Read NQAARIIT NE ROOG A sutax ale 14 Bible Online

A sutax ale 14 - NQAARIIT NE ROOG bible

A sutax ale 14

¹O Yaal oxe a laya a Moyiis ee:

²«Layi Ii-isra’el we da ƭap, a ndalik Pii-Haxirot, ndeer Migdol fo a Kal alaa no xeet laa jasnoorna fa Baal-Sefon. Maaga mat nu ndalkaa paam o maag olaa.

³Xan Firawon fee a foog ee: ‹Kaa nu mbiriɓ kam saax le, nduux kam a koƥ-a-ƥor ale.›

⁴Xam ŋajnoor a Firawon fee, ta daab a nuun. Maaga, xam saŋik a Firawon fee fo xiixire um fop, ndax um lalit o ndam es. Neene, xan Miimisira we a and ee mi refu o Yaal oxe.» Ii-isra’el we a mbi’a naaga.

⁵Ye Firawon fee o maad Misira fo dag um a yegneena yee Ii-isra’el we kaa ƈuf’u, a qalaat ake den na xeet fee a suptooxa too a layayo yee: «Ndi xar damu a in bo i nqaƴ Ii-isra’el we da ndet? Ndax kaa i mbaag’ee o ngeek a den no mbaƭ ne da ndeeƭna?»

⁶Cinj kaaga, Firawon fee a humna a sareet-xire ke ten soo a bufoox fo xiixire um fop.

⁷A janga a sareet-xire ke Misira fop, too ake moƴna mbaax a ndeeƭa teemeed ɓetuu fa leng, aluu refna teen a yip xiixire boo a qiicaa.

⁸O Yaal oxe a ŋajnoora a Firawon fee o maad Misira boo ta daab Ii-isra’el we njeg’atna a qoox den.

⁹Xiixire Miimisira we Firawon fop: Pis den, a sareet den fo ŋaaŋaay den a ndaaba Ii-isra’el we too a ƈooka a den, da ndal paam o maag olaa farna fa Pii-Haxirot, jasnoorna fa Baal-Sefon.

¹⁰Firawon fee kaa moƴ’u o matiidaa a den. Ii-isra’el we a mbiƈaqilooxa too a ƈooka Miimisira we a ndeefaniidaa a den. Ndak fo ndak, Ii-isra’el we a ndiida lool too a ƈufginooxa o Yaal oxe.

¹¹A laya a Moyiis ee: «Ndax kaa poy njegee Misira, bo ta tax o ɓisiid a in kam a koƥ-a-ƥor ale, ndax i nqonit teen? Xar taxu o sut a in Misira?

¹²I lay’aang Misira yee: ‹Xaƴi a in i mbaɗoox Miimisira we, yaam ten moƴu i nqonit kam a koƥ-a-ƥor ale!› »

¹³Moyiis a doona xeet fee yee: «Ba nu ndiid. Moofyo o mbiñ o leng. Xaye xan nu nga ne o Yaal oxe a watitkaa a nuun, yaam Miimisira wene nu nga’aa, xaye nu ngijkataa o nga a den.

¹⁴Xan o Yaal oxe a ñoxoran a nuun, kaa koy, naagyo tek.»

¹⁵O Yaal oxe a laya a Moyiis ee: «Xar taxu o falalooxaxam? Layi Ii-isra’el we da nqot a ƭat den.

¹⁶Wo o mat, yoɗi o loq of, letin o ɓay of took o maag ole, xaajin, ndax Ii-isra’el we a nqaañ teen, a ndak took beeru.

¹⁷Mi o mat, xam ŋajnoor Miimisira we, ndax da ndeefaniid a nuun kam o maag ole, too xam saŋik a Firawon fee fo xiixire we ten fop fo a sareet ake ten fo ŋaaŋaay we ten, ndax um lalit o ndam es.

¹⁸Neene, xan Miimisira we a and ee mi refu o Yaal oxe, ndax um lalit o ndam es took Firawon fee fo a sareet-xire ke ten fo ŋaaŋaay pis um.»

¹⁹Malaaka fee Roog ñaaƴoogna mbaambir Ii-isra’el we a riƈatooxa, a fodik a cinj den. Eel le ɗoxoogna a den oo, a riƈatooxa, a fodik a cinj den,

²⁰a rok a ndeer Miimisira we fo Ii-isra’el we. Eel leene kaa niɓaan’u no saax o leng ole, soo no saax o lakas ole ta fi a qoolaand, a xoolandaa o yeng ole fop. Neene, Miimisira we mbaag’ee o matiid Ii-isra’el we o yeng ole fop.

²¹Moyiis a letna o ɓay um took o maag olaa. Ndak fo ndak, o Yaal oxe a jumbandta o maag ole a und, ta hatiid no batand, a dititaa ditit maak o yeng ole fop. A xaaja poofi ke soo a weerin o maag ole.

²²Ii-isra’el we a nqaaña o maag ole, a ndak took beeru, too poofi ke kaa ndeeƭu nen tabax sipe na ñamaak den fo na janoon den.

²³Miimisira we fo pis ke Firawon fee fop fo a sareet ake ten fo ŋaaŋaay we ten a ndaaba Ii-isra’el we boo ndeer o maag olaa.

²⁴No mbuyukuun naa, o Yaal oxe a horooxa Miimisira we no ke xotitna no aal le boo no eel le too a jaxasranda a den.

²⁵A pala a caf ake na sareet ake den, a moƴ o ɗomand a ñaaƈ ale. Maaga, Miimisira we a layra yee: «Fat i ƈuf Ii-isra’el we, yaam o Yaal oxe kaa ñoxoranaa a den.»

²⁶Cinj kaaga, o Yaal oxe a laya a Moyiis ee: «Letni o ɓay of took o maag ole, ndax poofi ke a nomtoox ne da ndeeƭna, a muur Miimisira we fo a sareet den fo ŋaaŋaay den.»

²⁷Moyiis a letna o ɓay um took o maag ole. Farna fo mbeet naa, o maag ole a nomtooxa ne ta reeƭna. Miimisira we ƈufoogatna koy, a nqawra fo poofi ke, too o Yaal oxe a moƴa o riñ a den kam o maag ole.

²⁸Poofi ke a nomtooxa, a muur a sareet ake fo ŋaaŋaay we fo xiixire we Firawon fee fop ndaaboogna Ii-isra’el we no maag ole. O leng na den muc’ee.

²⁹Ii-isra’el we o mat, a nqaaña o maag olaa, a ndak took beeru, poofi ke a ndef nen tabax sipe na ñamaak den fo na janoon den.

³⁰Na bes faaga, o Yaal oxe a watu Ii-isra’el we na xa ƥay axe no Miimisira we, too den fop a nga’a xa tal axe no Miimisira we ngumboogna na tambando fee no maag ole.

³¹Maaga, Ii-isra’el we a nga’a katil fa maak fee o Yaal oxe a saŋkit’ina Miimisira we. A koom, xeet fee a saɗaru o Yaal oxe, a ngoolooxin, a ngooloox a Moyiis fee o paɗ um.