Read NQAARIIT NE ROOG A sutax ale 15 Bible Online

A sutax ale 15 - NQAARIIT NE ROOG bible

A sutax ale 15

¹Cinj yaa kaaga fop a xewna, Moyiis fo Ii-isra’el we a nqaanana o Yaal oxe a kim aleeke: «Kaam xaananaa o Yaal oxe, yaam a lalta yee ten kelfa’u fop. A jogola pis fo ŋaaŋaay den kam o maag olaa.

²O Yaal oxe refu doole es, oxe um gimanaa, ten oxe muclaxama. Kaam simatan, yaam ten refu Roog es. Kaam ee mexe niwan, yaam ten refu Roog fee na faap es.

³O Yaal oxe o qir o say oo, ten jare o ne o Yaal oxe.

⁴A jogola a sareet ake Firawon fee fo xiixire um kam o maag ole, xir say we ten a saŋkoox kam a Kal ale no xeet le.

⁵A ndiima kam juwaam fee ne gac a riimtaa, a yag-ee-yag ake a ƭuud a den boo salquƈ.

⁶O Yaal oxe, ndaw doole na ñamaak of! Kaam ee a ñamaak of a duguña o pañ oxe.

⁷No magnel katil of, maafaa fañ of, fuux of a raaɓ a den nen fiɗel kam fo gooñ.

⁸Qictaa poofi ke ñoot of, a yag-ee-yag ake a ngeenoox jiŋ nen tabax sipe, a yaand ake a saƭik koŋ kam juwaam fee.

⁹O pañ oxe kaa layoogu yee: ‹Xam daab a den, dam a den, lasit paax ke da njegna boo deyƭoox. Xam woos laƥ es, o ɓay es a dal took den.›

¹⁰O Yaal oxe, kaa o wuuɗit no xoor of, o maag ole a muur a den, da ndiim nen beteex kam foofi.

¹¹O Yaal oxe, an nandu fa wo ndeer roog ke! Kaam ee an fodu fa wo o tedel, wo fee saɗarnooxna, jarel o tagas, fi’aa comlaand!

¹²A ñamaak of rek yoɗo, lanq ke a ƭuud a den salquƈ.

¹³Yirmande of ɗoxto xeet feeke watoona, ɓakandit a den katil of no saax tedu of.

¹⁴Qeet ke a yegaan too owe sendaa, diid maak a rok Fiifilista waa.

¹⁵Maak we Edoom a njaqa, gelwaar we Mowaab a ndaprapnaa, Kaakanaan we a meeñaa.

¹⁶Xan caƭar fo diid maak a dam a den. Na pexey o ɓay o mayu katil of, xan a muum nen gac, boo yaa xeet of a waankaa, o Yaal oxe, boo yaa xeet fee jiloona a waankaa.

¹⁷O Yaal oxe, xan o ɓis a den, dalin a den took o joong olaa refna o jeg of. Kaam ee xan o ɓis a den no mbiñ onqaa jagandoona ngenand of, no faɗoorand olaa fi’oona, wo o Yaal oxe.

¹⁸Xan o Yaal oxe a maadooxaa bo na moos boo moos.»

¹⁹Ye pis ke Firawon fee fo a sareet ake ten fo ŋaaŋaay we ten fop a nqaañaa o maag ole, o Yaal oxe a dakniida poofi ke no maag ole, da muur a den. Ii-isra’el we o mat a nqaañ’a o maag ole, a ndak took beeru.

²⁰Miryam fee o cigeen Aaroon, refna o tuleer o tew, a saqa ñal no ɓay um, too rew waa fop a ndeefiidaan, oxuu refna fo ñal um soo a ndef no mbec.

²¹Miryam a jaaɓanooga a den ee: «Nqaananyo o Yaal oxe, yaam a lalta yee ten kelfa’u fop, a jogola pis fo ŋaaŋaay den kam o maag olaa.»

²²Cinj kaaga, Moyiis a hebla Ii-isra’el we da ndiƈatoox a Kal alaa no xeet le, a njagin farna fa koƥ-a-ƥor alaa ne’eena Suur. A ñaaƴa ñaal tadik kaa da nga’eerna foofi fo yerel.

²³A mbadiida Maara, ndaa mbaag’ee o yer foofi laaga, yaam kaa feƭar’u. Keene tax’u o mbiñ onqaaga a ne’el Maara.[7]

²⁴Xeet fee koy, kaa nqasanoogu a Moyiis, a layaa yee: «Ndi xar i yerkaa?»

²⁵Maaga, Moyiis a ƴufginooxa o Yaal oxe, too o Yaal oxe a jooxaan o loq, ndax ta deɓin no foofi le. Ye ta deɓuuna teen, foofi le a suptooxa too a felata. Maaga mat o Yaal oxe a cooxit’u xeet fee kebil ke fo bargal ke, a ɗeetloorit a den maaga.

²⁶Keeke mat a layu: «Nu nan-gilooxangaam, mi o Yaal oxe Roog nuun, mbi cofu mbaambir es, ngay kebil es, nanan bargal es, xawitkiim a nuun a cir ake xawtuuma Miimisira we, yaam mi refu o baawaadin nuun, mi o Yaal oxe.»

²⁷A mbadiida Eliim maa jeg’ina a cur xarɓaxay fo a cur a ƭak fo keec qarɓeen ɓetuu ƭik, too a ndala maaga, paam foofi laa.