Read NQAARIIT NE ROOG A sutax ale 18 Bible Online

A sutax ale 18 - NQAARIIT NE ROOG bible

A sutax ale 18

¹Yetro fee o seemir Moyiis too a ref o saasadax kam Majan, a yega fop ke Roog a fi’an’ina a Moyiis fa Isra’el fee xeet um fo ne o Yaal oxe a sutit’ina a den Misira.

²Yetro a yoontiid’a a Sipora fee o ƥeem, reeƭna o tew Moyiis, Moyiis a hebil’ina ta moofik no mbind den.

³A yoontiid’a itam xa ƥiy xa ƭaq axe Moyiis. O leng oxe Geersom a ne’’e, yaam Moyiis kaa lay’u yee: «O kenar refum no saax jan.»

⁴O lakas oxe koy, Eliyeseer[11] a ne’’e, yaam kaa lay’u yee: «Roog fee na faap es a dimle’axam too a muclaxam no laƥ ne Firawon fee.»

⁵Yetro fee o seemir Moyiis fo xa ƥiy axe fo o tew oxe Moyiis fop a ngara maa Moyiis na koƥ-a-ƥor alaa, na caf alaa no joong olaa Roog, ta dal’ina.

⁶A lulta a Moyiis, ndax ta layel kene: «Mi Yetro fee o seemir of, garaam me wo, yoontiid o teef fo xa ƥiy xa ƭaq axe nuun.»

⁷Maaga, Moyiis a sutooxa, a xetook o seemir um, a gooknooxin soo a foonin. A laamtira fo ɓaal soo a ndokkaa no ƭiif naa Moyiis.

⁸Moyiis a wetandooxa o seemir um fop ke o Yaal oxe a fi’na a Firawon fee fo Miimisira we yaam Isra’el. A wetandooxaan itam coono ke ndaloogna a den na ƭat ale fo ne o Yaal oxe a watit’ina a den.

⁹Yetro a felakinooxa lool no paax ke o Yaal oxe a fi’an’ina xeet fee Isra’el, ye ta watna a den na xa ƥay axe no Miimisira we.

¹⁰Maaga, Yetro a laya yee: «Yaasam o Yaal oxe a simatel, ten oxe watna a nuun na xa ƥay axe no Miimisira we fo no ɓay Firawon fee, a wat xeet um na sañ-sañ fee no Miimisira we!

¹¹Ndiiki koy, andataam ee o Yaal oxe moƴu magin roog ke fop, yaam o ɓay um a dala took Miimisira we ye da toroxandaa Ii-isra’el we.»

¹²Yetro fee o seemir Moyiis a ɓoxota a Roog sadax fa ndoxel fo sadax camsa’oor. Aaroon fo maak we Isra’el fop a ñaamiida teen fo o seemir Moyiis, mbaambir Roog.

¹³No feet olaa, Moyiis a moofa, ndax ta hate we ndaawir’ina na xeet fee, too xeet fee a ngeenooxa mbaambir um no ke xotitna no nqes naa boo no kirand naa.

¹⁴O seemir Moyiis a ga’a fop ke Moyiis a fi’anoogna xeet fee too a laamtaan ee: «Xar kene refu na adna, o fi’anan xeet fee? Xar taxu o moof wo doŋ, xeet fa muum a ndeerong, nqes naa boo njeeƈ a mud nene?»

¹⁵Moyiis a doona o seemir um ee: «Xeet fee kaa ngaraa me mi, ndax da laamit o as ole Roog.

¹⁶A ndaawrangaa, kaa ngaraa me mi, um ref oxe na xelooxaa a den soo andnoor a den bargal ke Roog fo kebil ke ten.»

¹⁷O seemir Moyiis a layaan ee: «Ne o fi’taa, faaxee tus.

¹⁸Xan o lor a xoox of, lor xeet fee ndefna fa wo, yaam ke roxondooxoona kaa meɗ na wo, too wo soom hatlino.

¹⁹Ndiiki koy, nan-gilooxi o ñuxur es. Xam asong. Yaasam Roog a ref fa wo! Fat o ref o ndok-a-ndeer onqe ndeer xeet fee fa Roog, ɓoxotaa a Roog taawir den.

²⁰Jangni a den bargal ke fo kebil ke Roog, lal a den itam a ƭat ale da mbarna o ndeef fo ke da mbarna o mbi.

²¹Jili ndeer xeet fee fop wiin deyu waa saɗarna a Roog, a saɗ ndigil, a mbañ oxaa gerna a den. No wiin juni wuu ndefna fo no wiin teemeed wuu ndefna fo no wiin qarɓeen ƥetik wuu ndefna fo no wiin xarɓaxay wuu ndefna, dodi o leng no weene jiloona, ta adooxan a den.

²²Fat a ngate’aa bes fuu refna we na ndaawraa na xeet fee. Fat a ƥoxotang ke moƴna ɗom o hate’el, ke jaakeerna, da ngate’anan a qoox den. Waaji ke roxondooxoona, da saqtong o ten.

²³O fi’angaa keene, too Roog a heblong o ten, lorooxkiro. Neene, xan fop a njofoor, a nqaad na jam.»

²⁴Moyiis a nan-gilooxa o ñuxur no seemir um too a fi’a fop ke ta lay’uuna.

²⁵Maaga, Moyiis a jila wiin deyu, a dod a den da adooxan xeet fee: wiin juni wuu ndefna fo o aa-adax den, wiin teemeed wuu ndefna fo o aa-adax den, wiin qarɓeen ƥetik wuu ndefna fo o aa-adax den, soo wiin xarɓaxay wuu ndefna fo o aa-adax den.

²⁶Bes fuu refna, wiin weene kaa ngate’oogu we ndaawroogna na xeet fee, a ƥoxotaa a Moyiis ke moƴ’ina ɗom o hate’el, ke jaakeerna, da ngate’anan a qoox den.

²⁷Cinj kaaga, Moyiis a welta a Yetro fee o seemir um, ta xaad no saax den.