Read NQAARIIT NE ROOG Esteer 7 Bible Online

Esteer 7 - NQAARIIT NE ROOG bible

Esteer 7

¹O maad oxe fa Haamaan a ngara, ndax da ndeer fa lingeer Esteer.

²No jaf ɗikandeer leene itam, ye da yeraa biiñ fee, o maad oxe a laya a Esteer ee: «Lingeer Esteer, layaam ke bugoona, too xan o jegin. Kuu xeɗoona, xan o ci’el o ten, a refangaa genwal fee no maat es sax oo.»

³Lingeer Esteer a doonaan ee: «Daali maad, a soƥangaa yee daawaam yirmande of, too ta felong, ke um xeɗang fo ke buguuma refu um muc, soo xeet es a muc itam.

⁴Kaa i njikooxel, mi fa xeet es, ndax i moocandel, mbarel, saŋkel! A reeƭangaa sax ee kaa i njikoox’el doŋ nen faɗ, laykoogiim dara, yaam jarkoogee um xijlang.»

⁵O maad Asuwerus a laamta a lingeer Esteer ee: «An oo xaaga? Taa oxe saɗna o yuuɓ keene?»

⁶Esteer a doonaan ee: «O ñaañagadil oxe fo o pañ oxe in refu Haamaan fa soxodu fene.» Maaga, diid maak a dama a Haamaan mbaambir o maad oxe fa lingeer fee.

⁷O maad oxe a dalfooxa o fuux boo a buɓaa, a waas maaga ñaamel kaa soo a siipan yongand ne no mbind no maad ne. Haamaan o mat, a yoq maaga, a xeɗooxaa a lingeer Esteer, ndax ta muclin yaam a ga ee o maad oxe o saŋkin doŋ a fosooxu.

⁸O maad oxe a inoora no yongand naa, a nomtooxiid na ndok ale da ñaamtoogna, a jopir Haamaan a fooxooxaa no njong ñaamtel ne lingeer Esteer a wondoox’ina. O ten o maad oxe a dalfooxa o falaloox ee: «Ee! Ke fi’oona deyirang, o gignaa a lingeer fee na kid es kam mbind es!» Yaa o maad oxe a tiimaa tiim rek, dag we ten a muura a tagid[3] ale Haamaan.

⁹O leng no ɓuje we, oxaa ne’’eena Harbona, a laya o maad oxe yee: «Daali maad, Haamaan a sipa reex jiig no mbind um maa ta bug’ina o warnoorit a Mordokay fee fa lay um a mucil’oonga, wo o maad oxe. O cigdel ole no reex leene a fi’a xa noonoong qarɓeen ƥetik.» O maad oxe a laya yee: «Fat Haamaan a wartel teen.»

¹⁰Haamaan a roke o ƥaak no cok, a lokel no reex le ta waajanit’ina a Mordokay a bar. Maaga, fuux le no maad oxe a ɓoosa.