Read NQAARIIT NE ROOG A sutax ale 2 Bible Online

A sutax ale 2 - NQAARIIT NE ROOG bible

A sutax ale 2

¹O fes na carind ale Lewi a dolin’a o ndaan Lewi.

²O tew oxaaga a roka o fud too a ñoota o ƥiy o ngoor. A ga’a yee o ƥiy onqe a mosa, too a ɗasnaan boo a qool a tadak.

³Ye ta waagateerna o ɗasin o ƥiy onqe, a waaƭa a cenjel, a laartin godorong fo tax, a ɓek teen o ƥiy onqe soo a xaƴin ndeer xeet le, ta rayaa na peepeer ale no xuluɓ ole Niil.

⁴Maaga, o cigeen oxe no ndeɓandoong onqe a foda koƭu, a ɗeetaa ke na xewkaa no ten.

⁵O ƥiy o ndew onqe Firawon fee a gara no xuluɓ ole, ndax ta ɓogoox, yoon we ten o mat a ndeefan a ƥeeraamb ale no xuluɓ ole. A ƴooka a cenjel kam xeet le too a lula o ceefeer um, ta xotkin.

⁶A wetaan too a ga’a teen o nqeq o ngoor onqaa na loolaa. O ƥeenqe Firawon fee a yirmaan, a lay ee: «O ƥiy no Hebre we yoo.»

⁷Maaga, o cigeen oxe no ndeɓandoong onqe a laya o ƥeenqe Firawon fee yee: «Ndax bugaa um waaƭankong o ƥasil no rew waa no Hebre waa, ndax ta numnanang o ndeɓandoong onqe?»

⁸O ƥeenqe Firawon fee a doonaan ee: «Ii, reti!» Maaga, o ƥiy o ndoog onqe a dalfooxa o ret, a xoyik a ya fee no ndeɓandoong onqe.

⁹Ye yaay fee a fadiidna, o ƥeenqe Firawon fee a layaan ee: «Ɓisi o ndeɓandoong onqene, numnanaxam o ten, too xam rabdong.» O tew oxe a janga o ndeɓandoong onqe soo a numnan.

¹⁰Ye ta roɓna, a ɓisaan maa no ƥeenqe Firawon fee. Oxeene a fi’aan nen o ƥeem too a ne’aan Moyiis[1], yaam kaa lay’u yee: «Na foofi gistanum.»

¹¹Ye Moyiis a retna koy boo a maak, a ɗeetka fog um too a ga’a calel ƭomu ke da mbi’oogna. Maaga, a ga’a o Miimisira xaa xawoogna o Hebre xaa ta fogitna.

¹²A ɗeeta o saax oo saax, too ye ta ga’na yee o leng matee maaga, a wara o Miimisira xe soo a uupin.

¹³No feet olaa, a sutooxa, a ga Hebre ɗik waa na nqasraa, too a laya oxe tooñ’ina yee: «Xar taxu o xawaa o kend of?»

¹⁴O koor oxaaga a doonaan ee: «An dodong kelfa bo o hate’aa a in? Ndax kaa o bugaam o war ne wartoona o Miimisira xe?» Moyiis a diida too a laya taa no yiif um ee: «Ga’na koy, tige kaa weej.»

¹⁵Firawon fee itam a yega ke xew’ina too a waaƭooga maa ta waritna a Moyiis. Kaa koy, Moyiis a mo’a a kid Firawon fee soo a raay no saax laa Majan, a haktik paam a ngas.

¹⁶A jeg’a koy no saax laaga o saasadax oxaa jeg’ina xa ƥiy xa tew ɓetaa ƭaq. Xa ƥiy axeene a ƈeewiida palka ke, ndax da yerin ged le faap den.

¹⁷Ɓaatnee dara, gaynaak we a mbadiida, a ndax a den. Maaga, Moyiis a inooxa, a sedan a den soo a yernan a den cegel ke.

¹⁸Ye da ngatna koy, Rewel fee faap den, ne’eena ne Yetro, a laamta a den ee: «Xar taxu nu teel o ngat xaye koy?»

¹⁹A ndoonaan ee: «O Miimisira watu a in na xa ƥay axe no gaynaak we, a ƴeewan a in. Ten yernanu a in ged le sax.»

²⁰Maaga, a laya xa ƥeem ee: «Taa ten koy? Xar taxu nu nqaƴ o kiin oxaaga? Aca, ndetyo nqoykin, ta gar a ñaam!»

²¹Moyiis a genata no mbind naa no koor oxaaga. Oxeene a ci’aan o ƥeem o ndew onqaa ne’eena Sipora, ta ref o teem.

²²O tew oxe a rima o ƥiy o ngoor, too Moyiis a ne’aan Geersom[2], yaam kaa lay’u yee: «O kenar refum no saax jan.»

²³Yaa kaaga a faafna boo a miñ, o maad oxe Misira a saaya, too Ii-isra’el we kaa iinoogahinu no mbaƭ naa soo a mbuuqaa. Xa buuq axeene, mbaƭ naa garit’u a den, too Roog a nana a den.

²⁴Ye Roog a nanna xa iin axe den, a wetandooxa ngiɓoor ne ten fa Abraham fa Isaak fa Yakoob.

²⁵Roog a ga’a Ii-isra’el we too a anda coono den.