Read NQAARIIT NE ROOG A sutax ale 21 Bible Online

A sutax ale 21 - NQAARIIT NE ROOG bible

A sutax ale 21

¹O Yaal oxe a ɓaata teen ee: «Keeke ndefu bargal ke o cooxkaa Ii-isra’el we:

²O leng na nuun a jikangaa o pog o Hebre, a fi’in o paɗ, fat oxeene a faɗooxan boo xa kiid ɓetaa fo leng. No hiid o ɓetuu ɗikandeer olaa koy, a waaga o woktoox na jam too saqankee o yaal um haq fa leng.

³A soƥangaa yee oxaa dolnir’afulaandeena yoo, ye ta sogna o ref o paɗ, ten soom na yoonkaa, yaa ta retaa, ta soƥ koy ee oxaa dolnir’eena yoo, boo ta retaa, fat a ɓis o teem.

⁴A soƥangaa koy ee o yaal um ci’un o tew, soo o tew oxe a jeg xa ƥiy xa koor mbaat xa tew, o yaal um na jegkaa o tew oxe fo xa ƥiy axe, soo o koor oxe a ret ten doŋ.

⁵A soƥangaa koy o mat ee o koor oxe kaa lay ee: ‹Fexaam o yaal es fo o tees fo xa ƥees too bugiim o goƭ a den, ndax um jeg a xoox es›,

⁶xan Roog a ref o seede, o yaal um a matandiidin no begax a ndok mbaat na tayil, a yul nof ne no paɗ oxeene fo a tufir. Neene, xan a refat o paɗ um boo faw.

⁷Boo o koor a jikooxna o ƥeem o ndew, ndax ta ref o paɗ, oxeene woktooxkee ne faɗ goor we a mboktooraa.

⁸Boo o yaal um a jikuuna, ndax ta fi’in o teem, a retangaa boo bugatiran, a wara o xaƴ a faap no ƥiy o ndew onqeene ta wat o ƥeem. Wariran o jikoox a ngenareem, yaa ta waasuuna.

⁹A jikanangaan o ƥeem o ngoor, a wara o ɓoxot o ƥiy o ndew onqeene wareef um.

¹⁰O koor a gilgangaa o tew o lakas, waree o waaj dara no ke warna ndeer um fo o tew o eetaand oxe. O ñoow a waraan fo ten, ñirax a warin fo ten too a wara o fogaa fo ten njong.

¹¹Boo ta fi’aneeruuna tadik keene, o tew oxe a waaga o tas a las um too rabidkee halal fa leng.»

¹²«Oxuu na xawaa o kiin boo a warin, kaa warel o war.

¹³A refangee kaa yuuɓeena, ndax a ref taamaala, oxe garitna taamaala fee a waaga o jaɓnoox no mbiñ onqe um toxkaa a nuun.

¹⁴Oxuu yuuɓna o warit o kend um nof nqooƭ koy, boo a fi’in, a jaɓnooxangaa no sadaxand ole mi sax, fat a baftel maaga, a warel.

¹⁵Oxuu xawna a faap um mbaat a ya um, kaa warel o war.

¹⁶Oxuu guuɗna o kiin boo a jikooxin mbaat ta geekin, kaa warel o war.

¹⁷Oxuu salooxna a faap um mbaat a ya um, kaa warel o war.»

¹⁸«Boo ta jegna goor waa ndaawirna boo o leng oxe a gaañit o lakas oxe ɓil mbaat o kamax, too oxe fi’eena keene xonee, ndax a jongoox,

¹⁹a inooxatinangaa boo a ñaaƴtaa o loq tafil, oxe gaañna, maalkaand. Kaa watooxkaa rek na congax ale oxeene a jongooxna soo a topatooxin bo ta wod.

²⁰Oxuu jangna o loq, a wartin o paɗ um o koor mbaat o tew, fat a xawel.

²¹O qiju xe a ñoowangaa ndeer meene fo ñaal leng mbaat ñaal ƭik, o yaal um xawkaand, yaam ten jeg’un.

²²Boo ta jegna waa na ndaawraa boo a mbaɓ teen o tew o bodeer, o fud um a watangaa no keene, too lakas damiran, fat wiin weene a maalel, a ndabid ke o kor no tew oxe fo o kaahate xe a laackaa a den.

²³Taamaala a jegtangaa teen koy, fat oxe tooñna a damel. O ñis na bugko rabdaa o ñis,

²⁴a ngid a rabdaa a ngid, ñiiñ a rabdaa ñiiñ, o ɓay a rabdaa o ɓay, a caf a rabdaa a caf,

²⁵ndox a rabdaa ndox, ngaañ a rabdaa ngaañ, mbolat a rabdaa mbolat.

²⁶Oxuu xawna o paɗ um o koor mbaat o tew, boo a yul a ngid um, fat a xaƴin ta jeg a xoox um, ta ref ndabid a ngid um.

²⁷A ɓolangaa ñiiñ no paɗ um o koor mbaat o tew, fat a xaƴin ta jeg a xoox um, ta ref ndabid ñiiñ um.

²⁸Boo ta jegna nqoox naa dibna o koor mbaat o tew bo ta xon, fat nqoox ne a roomeel a kac boo yaa ta xonkaa. A tegeƴ ake koy, mbaraand o ñaam, too o yaal nqoox ne maalkaand.

²⁹A soƥangaa koy ee nqoox ne kaa mer’u o dibaa, o yaal um a raagooxel, too dekiran, njegel ne a warangaa o kiin, fat a wartel a kac, soo o yaal um oo a warel.

³⁰Boo ta layeena koy ee o yaal um a waaga o rabid a su’nit, ndax ta wat o ñis um, fat a rabid ke ta laackeel, ta ref a bateer um.

³¹Boo nqoox ne a dibna o ndeɓandoong o ngoor mbaat o ndew, leng kut ke a fi’keel.

³²Boo ta soƥna koy ee nqoox ne o paɗ o koor mbaat o tew a waru, fat o yaal njegel ne a rabid o yaal o dal ole xa monjong qarɓeen tadik xaaliis fa nqoolu, soo nqoox ne a wartel a kac.

³³Boo ta jegna oxaa wetna a ngas um too wegiran mbaat ta waqin too afniran, boo naak mbaat o faam a yenna teen,

³⁴o yaal a ngas ale a wara o rabid o yaal njegel ne xaaliis faa waagna o sof njegel ne. Kaa koy, oxeene na jegkataa o fimb ole no njegel ne.

³⁵Boo nqoox no kiin a ñoxorna fo nqoox no kiin o lakas boo a warin, fat nqoox ne maadna o ñoowaa a jikooxel, yaal qoox ƭik ke a nqaajir xaaliis fee fo nqoox nqonu ne.

³⁶A soƥangaa koy ee nqoox ne kaa mer’u o dibaa, too o yaal um naagiran o dekaa, fat oxeene a sof nqoox ne xonna fo nqoox ñoow. Kaa koy, ten na jegkataa o fimb ole no njegel ne.»

³⁷«Boo o kiin a guuɗna nqoox mbaat mbaal mbaat fambe soo a xirsin mbaat ta jikooxin, fat a cooxit qoox ƥetik no nqoox neene mbaat cegel nahik no njegel neene.