Read NQAARIIT NE ROOG A sutax ale 12 Bible Online

A sutax ale 12 - NQAARIIT NE ROOG bible

A sutax ale 12

¹O Yaal oxe a laya a Moyiis fa Aaroon kam saax le Misira yee:

²«O nqool onqene na refkaa o nqool o eetaand nuun no hiid ole.

³Layyo xeet fee Isra’el fop ee no ñaal xarɓaxayandeer ne no nqool onqene, fat oxuu refna a waaƭan ƥasil um o njuk o leng.

⁴Ƥasil ne a neewangaa no njuk, a waaga o fokatoor fo ƥasil ngend um naa moƴuuna o mat a reefandel no wiin we. Fat nu lasir o njuk onqeene, o kiin oo kiin a xot ke ta waagna o ñaam.

⁵Fat a ref o njuk onqaa jegeerna sik fa leng, a jeg o hiid o leng. Nu mbaaga o mbaaƭ o mbaal mbaat o mbambe.

⁶Fat nu ngeek a den boo no ñaal xarɓaxay fo ñaal nahkandeer ne no nqool onqe, too fat a nqirsel kam xeet fee Isra’el fop na kid-a-caɓru kaa na bes faaga.

⁷Na ndok aluu leng no cegel keene a ñaamitkeel, fat nu nqot no fo’oy le, ƭuumin na toodook ake ndeerna o don-maax ole fo na tayil ale.

⁸No yeng olaaga, fat nu njuɗ a tegeƴ ake, ñaamit a den puuru canja’e, yoonandtin tuufe-duufe qaaɗu.

⁹Ba nu ñaam a den ƥeleer ke, too ba nu mbaƴin a den, ndaa njuɗyo a den. Mbokatyo teen xoox le fo a caf ake fo laaw ke fop.

¹⁰Baa tus teen a fe. A jegangaa kaa fe’na teen sax oo, fat nu ndoxin.

¹¹Boo nu ñaamaa a den, fat oxuu refna a humnoox no ndet, a rokoox xa ñaaƭ soo a saq o loq no ɓay um. Fat nu ñof o ñaam a den, yaam keene refu a Colandax ale[5] mi, mi o Yaal oxe.

¹²No yeng olene, xam xaañ kam saax le Misira, too xam war taaw ke ten fop, no ke xotitna no wiin we boo no cegel ke soo hate Miimisira we no roog tefee ndigil ke da mbaɗooxaa. Mi refu o Yaal oxe.

¹³Fo’oy le xan a ref o anddiloor no tok ke nu ndefkaa. Um ga’angaa fo’oy le, xam jolandoox a nuun, too jegkee taamaala fa leng faa na saŋikkaa a nuun, yaa um xawkaa saax le Misira.

¹⁴Fat nu mbetandooxaa koy bes feene, ta ref bes faa nu ndoofandanaxam, mi o Yaal oxe. Fat nu ndoofandan, ta ref nen kebil naa faafkeerna boo na xa taan nuun.»

¹⁵«Kaa nu mbar o ñaamaa puuru canja’e boo ñaal ɓetuu ƭik. No ke na xotitkaa no ñaal eetaand ne, waratee o jeg poɗaxnir no pind nuun. O kiin oxuu ñaamna mbuuru naa fuutuurna, no ke xotitna no ñaal eetaand ne boo no ñaal ɓetuu ƭikandeer ne, fat a sutel xeet fee Isra’el.

¹⁶No ñaal eetaand ne fo no ñaal ɓetuu ƭikandeer ne, fat nu njeg o xet o tedu. O leng jalkee no ñaal keene. Kaa koy, nu mbaaga o njaw ke o kiin oo kiin a warna o ñaamaa.

¹⁷Fat nu ndoofandaa Xew fee no puuru canja’e ke, yaam na bes feene suttum a nuun no saax laa Misira. Fat nu ngayin nen kebil naa na refkaa boo faw na xa taan nuun.

¹⁸No nqool o eetaand onqe, no kaa xotitna na kid-a-caɓru kaa no ñaal xarɓaxay fo ñaal nahkandeer ne boo na kid-a-caɓru kaa no ñaal qarɓeen ƭik fo ñaal lengandeer ne, fat nu ñaamaa puuru canja’e.

¹⁹Waratee o jeg poɗaxnir no pind nuun boo ñaal ɓetuu ƭik. O kiin oxuu ñaamna mbuuru naa fuutuurna, fat a sutel xeet fee Isra’el, ta ref o gataakoon mbaat oxaa fogna na xeet fee.

²⁰Nu ñaamkee puuru puutuuru, ndaa fo muu nu mbaagna o ngen, puuru canja’e nu mbugko ñaamaa.»

²¹Maaga, Moyiis a xoyna maak we Isra’el fop, a lay a den ee: «Ndetyo mbaaƭanik ƥasil nuun njegel na ked ake soo nqirsanin Xew fee na colandax ale.

²²Fat nu mbaaƭ a naaq isoop, suupin kam fo’oy le na refkaa no ƥaxañ ole, o don-maax oluu refna, nu ƭuum a tayil ale fo a toodook a ƭak ake ndamuuna. O leng na nuun sutooxkee a ndok um boo no feet nqes olaa.

²³Boo o Yaal oxe a xaañna saax le Misira, ndax ta xawin, a ga’angaa fo’oy le took a tayil ale fo took a toodook a ƭak ake, xan a jolandoox o don-maax olaaga too xaƴkee malaaka fee na saŋkaa ta rokiid kam pind nuun, ndax ta xaw a nuun.

²⁴Fat nu ngay kebil neene, nuun fo xa taan nuun bo na moos boo moos.

²⁵Boo nu ndokna no saax le o Yaal oxe a cooxkaa a nuun, ne ta regtituuna, fat keene a ref o mbaax nuun.

²⁶Maaga, boo xa ƥiy nuun a laamitna a nuun ee: ‹Xar o mbaax onqene a tektu?›,

²⁷fat nu ndoon a den ee: ‹Kaa ref sadax fee na Colandax ale i ƥoxot’ina o Yaal oxe jolandoox’ina pind in, in Ii-isra’el we kam Misira, ye ta xawna Miimisira we soo a mucil a in.› » Maaga, Ii-isra’el we a ngooknooxa, a ngung.

²⁸Cinj kaaga, Ii-isra’el we a ndeta too a mbi’a deŋ ke o Yaal oxe a hebil’ina a Moyiis fa Aaroon.

²⁹No yeng o njeek, o Yaal oxe a warnoora taaw ke kam saax le Misira fop, a xotit na taaw fee Firawon fee war’ina o moof no uum-maamaad le boo na taaw fee no paɗ oxe refna kam kaso faa, a gar no taaw ke no cegel ke fop.

³⁰Firawon fee a inooxa no yeng olaaga, ten fo dag we ten fo Miimisira we fop, too a jega xa paɗax kam saax le, yaam jeg’ee mbind naa o kiin a xoneerna.

³¹No yeng olaaga sax, Firawon fee a xoyna a Moyiis fa Aaroon, a lay a den ee: «Inooxyo, sutoox saax es, nuun fo Ii-isra’el lakas we. Ndetyo mbaɗook o Yaal oxe ne nu nqeɗit’uuna.

³²Njangyo cegel ke nuun itam, xa siir axe fo a ked ake, ne nu layit’uuna, too ndet. Fat nu nqeɗanaam a Roog nuun, ndax ta barke’aam.»

³³Miimisira we kaa ndaxoogu Ii-isra’el we, ndax da ñof o sutoox saax le, yaam kaa nqalaatoogu yee den fop xan a nqon.

³⁴Maaga, xeet faa Isra’el fop a ƥisa ke da nqiiw’ina, ye ta helko fo yoɗooxaa. A muurta qiiw ke den toki soo a ngadoox a den.

³⁵Ii-isra’el we a mbi’a ke Moyiis a lay’ina a den too a nqeɗa Miimisira we ñirax fo kaa fi’teena xaaliis mbaat wurus.

³⁶Maaga, o Yaal oxe a fi’a boo Miimisira we a niw xeet fee too a ci’ooga a den ke da nqeɗoogna a den. Neene mat Ii-isra’el we a njegit’u no Miimisira we halal.

³⁷Ii-isra’el we a inoora na teeru faa Ramses, a mbaaƭik a Sukot too a ndeeƭa ngap goor cuni teemeed ɓetuu fa leng, too xa teɓandoong axe fo rew we fo nogoy we limtaand.

³⁸Wiin mayu waa mbog’eerna fa den, a yoona fa den. A ƥisloox’a itam cegel mayu: xa siir fo a ked.

³⁹A mbi’a xa kaf xa ƭembet fo qiiw kaa da ƥistiid’ina Misira. Qiiw ke koy, yoɗoox’afulee, yaam kaa ndax’el maaga. Njeg’ee o daaw olaa da ƥislooritna ñaamlax.

⁴⁰Ii-isra’el we a ndeeƭa Misira boo xa kiid teemeed nahik fo xa kiid qarɓeen tadik.

⁴¹A cinj ye xa kiid teemeed nahik fo xa kiid qarɓeen tadik axe a mbaafna, no yeng ole na bes faaga sax sax, a yaj ake no Yaal oxe fop a sutooxu no saax laa Misira.

⁴²O yeng ole na bes faaga koy, a refata o yeng olaa Ii-isra’el we a mbe’aa a ngirnanaa o Yaal oxe, yaam ne ta sutna a den no saax laa Misira. Fat Ii-isra’el we fop boo na xa taan den a ngirnanaa o Yaal oxe o yeng oleene fop.

⁴³O Yaal oxe a laya a Moyiis fa Aaroon ee: «Keeke refu kebil ne no mbaal ne na Colandax ale: O gataakoon o leng ñaamkee teen.

⁴⁴Faɗ we nu njikna, a mbaaga o ñaam teen, kaa koy, fat a soƥ da nqucoox.

⁴⁵O kenar fo o saadlaand ñaamkee teen.

⁴⁶Na ndok ale a ñaamitkeel. Nu sutkee o ɗeg o leng na tegeƴ ake, too nu ƥolkee o hiiƈ o leng.

⁴⁷Fat o fog ole na xeet fee Isra’el fop a ndoofand a Colandax ale.

⁴⁸Boo o gataakoon olaa refna no mbind of a bugaxama o roofandan a Colandax ale, o koor oxuu fogna no ƥasil um a ware o xuc. Maaga, xan a waag o matiid, a fog na toofand ale na Colandax ale, too xan a nandat fo xaa fogna na xeet fee Isra’el. O qucooxeer o mat fogkee teen.

⁴⁹Kebil leng kut ne a refkaa no xe fogna na xeet fee fo o gataakoon ole refna a ndeer nuun.»

⁵⁰Ii-isra’el we fop a mbi’a deŋ ke o Yaal oxe a hebil’ina a Moyiis fa Aaroon.

⁵¹Na bes faaga sax, o Yaal oxe a suttu Ii-isra’el we fop no saax laa Misira, da mbi o xod.