u no uum-maamaad le ten, a jasnoor fo ndokand ne.

²Ye o maad oxe a ga’na a lingeer Esteer, ta geenoox no maax ole, a yirmaan soo a jooxin o samb wurus ole ta pokoox’ina. Esteer a matiidaan, a duq cat ne no samb ole.

³O maad oxe a laamtaan ee: «Lingeer Esteer, xar ɓisiidong mene? Xar bugo um fi’anong? A refangaa sax ee genwal fee no maat es bugo, xan o ci’el o ten.»

⁴Esteer a doonaan ee: «Daali maad, a felangaang, kaam bug xaye fee xaye sax o gar yooniid fa Haamaan no mbumbaay ne jagandanoonga.»

⁵O maad oxe a laya dag we yee: «Ñofyo nqoyankaam a Haamaan, ndax i njaaɓik o xoy ole Esteer.» Cinj kaaga, o maad oxe fa Haamaan a ngara no mbumbaay ne Esteer a jagand’ina.

⁶Ye da yeraa biiñ fee, o maad oxe a laya a Esteer ee: «Layaam ke bugoona, too xan o jegin. Kuu xeɗoona, xan o ci’el o ten, a refangaa genwal fee no maat es sax oo.»

⁷Esteer a doonaan ee: «Ke um xeɗaa fo ke buguuma, o laamtaxam?

⁸Daali maad, a soƥangaa yee daawaam yirmande of too bugaxamo o ci ke um xeɗkang fo ke buguuma, fat o yooniidahin fa Haamaan no mbumbaay ne um jagandankaa a nuun o feet. Maaga, xam doonong a qool qac.»

⁹Na bes faaga, yaa Haamaan a inooraa no mbumbaay naa Esteer, a sawar’a bo, kam um a may muut fo o ɗaay. Kaa koy, ye ta ga’na a Mordokay no mbind no maad ne, too oxeene inoox’ee geenoox too ci’iran cer leng, Haamaan a dalfooxaan o fuuxan fuux maak.

¹⁰Haamaan a muñaan soo a xaad no mbind um. A xoyna qaariit um fo o teem Serek.

¹¹A fakoorta mbaambir den o magnel ole na halal um, xa ƥeem xa koor xa mayu fo ne o maad oxe a yoɗit’uuna ta hupat kelfa ke fo dag we no maat ne fop.

¹²A ɓaata teen ee: «Kaa jolna keene, mi doŋ lingeer Esteer a xoyu, um yooniid fo o maad oxe no mbumbaay ne ta jagand’ina, too o feet itam mi a xoyahinu, ndax um yooniid fo o maad oxe.

¹³Kaa koy, keene naagiraam o cooxaa o ɗaay o leng, feek mexe ga’aa a Mordokay, o Yaawuur oxe, ta jalaa kam mbind no maad ne.»

¹⁴O teem Serek fo qaariit ke fop a layaan ee: «Fat reex jiig laa o cigdel ole a fi’kaa xa noonoong qarɓeen ƥetik a sipel, soo o feet nqes o xeɗ o maad oxe, ndax Mordokay a rokel o ƥaak no cok soo a lokel teen. Neene, xan o waag o yoon o maad oxe fo o ɗaay no mbumbaay naa.» Pexey naaga a fel’a a Haamaan, soo ta sipin reex le.