Read NQAARIIT NE ROOG A sutax ale 13 Bible Online

A sutax ale 13 - NQAARIIT NE ROOG bible

A sutax ale 13

¹O Yaal oxe a laya a Moyiis ee:

²«Kesanaam taaw ke no Ii-isra’el we fop, yaam taaw no kiin oxuu refna fo taaw njegel nuu refna, mi jegun.»

³Moyiis a laya xeet faa yee: «Mbetandooxyo bes feene nu sutooxna Misira maa nu ndeeƭna faɗ, yaam na pexey katil fa maak fee ten o Yaal oxe a suttu a nuun maaga. A koom, o leng na nuun ñaamkee mbuuru naa fuutuurna.

⁴Xan nu sutoox xaye no nqool onqe na xoyeel Abiib.

⁵Yaa o Yaal oxe a rokinkaa a nuun kam saax le no Kaakanaan we, Heeheet we, Aa-amori we, Hiihiwi we fo Yeeyebus we, ta daaɓoox’ina fo daan nuun ee xan a cooxin a nuun, saax le fo sis fo suum a ndaxritaa, fat keene a ref o mbaax onqaa nu mbetandooraa o Yaal oxe kam o nqool onqeene.

⁶Fat nu ñaamaa puuru canja’e boo ñaal ɓetuu ƭik. No ñaal ɓetuu ƭikandeer ne koy, fat nu ndoofandan o Yaal oxe xew.

⁷Puuru canja’e nu mbugko ñaamaa kam ñaal ɓetuu ƭik ke fop. O leng ga’katee mbuuru mbuutuuru no mbind nuun, too o leng ga’katee poɗaxnir kam saax nuun fop ne ta fodeena.

⁸Na bes feene, fat nu mbetandoox xa ƥiy nuun ee: ‹Kaa i mbi’aa kene, yaam ke o Yaal oxe a fi’anna a in, ye i sutooxna Misira.›

⁹Keene xan a ref na nuun nen o anddiloor na xa ƥay nuun, a ref nen betandoor na tagid nuun, ndax nu yegnitaa kebil ke no Yaal oxe, yaam na pexey katil fa maak fee ten o Yaal oxe a suttu a nuun Misira.

¹⁰Fat nu ngay kebil neene na waxtu fee ta dalneena o hiid oo hiid.

¹¹Yaa o Yaal oxe a rokinkaa a nuun kam saax le no Kaakanaan we, ne ta daaɓoortuuna yee xan a cooxin a nuun, nuun fo daan nuun,

¹²fat nu kesan o Yaal oxe taaw ke nuun fop fo taaw ke no cegel ke, yaam o Yaal oxe jegu taaw koor ke.

¹³Taaw o faam oluu refna fat nu mbattin mbaal, too boo andoona yee nu mbatiran, fat nu nquƴ o cok ole. Taaw fa ngoor fuu refna na xa ƥiy axe nuun, fat nu mbatin.[6]

¹⁴Yaa xa ƥiy nuun a laamitkaa a nuun ee: ‹Xar kene a tektu?›, fat nu ndoon a den ee: ‹Na pexey katil fa maak fee ten, o Yaal oxe a suttu a in Misira, maa i ndeeƭna faɗ.

¹⁵Ne Firawon fee a fañ’ina o xaƴ a in i ndet, o Yaal oxe a warnoora taaw ke no saax le Misira fop, no ke xotitna no taaw ke no wiin we boo no taaw ke no cegel ke. Ten taxu i ƥoxotaa o Yaal oxe taaw koor ke no cegel ke fop nen sadax, ndaa koy, we ndefna taaw na xa ƥiy axe in, kaa i mbataa a den.›

¹⁶Keene xan a ref nen o anddiloor na xa ƥay nuun fo nen o libidoor na tagid nuun, yaam na pexey katil fa maak fee ten o Yaal oxe a suttu a in no saax laa Misira.»

¹⁷Ye Firawon fee a xaƴna xeet fee Isra’el da ndet, Roog tox’ee a den a ƭat ale no saax le no Fiifilista we, ke ta moƴ’ina o mat fop oo, yaam Roog kaa fañoogu xeet fee a nqet fa xire, a ndiid, a nomtoox Misira.

¹⁸Ten taxu Roog a ɗapna xeet fee, da ndeef a ƭat ale na koƥ-a-ƥor ale, a njagin na Kal alaa no xeet laa. Neene Ii-isra’el we a inoortu Misira, a mbi o xod.

¹⁹Maaga, Moyiis a ɓislooxa xa kiiƈ axe Yoseef, yaam Yoseef kaa xeɗ’u Ii-isra’el we da ndaaɓoox ee: «Boo andoona yee Roog a sutta a nuun no saax leeke, bo nu ndetaa, fat nu ƥisloox xa kiiƈ es.»

²⁰A inoora Sukot, a ndalik Eetam, no ndokand naa na koƥ-a-ƥor alaa.

²¹O Yaal oxe kaa ñaaƴoogu mbaambir den no ñaal ne kam eel laa na ɗoxaa a den na ƭat den, soo no yeng ole kam aal fiɗel laa na xoolandanaa a den bo da mbaag o ñaaƴaa ñaal fo o yeng.

²²Eel le goƭoogee mbaambir xeet fee muk no ñaal ne, too aal fiɗel le itam goƭoogee a den no yeng ole.