Read NQAARIIT NE ROOG A sutax ale 23 Bible Online

A sutax ale 23 - NQAARIIT NE ROOG bible

A sutax ale 23

¹«Ba o leng na nuun a feranaa o kend um mbaat ta fartaa oxaa fi’na boom, a seede’anan na xa maaƥ.

²Baa wiin mayu a soobong, a mbi’noorong paaxeer, too ba o bug o yoon fo wiin mayu a tax o ɗap ndigil ne, yaa fo layoor.

³Ba o farit o leng oxaa na feraa, a refangaa o ndool sax oo.

⁴Boo xetoona fo nqoox no pañ of mbaat o faam um o mo’u, fat o ɓisin o ten.

⁵O ga’angaa o faam um a yenaa fo suf ne ta saqna, ba o reef o mbiñ o lakas. Dimle’i o pañ of oxeene, intin njegel ne.

⁶Ba o ñak o reef o cofel ole, a soƥangaa sax ee o ndool onqe feraneena yoo.

⁷Ba nu nan-gilooxaa xa maaƥ axe. Ba nu mbar a jaambuur fee mbaat o kiin o cofu xe, yaam mi o Yaal oxe ɗeetkiim oxe fi’na boom leene muk nen a jaambuur.

⁸Ba nu njaɓ o neexleel muk, yaam neexil ke kaa mbuulnaa we a kid den a mbetooxna soo a yaqaa fa lay fee no jofu we.

⁹Ba nu ñagadilaa xa kataakoon axe. Nu anda a paax a qalaat den, yaam nuun fa qoox nuun nu ndeeƭa xa kataakoon no saax laa Misira.»

¹⁰«Nu mbaaga o nqooxaa lanq ke nuun, saxadaa a den boo xa kiid ɓetaa fo leng xa tuqrandu.

¹¹Kaa koy, no hiid o ɓetuu ɗikandeer ole, nu mbara o ñarin lanq ke. Neene, xan rool gentand we nuun a nqotit teen kaa da ñoowitna, too xan muumeen-a-koƥ ke a ñaam yoqatin le. Mbi’yo neene itam na ƭing taxar biiñ ake fo no taxar oliiw ake nuun.

¹²Nu njega pes ɓetuu fa leng kaa nu ci’eena o mbi calel nuun, ndaa na bes fa ɓetuu ƭikandeer fee koy, nu mbara o ñootnoox, ndax qoox nuun fo xa paam nuun a njeg a ñootnax, soo xa ƥiy axe no jeefeer nuun fo xa kataakoon axe a ƥutnoox.

¹³Ngayyo fop ke layuuma a nuun. Ba nu ƈufginoox roog lakas ke. Kaam ee ba o leng a nanat a nuun nu ne’aa a kon den.»

¹⁴«O hiid oluu refna, nu mbara o ndoofandaa qew tadik kaa nu simattaxam.

¹⁵Fa eetaand fee refu Xew fee no puuru canja’e ke. No ñaal ɓetuu ƭik ke ndameena no nqool onqe ne’eena Abiib, fat nu ñaamaa puuru canja’e, ne heblitanuuma a nuun, yaam no nqool onqeene nu sutooru Misira. Ba nu ngar fo xa ƥay xa ƥor me mi.

¹⁶Cinj kaaga, fat nu ndoofand Xew fee na ñaƭax ale, yaa nu saxadna ke eetna o foor na xa qol axe nu nqooxaa. Nu moofangaa koy boo na seek fee, yaa o hiid ole a fagiidaa, nu mbara o ndoofand Xew fee na saxad ale no ke tuufe-duufe ke nuun a mbatna.

¹⁷Neene, a caf a tadak o hiid oluu watna goor we na xeet nuun fat a ngaraa me mi fee o Yaal oxe na refkaa boo faw.

¹⁸Nu ƥoxotiidkiraam fo’oy njegel naa sadaxteena, yoonandtin puuru kaa saqna poɗaxnir. Ba nu mbe’in neebam fee ɓoxoteena no qew ke mi.

¹⁹Fat nu ƥoxotiidaam ke eetna o foor na xa saawit axe nuun no Mbiñ o tedu nqe mi, yaam mi refu o Yaal oxe Roog nuun. Ba nu mbaƴnit o mbambe nqe fo sis ya um.»[12]

²⁰«Xam luliid malaaka ta adooxan a nuun soo a saytoox a nuun na ƭat ale. Xan a ɗox a nuun boo no saax le jagandanuuma a nuun.

²¹Fat nu mbootooxin, nananin a paax, too ba nu naqadilin. Waasankee a nuun njofaƭar nuun, yaam gon le mi a bugko ñaaƴtaa.

²²Mi o Yaal oxe, mexe layaa a nuun ee nu nananangaan fo ngor, mbi ke hebluuma a nuun, xam ref o pañ no fañ nuun soo ref o noon no noon nuun.

²³Boo malaaka es a adooxanna a nuun, ndax ta ɗox a nuun maa no Aa-amori waa, maa no Heeheet waa, maa no Peeperisi waa, maa no Kaakanaan waa, maa no Hiihiwi waa fo maa no Yeeyebus waa, xam saŋik qeet keene.

²⁴Kaa koy, nu mbaree o ngungaa mbaambir pangool ke den, ndax nu mbaɗoox a den mbaat nu laalataa a den, tee kaa nu afdaa fo mbaax ne den. Ke nu mbarna o mbi kañ, refu nu yaq nitaal ke no pangool ke den soo ngef a ƥil a sexe ke den.

²⁵Mi fee o Yaal oxe Roog nuun soom nu mbaru o ƥoxot tedaanga. Yaaga xam barke a nuun, ci a nuun ñaamel fo yerel soo saytoox a nuun na cir ake.

²⁶Jegkatee kam saax nuun o tew oxaa o fud um a wataa mbaat o tew o timar, too xam ci a nuun o xuuɗ.

²⁷Keeke refu ke um fi’kaa: Boo a saax ake a yegna yee nu mbaambnooxiida, xan a ndiid, qeet ke a mbiriɓ, fañ we nuun a ngod xa coor, a mbaaƭaa maa da ndaɗitna.

²⁸Xam hebil poopolyaam da mbod a nuun mbaambir, a ndaxaa Hiihiwi we fo Kaakanaan we fo Heeheet we bo nu ngelko fo mbadiidaa.

²⁹Ndiiki koy, raxkiim qeet keene fop mbaambir nuun no hiid o leng ole. A reeƭit’angaa neene, saax le a yoqkooga a pec alaa ƥaaɓaan ke a mbugko ndimatirtaa, too faaxkoogee na nuun.

³⁰Kaam bugko raxaa a den o ndik o ndik, ndax boo nu moƴaa moƴ o saqit, nu lang saax le.

³¹A miñangaa, xan o fiisel ole nuun a dalit na Kal ale no xeet le boo no maag ole Mediterane soo a jangit na koƥ-a-ƥor ale Sinayi boo no xuluɓ ole Ofrat, yaam xam ɓoxot na xa ƥay nuun we ngenna na saax akeene, ndax nu ndax a den.

³²Nu ndalinkee ngiɓoor leng fa den mbaat fo roog ke den.

³³Ba nu ci a den o gom olaa da ngenitna kam saax nuun, ndax ƥekkee a nuun nu tooñaam. Boo nu mbaɗooxna roog ke den, xan a ref na nuun mbog.»