Read NQAARIIT NE ROOG Esteer 6 Bible Online

Esteer 6 - NQAARIIT NE ROOG bible

Esteer 6

¹No yeng olaaga, ne o maad oxe a ɗaanar’aandeena dara, a simta o ɓisiidel safe le na laytaa caloori ke no maat ne, ndax ta janganeel o ten.

²Me jangoogeena kaa reeƭu ne Mordokay a weejlit’ina a Bigtaan fa Teres, ɓuje ɗik we yetooxoogna begax ke no maad oxe, mbug’ina o sak o maad Asuwerus pexey.

³O maad oxe a laamta yee: «Xar Mordokay a saɗgit’e fo nam a niwit’e no keene?» We ndagooxoogna o maad oxe a ndoonaan ee: «Dara!»

⁴O maad oxe a laamta yee: «An refu no maax ole?» Yaaga Haamaan na fadiidaa no maax-tafil ole no mbind no maad ne. Kaa xeɗiidoogu o maad oxe, ndax Mordokay a wartel no reex laa ta jagandan’uuna.

⁵Dag we no maad oxe a ndoona o maad oxe yee: «Haamaan refu no maax ole.» O maad oxe a laya a den ee: «Fat a rokiid!»

⁶Haamaan a rokiida, soo o maad oxe a laamtin ee: «Xar ware war o fi’an o kiin oxaa o maad oxe a bugna o niw?» Haamaan a laya taa no yiif um ee: «Ndi an o maad oxe a helu bug o niw? Kaaga de, mi doŋ a waagu o ref.»

⁷A doona o maad oxe yee: «Oxaa o maad oxe a hebooxna o niw,

⁸kaa ɓisiideel ndoki no maad naa o maad oxe a rokooxna boo a ƴut, a ɓisiidahinel pis ne o maad oxe a ŋaayaa, soo xoox le no pis ne a rokel o ndip no maad.

⁹Fat o leng no kelfa ke no maat ne a rokanin ndoki ne, a ŋaaynin no pis ne soo a adoox, a doxaa pis ne kam baayo fee na teeru fee, a falalooxaa mbaambir um ee: ‹Neeke o kiin oxaa o maad oxe a bugna o niw a fi’aneel.› »

¹⁰O maad oxe a layaan ee: «Ñofi jang ndoki ne fo pis ne, too ne laytanoona deŋ o fi’anitkan a Mordokay, o Yaawuur oxe na jalaa kam mbind no maad ne. Ba o saganit a leng na pi ake layoona fop.»

¹¹Haamaan a xota ndoki ne fo pis ne. A rokana a Mordokay ndoki ne, a ŋaaynin no pis ne, a ɗoxan kam baayo fee na teeru fee soo a falalooxaa mbaambir um ee: «Neeke o kiin oxaa o maad oxe a bugna o niw a fi’aneel!»

¹²Cinj kaaga, Mordokay a nomtooxa no mbind no maad ne, soo Haamaan o mat a siipanaa mbind um, kam um a feƭar, ta lupandoox yaam gaci.

¹³Haamaan a wetandooxa o teem Serek fo qaariit ke fop ke dal’uuna. Qaariit um keene njegna o and fa Serek fee o teem a layaan ee: «Mordokay feene o neewandooxanaa o Yaawuur oo. Yaaga boog, fat a woorong ee waagkatino o hup muk, too xan a maafong junjang.»

¹⁴Ye da maadna o layaa fo ten, ɓuje we no maad oxe a mbadiida, a ñof o ƥis a Haamaan no mbumbaay naa Esteer a jagand’ina.