Read NQAARIIT NE ROOG A sutax ale 19 Bible Online

A sutax ale 19 - NQAARIIT NE ROOG bible

A sutax ale 19

¹No nqool o ndadkandeer onqe a cinj a sutax ale den Misira, Ii-isra’el we a mbadiidu na koƥ-a-ƥor alaa Sinayi.

²Refidiim a inoor’u soo a mbadiidkaa na koƥ-a-ƥor alaa Sinayi too a ndala maaga mbaambir o joong olaa.

³Moyiis a ŋaaya no joong olaa, maa Roog. Took-ee-took faa, o Yaal oxe a xoya a Moyiis, a layin ee: «Fat o daawnanaam xa taan axe Yakoob, ndefna Ii-isra’el we kene:

⁴‹Nu nga’a ke fi’uuma Miimisira we, mi o Yaal oxe, fo ne waxoortuuma a nuun boo me mi ne a canjiik a waxoortaa xa ƥeem.

⁵Ndiiki koy, boo nu nan-gilooxna o ñuxur es, ngay ngiɓoor es fa nuun, halal es tigi nu ndefkaa a ndeer qeet ke fop, ke jeguuma lanq ke fop oo.

⁶Nuun o mat na ndefkaa xeet fa tedu no saasadax waa na ndagooxaxam.› Layanaam keene Ii-isra’el we.»

⁷Moyiis a nomtooxiida, a xoy maak we na xeet fee, a lay a den fop ke o Yaal oxe a hebil’uuna.

⁸Xeet faa fop naa da mbodeena a ndoona yee: «Xan i mbi fop ke o Yaal oxe a layna.» Moyiis a wetandooka o Yaal oxe ke xeet faa a ndoon’ina.

⁹Maaga, o Yaal oxe a laya a Moyiis ee: «Xam gar me wo no eel niɓu, ndax xeet fee a nan, yaa um bugko layaa fa wo, soo a ngoolooxong itam boo kili.» Moyiis a wetandooxa o Yaal oxe ke xeet faa a lay’ina.

¹⁰O Yaal oxe a dakooxa o lay a Moyiis ee: «Nomtooxi na xeet faa, tedland a den xaye fo o feet. Fat a ndap teen tikoorik den.

¹¹Boo ñaal ndadkandeer ne a fadiidaa, fat a soƥ da ƈut, yaam taaga um fudooxiidkaa took o joong ole Sinayi, too xeet fee fop xan a nga’aam.

¹²Fiisani xeet fee me da mbarna o mbod, lay a den da mbootoox o ŋaay no joong ole mbaat da nduq a caf ale. Oxuu duqna o joong ole, fat a warel.

¹³Oxe na duqkan koy, baa o ɓay a dal took um, ndaa fat a wartel a kac mbaat ta roomel a kas. Ndeer o kiin oxaa yoo, njegel naa yoo, ba nu nqaƴin ta ñoow. Boo a luuƥ ale a jibna koy, fat da matiid o joong ole.»

¹⁴Moyiis a fudooxiidahina o joong ole, a gar na xeet fee, a tedland a den soo a dapnoor a den tikoorik den.

¹⁵Cinj kaaga, a laya xeet faa yee: «Boo ñaal ndadkandeer ne a fadiidaa, fat a soƥ nu ƈut a cagandax. Ba o leng a fog fo o teem njong.»

¹⁶No nqes naa, no ñaal ndadkandeer naa, a jeg’a ƭuuɗ fo xa kiiñaand, too eel niɓu a fudooxa took o joong olaa. A luuƥ a jiba a maak, too xeet faa fop ndeeƭna kam saŋe naa, a ndiid’a boo a sendaa.

¹⁷Moyiis a suta xeet faa kam saŋe naa, da nqetik fa Roog. Yaa da ngarna boo a mbaambnoox a caf ale no joong ole, a ndaya maaga.

¹⁸O joong olaa Sinayi kaa suunoogu naa ta fodeena fop, yaam o Yaal oxe kaa fudoox’u taaga kam fiɗel. Fo suun olaaga kaa yoɗoortoogu nen fo suun ndoxand, too o joong olaa fop kaa sendoogu fa doole.

¹⁹Fangax le na luuƥ ale kaa moƴ’u o ɓaatooxaa rek. Moyiis a lay’angaa, Roog a doonoogaan a maak.

²⁰O Yaal oxe a fudooxa took o joong olaa Sinayi, a xoyit a Moyiis maaga, too Moyiis a dabaan.

²¹O Yaal oxe a laya a Moyiis ee: «Ñofi fudoox, kand xeet fee, yaam ndik da ngar me mi, a nga’aam, too yaaga xan mayu na den a saŋkoox.

²²Saasadax we mbaagaxama o matiid sax, a mbara o tedland a qoox den, mbaat xam saŋik a den.»

²³Moyiis a laya o Yaal oxe yee: «Xeet fee mbaagkee o ŋaayiid no joong ole Sinayi, yaam wo kandu a in, ye layaxamoona um fiisoox o joong ole, tedlandin.»

²⁴O Yaal oxe a doonaan ee: «Fudooki, too bo o ŋaayiidaa, fat o yooniid fa Aaroon, ndaa baa saasadax we fa xeet fee a mbañooxiid me mi, mbaat xam saŋik a den.»

²⁵Maaga, Moyiis a daba xeet faa, a lay a den kaaga.