Read NQAARIIT NE ROOG A sutax ale 11 Bible Online

A sutax ale 11 - NQAARIIT NE ROOG bible

A sutax ale 11

¹O Yaal oxe a laya a Moyiis ee: «Xam ɓisiid taamaala fa mbalakaand fee took Firawon fee fo took Misira. Cinj kaaga, xan a xaƴ a nuun nu ndet, too xan a rax a nuun meeke sax.

²Fat o lay xeet fee Isra’el, ndax o koor oxuu refna fo o tew oxuu refna a xeɗ o kend um kaa fi’teena xaaliis mbaat wurus.»

³O Yaal oxe a fi’a boo Miimisira we a niw xeet fee Isra’el. Moyiis fa xoox um oo, saax le Misira kaa niw’un, boo no dag we Firawon fee fa xeet fee.

⁴Moyiis a laya a Firawon fee yee: «Keeke o Yaal oxe a layu: ‹Ndeer ee ndeer o yeng o njeek olene, xam xaañ no saax le Misira.

⁵Taaw ke no saax le Misira fop xan a nqon, a xotit na taaw fee wo, wo fee na maadooxaa, a gar na taaw fee no ceefeer oxe na unaa bele fee boo no taaw ke no cegel ke.

⁶Xan a jeg kam saax le Misira fop xa paɗax axaa andoona yee mosee o njeg meen muk, too jegkatee meen kaa nandna fa den.

⁷Kaa koy, ndeer Ii-isra’el we fop, o ɓox o leng woxkee teen o kiin mbaat njegel. Neene nu anditkaa njektir ne fi’uuma, mi o Yaal oxe ndeer Miimisira we fo Ii-isra’el we.› »

⁸Moyiis a suura, a lay ee: «Keene a jegangaa, xan dag of fop a ngar me mi, a ngooknoox mbaambir es, a layaam ee: ‹Sutooxi, wo fa xeet fee na ndeefang fop!› Cinj kaaga, xam sog o sutoox.» Maaga, Moyiis a sutooxa mbind Firawon fee, a fuux boo a buɓaa.

⁹O Yaal oxe a layahina a Moyiis ee: «Firawon fee nan-gilooxkee a nuun muk, ndax comlaand ke mi a moƴ o may kam saax le Misira.»

¹⁰Moyiis fa Aaroon a mbi’a comlaand keene fop mbaambir Firawon fee, ndaa o Yaal oxe a ŋajnoora a Firawon fee fañ’ina o xaƴ Ii-isra’el we da sutoox saax le.