Read NQAARIIT NE ROOG A sutax ale 16 Bible Online

A sutax ale 16 - NQAARIIT NE ROOG bible

A sutax ale 16

¹Cinj kaaga, xeet fee Isra’el fop a inoora Eliim. No ñaal xarɓaxay fo ñaal ƥetkandeer ne no nqool o ƭikandeer onqe, a cinj ye da sutooxna saax laa Misira, a mbadiida na koƥ-a-ƥor alaa Siin, refna ndeer Eliim fa Sinayi.

²Maaga, Ii-isra’el we fop a nqasana a Moyiis fa Aaroon na koƥ-a-ƥor alaa.

³Kaa layoogu yee: «Ke moƴan’ina a in, i patoor no ɓay no Yaal oxe kam saax le Misira, ye i ndeeraa a kaleera tegeƴ ake, ñaamaa puuru boo ngiñ. Kaa koy, kaa nu ƥisiid a in kam a koƥ-a-ƥor alene, ndax i nqonit teen fo nqeex, in fop.»

⁴O Yaal oxe a laya a Moyiis ee: «Xam deɓaniid a nuun mbuuru, ta hatiid na asamaan. Fat xeet fee a sutoox, a ngurdaa ñaal oo ñaal ke da soxla’kaa. Neene, xam ɗeetloox a den boo ga, ndax xan a ndeef kebil es, ndax nam.

⁵No ñaal ɓetuu fa lengandeer ne, fat a ngurid kaa deyna ƭik, ke da mbugko o ngurdaa ñaal oo ñaal, a njawin.»

⁶Moyiis fa Aaroon a laya Ii-isra’el we fop ee: «O yaar nu and ee o Yaal oxe fa xoox um sutu a nuun no saax laa Misira.

⁷O feet nqes xan nu nga o ndam onqe no Yaal oxe, yaam a nana o nqas onqe nu nqasanan, too andiim sax ke i ndefna bo nu nqasanaa a in.»

⁸Moyiis a dakooxahina o lay ee: «O yaar o Yaal oxe a ci a nuun a tegeƴ akaa nu ñaamna soo o feet nqes ta ci a nuun puuru kaa nu ñaamna boo ngiñ, yaam o Yaal oxe a nana o nqasan onqe nu nqasanuuna, too sax, kaa andiim ke i ndefna. Refee yee in nu nqasu, ndaa o Yaal oxe.»

⁹Moyiis a laya a Aaroon ee: «Layi xeet fee Isra’el fop da matiid mbaambir no Yaal oxe, yaam a nana o nqasax onqe den.»

¹⁰Ye Aaroon a maadna o layaa fo Ii-isra’el we, den fop a mbiƈaqilooxa farna fa koƥ-a-ƥor alaa, too o ndam onqe no Yaal oxe a feeña kam eel le.

¹¹O Yaal oxe a xoya a Moyiis, a layin ee:

¹²«Nanaam o nqasax onqe no Ii-isra’el we. Layi a den ee: ‹Na kid-a-caɓru ke, xan nu ñaam a tegeƴ, soo o feet nqes nu ñaam puuru boo ngiñ. Neene nu anditkaa yee mi refu o Yaal oxe Roog nuun.› »

¹³No yaar olaa, a ceɓel a mayu a mbudooxiida, a ndong kam saŋe ne, soo no nqes naa a jeg’a a liim me widna saŋe ne fop.

¹⁴Ye a liim alaaga a watna, a jeg’a took lanq ke na koƥ-a-ƥor alaa kaa fi’na nen ƈaar, a yelef bo.

¹⁵Ii-isra’el we fop a ƭeetooga, a laamtiraa yee: «Ndi xar kene?», yaam and’ee ke keene a refna. Moyiis a doona a den ee: «Mbuuru ne o Yaal oxe a ci’na a nuun oo, ndax nu ñaamin.

¹⁶Keeke refu ke o Yaal oxe a heblitna: ‹Fat o kiin oo kiin a hurid teen kaa giñuuna. Oxuu refna fat a hurdan teen we ta fogitna ƭiif, xoox-oo-xoox o nqandi nqaa ne’eena o omeer too a yipaa ngap xa liitar xa nahaq.› »

¹⁷Ii-isra’el we a mbi’a naaga. Leng we a ngurda mayu, lakas we a ngurid o ndik.

¹⁸Cinj kaaga, a eedaan fo o nqandi. Oxe hurid’ina mayu, hupiɗ’ee, too oxe hurid’ina o ndik, dangiɗ’ee. Oxuu refna a jeg’a kaa giñuuna.

¹⁹Moyiis a layahina a den ee: «Ba o leng a fe’in teen tig.»

²⁰A mbaña o nan-giloox a Moyiis, too a jega na den waa mbe’inna, ndaa a gusaxa boo a duñaa. Moyiis a fuuxan’a wiin waaga lool.

²¹No ke xotitna a koom, nqes nuu fad’ina oxuu refna kaa hurdoogu kaa giñuuna. Boo a sumaan ale no njeeƈ ne gar’ina, yoq ke no ke hurid’aandeena a naayooga.

²²No ñaal ɓetuu fa lengandeer ne a ngurid’a no ñaamel keene kaa deyna ƭik ke da ngurdoogna ñaal oo ñaal, oxuu refna fo nqandi fo ƭik. Maak waa fop a ngara a yegnin a Moyiis.

²³Maaga, Moyiis a laya a den ee: «Keene koy, o Yaal oxe heblun. O feet refu bes fee na ñootnax ale kesaneena o Yaal oxe. Fat nu njuɗ ke nu mbarna o njuɗ, ke nu mbarna o mbaƴin, nu mbaƴnin. Nu ñaamangaa bo ta yoq, fat nu ngeekin boo Roog a feed.»

²⁴A mbe’naan ne Moyiis a heblit’uuna, ndaa tax’ee ta duñ too gusax’ee itam.

²⁵Moyiis a laya yee: «Ñaameenoo xaye. Xaye refu bes a ñootnax ale no Yaal oxe, too nu soƥkee dara na koƥ alaa.

²⁶Fat nu ngurdaa teen boo ñaal ɓetuu fa leng, ndaa no ñaal ɓetuu ƭikandeer ne refna bes fee na ñootnax ale, bugkee o jegaa tus.»

²⁷Yaqanee koy, leng-leng na xeet faa a sutooxa, a ngurdik no ñaal ɓetuu ƭikandeer naa, ndaa soƥeeyo maaga tus.

²⁸Maaga, o Yaal oxe a laya a Moyiis ee: «Kaa nu mbugko ƭapaa kebil ke mi fo bargal ke mi boo a mban?

²⁹Andyo kene: Mi o Yaal oxe ci’u a nuun bes fee na ñootnax ale. Ten taxu um ci’aa a nuun no ñaal ɓetuu fa lengandeer nuu refna ke nu mbarna o ñaam no ñaal ƭik. No ñaal ɓetuu ƭikandeer ne, ba o leng a sutoox, ndaa fat a day me ta genaa.»

³⁰No ñaal ɓetuu ƭikandeer naaga, xeet fee a ñootnooxa.

³¹Ii-isra’el we a ne’a ñaamel kaaga maan. Kaa nandtoogu xa kak ndaxar naa ne’eena koryaandar. Kaa ranig’u, a safaa nen o gaf suum.

³²Took kaaga, Moyiis a laya yee: «Keeke o Yaal oxe a heblu: ‹Njangyo o nqandi o leng, yipin maan bo ta may, ngeekanin xa taan nuun, ndax da nga mbuuru ne ñaamnooruuma a nuun kam a koƥ-a-ƥor ale, a cinj ye sutuuma a nuun saax laa Misira.› »

³³Maaga, Moyiis a laya a Aaroon ee: «Xoti o gook, yip teen maan faa mayna o nqandi, diƈin mbaambir no Yaal oxe, ndax ta geekanel xa taan nuun.»

³⁴Aaroon a diƈaan kam arka ne no ngiɓoor ne mbaambir a alfa ƥil ake kebil ke a mbind’eena, ne o Yaal oxe a heblit’uuna a Moyiis, ndax ta geekel maaga.

³⁵Ii-isra’el we kaa ñaamoogu maan boo xa kiid qarɓeen nahik, boo neen a mbadiidu no ŋat olaa no saax laa Kanaan genoogeena.

³⁶O nqandi nqeene ne’eena o omeer koy, kaa ref a seek xarɓaxayandeer na qandi le ne’eena eefa.[8]