Read NQAARIIT NE ROOG A sutax ale 22 Bible Online

A sutax ale 22 - NQAARIIT NE ROOG bible

A sutax ale 22

¹Boo o kiin a guuɗaa boo a betel, a xawange boo a xon, a ƭat a leng ŋaayee oxe waruuna.

²Kaa koy, boo keene a xewna, a jopir njeeƈ ne a wat, a bar oo, too a ƭat a ŋaayaan. O kuuɗ oxe jegeerna ke ta rabditna koy, fat a jikooxel, a refik o paɗ.

³A soƥangaa koy ee njegel ne ta guuɗna, ta ref nqoox mbaat o faam mbaat mbaal mbaat fambe, kaa soƥel a ñoowaa no mbind ne no kuuɗ oxe, fat oxeene kiin a nomit njegel neene soo a doon teen lakas.»

⁴«Boo o kiin a xaƴna cegel um bo da mbiitin o qol mbaat a ƭing taxar biiñ no kend um, fat a jang ke moƴna faax no ke o qol um mbaat a ƭing taxar biiñ um a watna, a rabditin.

⁵Boo o kiin a doxaa kañ kaa njegna kiƈ boo fiɗel le a fil no saxade le mbaat no sulit le mbaat no col ke, fat ten fee fi’na o ñaay ole a rabid o yaal o qol ole.

⁶Boo o kiin a doxinna o kend um xaaliis mbaat kaa jegna o njiriiñ, soo ta guuɗtel no mbind no xeene, fat o kuuɗ oxe a nomit ke ta guuɗna boo ƭik, yaa ta soƥna yee a ga’e.

⁷Boo o kuuɗ oxe a ga’aandeena, o yaal mbind ne a wara o daaɓoox a ndeer um fa Roog ee duqee tig no kend um.

⁸A jegangaa nqoox mbaat o faam mbaat mbaal mbaat fambe mbaat ndoki mbaat tigaa guuɗeena, o yaal um a ga’angaan fo o kend um boo a lay ee: ‹Keeke tig es oo!›, fat oxuu refna a lay a ndeer um fa Roog, too oxe Roog a jambkaa, fat a nomit ke ta guuɗna boo ƭik.

⁹A soƥangaa yee kaa jeg o kiin oxaa doxinna o kend um o faam mbaat nqoox mbaat mbaal mbaat fambe mbaat njegel lakas nuu ta waagna o ref, soo njegel neene a xon mbaat ta gaañoox mbaat guuɗ we a ngar, a ƥisin, too o leng yegiran,

¹⁰oxe doxneena a wara o daaɓoox a ndeer um fa Roog ee rokee no tig no lakas oxe. O yaal njegel ne a wara o jaɓ a taaƥax ale, too yaaga o kend oxe rabidkee tig.

¹¹A soƥangaa koy ee kaa saganit njegel ne bo ta guuɗtel no mbind um, a wara o rabid o yaal um.

¹²Boo ƥaaɓaan a warna njegel ne koy, o kiin oxe a wara o ɓisiid no yoqatin ke nen o anddiloor, too yaaga, no kaa xotitna no kaaga, rabidkee tus.

¹³A soƥangaa koy ee o kiin kaa luɓ o kend um njegel, soo njegel neene a gaañoox mbaat ta xon, too o yaal um maadiran, oxe luɓuuna a waraan o rabid.

¹⁴Kaa koy, a soƥangaa yee o yaal um a maadaan, oxe luɓuuna wariran o rabid. Ta soƥ koy ee njegel ne kaa gaaɓnit’el, ke ta gaaɓnit’eena na refkaa ndabid ne.»

¹⁵«O koor oxuu giginna o toog oxaa ceemreemafulaandeena soo a wondoox fo ten, fat a rabid cegel ke soo a dolnir fo ten.

¹⁶Faap fee a fañangaan o ci o ten, fat oxe giginna a ɓoxot xaaliis faa fodirna fo cegel ke na ci’teel, yaa bugoona o gilig o toog.

¹⁷Mbaryo o tew o ƭeet oxe!

¹⁸Oxuu wondooxna fo njegel fat a warel!

¹⁹Oxuu na ɓoxotaa sadax roog lakas, fat a warel, yaam o Yaal oxe soom hele o ɓoxot sadax.

²⁰Nu mbaree o ñagadilaa mbaat nu toroxandaa xa kataakoon axaa ngenna no mbind nuun. Mbetandooxyo yee nu mosa o ndef xa kataakoon no saax laa Misira.

²¹Ba nu toroxandaa ñaaw we mbaat xa baan axe.

²²Nu ñagadilangaa a den, xan a ƈufginooxaam, mi o Yaal oxe, too fat nu and ee xam nan-giloox a den.

²³Xam fuux, warnoor a nuun na xire, too yaaga rew nuun na ndefkataa ñaaw we, soo xa ƥiy nuun a ndefat xa baan axe.

²⁴Boo nu ƥandna xaaliis oxaa fogna na xeet es, a ref o kentand nuun soo a rool, ba nu ndabdinoorin ne lakas we na ndawnitaa a mbi’tan, ba nu laacin ndimand ngupu.

²⁵Boo o kiin a tayle’oonga ndoki um, nomteen o ten boo njeeƈ ne a helko fo mudaa,

²⁶yaam keene soom a jegu, ta ref kulooxel um fo ñirax um. O geekangaan, xar a hulooxkaa, yaa ta wondooxna? A ƴufginooxangaam, xam nanin, yaam Roog faa na yirmaa refum.

²⁷Nu mbariraam o mben, mi fee Roog nuun mbaat nu saloox a kelfa xeet nuun.

²⁸Ñofaamoo o ƥoxot ke refna a las es no saxade le nuun fo no ke nu niritna no taxar biiñ ke nuun. Kesanaamoo taaw ke na xa ƥiy axe nuun.

²⁹Ke refna kene koy, taaw naak mbaat mbaal mbaat fambe a rimange, fat a xaƴel paam ya um boo a jeg pes ɓetuu ƭik. Na bes fa ɓetuu ndadkandeer faa, fat nu ƥoxotaam o ten.

³⁰Fat nu ndef xeet fa tedu es! Ba nu ñaam muk a tegeƴ muumeen naa ƥaaɓaan ke a lisitna. Ndeɓaneeno xa ƥox axe.»