Read NQAARIIT NE ROOG A sutax ale 1 Bible Online

A sutax ale 1 - NQAARIIT NE ROOG bible

A sutax ale 1

¹Keeke ndefu a kon ake na xa ƥiy axe Yakoob, refna ref Isra’el, ngarna Misira, a yooniid fo ten, oxuu refna fo ƥasil um:

²Ruben, Simewon, Lewi, Yudaa,

³Isakaar, Sabulon, Bensame,

⁴Dan, Neftali, Gaad fa Aseer.

⁵Wiin we mbaqaqoorna na Yakoob a mbi’’a wiin qarɓeen ɓetuu ƭik ne da mbodeena fop. Yoseef koy, Misira a eet’u o genaa.

⁶Cinj kaaga, Yoseef fo fog faap um fo suk kaaga fop a nqona.

⁷Kaa koy, Ii-isra’el we a ndimatira, a mayat bo. A ƥaatooxa too a moƴa o njeg doole. Maaga, a suxa saax le fo wiin.

⁸O maad o qas a dodooxa Misira too and’ee dara na Yoseef.

⁹Oxaaga a lay’a xeet um ee: «Nga’yo Ii-isra’el we a saqit boo a ngupat a in doole!

¹⁰Fat i mbexey kaa taxna saqitkatee, ndax boo xire a jegna, mbaritkee fañ we in, a maafir fa in soo a njang saax le.»

¹¹Miimisira we a ndoda wiin, da adooxan calel ke no Ii-isra’el we, a ndoxondaa a den calel ƭomu. Neene mat a maxtu teeru ke Pitom fa Ramses, ndax da ndef taga ke Firawon fee, refna o maad Misira, a geeraa o jeg um.

¹²Kaa koy, nuu da moƴ’ina o toroxandtaa a den, neene Ii-isra’el we o mat a moƴ’u o maytaa soo a saqtaa. Keene a tax’a Ii-isra’el we a saɗarel lool.

¹³Maaga, Miimisira we kaa ñagadiloogu Ii-isra’el we, a mbi a den faɗ.

¹⁴A toroxandtooga a den calel ƭomu. Kaa maxnooroogu a den ƭok, a muulnooraa a den soo a nqooxnooraa a den kuu waageena o jal na xa qol axe. Kaa seroogu a den calel keene fop.

¹⁵O maad oxe Misira a laya fo ɗik no gaagaajin Hebre waa. O leng oxe Sifira a ne’’e, o lakas oxe a ne’el Puu’a.

¹⁶Kaa lay’u a den ee: «Bo nu ngaajnaa rew we no Hebre we, yaa da ñootaa, fat nu ƭeet boo nga, o ƥiy onqe a refangaa o koor, fat nu mbarin, a refangaa o tew koy, fat nu mbuusin.»

¹⁷Kaa koy, gaagaajin we kaa saɗar’u a Roog too mbi’’ee ke o maad oxe Misira a lay’ina a den. Kaa nqaƴoogu xa koor axe da ñoow.

¹⁸O maad oxe Misira a xoya a den, a lay a den ee: «Xar taxu nu mbi’it neene, nqaƴ xa koor axe da ñoow?»

¹⁹A ndoona a Firawon fee yee: «A soƥa soƥ ee rew we no Hebre we nandee fo we no Miimisira we. Kaa njeg toole, a ñootaa, too o kaagaajin oxe fadiidkafulee.»

²⁰Roog a fudna barke no rew weene. Xeet faa a ndimatir’a too a moƴ’ata o saqit sax.

²¹Gaagaajin we kaa saɗar’u a Roog, too Roog a mayƭanda ƥasil den.

²²Maaga, Firawon fee a cooxa xeet um fop kebil neeke: «O ƥiy o ngoor onquu ñooteena no Hebre we, ndeɓeenoo kam o xuluɓ ole Niil, soo xa ƥiy xa tew axe fop, nu nqaƴ a den da ñoow.»