Read NQAARIIT NE ROOG A sutax ale 20 Bible Online

A sutax ale 20 - NQAARIIT NE ROOG bible

A sutax ale 20

¹Keeke ndefu xa ƭelem axe Roog a layna fop:

²«Mi refu o Yaal oxe Roog of, suttoonga no saax le Misira, me reeƭoona o paɗ.

³Faɗooxkiro a roog fa lakas faa refeerna mi.

⁴Fi’kiro nitaal mbaat samandaal naa o faɗooxaa nen a Roog of, ta ref ke na asamaan fee mbaat took lanq ke mbaat kam poofi ke ndefna ɗuga lanq ke.

⁵Gungkiro mbaambir den too faɗooxkiro a den, yaam mi o Yaal oxe Roog of, Roog fa naalu refum, faa na rabdinooxaa njofaƭar ne no paap ke took xa ƥiy den boo no suk ndadkandeer mbaat no nahkandeer naa no we sibaxama.

⁶Kaa koy, naagaam o yirmaa boo no wiin cuni-cuni we mbexaxama, a ngayaa kebil es.

⁷Ŋasitkiro gon le no Yaal oxe Roog of, yaam o Yaal oxe ñakkee o xaw oxe na ŋastaa gon um.

⁸Wetandooxi bes fee na ñootnax ale ndax o tedlandin.

⁹Fat o jalaa ñaal ɓetuu fa leng, fi’aa teen calel of fop.

¹⁰Ñaal ɓetuu ƭikandeer ne koy, bes a ñootnax es oo, mi o Yaal oxe Roog of. Wariro jal teen tus, wo fo o ƥeef o ngoor mbaat o ƥeef o ndew mbaat surga of mbaat o mbindaan of mbaat njegel of mbaat o gataakoon ole refna no mbind of,

¹¹yaam no ñaal ɓetuu fa leng sakum a asamaan fo lanq fo o maag ole fo fop ke refna teen, mi o Yaal oxe, soo ñootnoox no ñaal ɓetuu ƭikandeer ne. Ten taxu, mi o Yaal oxe, um barke bes fee na ñootnax ale, tedlandin.

¹²Niwi a faap of fa ya of, ndax o xuuɗ kam saax le um ci’kang, mi o Yaal oxe Roog of.

¹³Warkiro o kiin.

¹⁵Guuɗkiro.

¹⁶Seede’ankiro o kend of na xa maaƥ.

¹⁷Yaawkiro mbind no kend of. Yaawkiro o tew no kend of mbaat surga um mbaat o mbindaan um mbaat qoox um mbaat o faam um mbaat tig lakas kaa ta jegna.»

¹⁸Xeet faa fop a nanooga ƭuuɗ ke fo a luuƥ ale njiboogna. A nga’ooga itam xa kiiñaand axe fo o joong ole suunoogna. Kaaga a tax’a xeet fee fop a sendaa, a mbod koƭu.

¹⁹A laya a Moyiis ee: «Layi fa in wo fa xoox of, too yaaga xan i nan-giloox. Kaa koy, baa Roog a lay fa in muk, yaam ndik i nqon.»

²⁰Moyiis a doona xeet fee yee: «Ba nu ndiid, yaam Roog kaa ɗeetlooxiid a nuun, ndax nu saɗarin, too itam, ndax nu mbakaadkee.»

²¹Xeet fee kaa mbod’u koƭu, ndaa Moyiis o mat kaa matik’u eel niɓu le Roog a reeƭna.

²²O Yaal oxe a laya a Moyiis ta daawnanin Ii-isra’el we keeke: «Nu nga’a yee na asamaan fodum, layaa fa nuun.

²³Ba nu nqawin roog xaaliis mbaat roog wurus kaa nu mbaɗooxaa paam es. Ba nu nqawin a den muk!

²⁴Fat nu maxanaam o sadaxand ƭok, maa nu ƥoxottaxam sadax toxel ke nuun fo sadax camsa’oor ke nuun fo paal ke nuun fo pambe ke nuun fo qoox ke nuun. Muu taxuuma gon es a wetandooxeel, xam gar me nuun, barke a nuun.

²⁵Nu mbugangaam o maxan o sadaxand a ƥil, baa ref fo a ƥil a sexe, yaam nu sexangaa ɓil le, xan nu maasandin.

²⁶Ba o sadaxand ole a jeg ŋaayir, yaam ndik cer ƥor no xe na ŋaaykaa teen a mbeeñ.»