Read NQAARIIT NE ROOG A sutax ale 24 Bible Online

A sutax ale 24 - NQAARIIT NE ROOG bible

A sutax ale 24

¹O Yaal oxe a laya a Moyiis ee: «Ŋaayiidi me mi took o joong ole, yooniid fa Aaroon fa Nadab fa Abiihu fo maak qarɓeen ɓetuu ƭik no maak we na xeet fee Isra’el. Nu ngarangaa boo ndangand, ngungyo a lanq.

²Cinj kaaga, wo rek na matiidkaxam. Lakas we baa matiid, too baa xeet fee a ŋaayiid fa wo took o joong ole.»

³Moyiis a yegniida Ii-isra’el we fop ke o Yaal oxe a lay’uuna too a hebil’un o ten. Den fop a njaaɓandoora yee: «Xan i mbi fop ke o Yaal oxe a layna.»

⁴Moyiis a binda fop ke o Yaal oxe a lay’uuna. No feet olaa, a inooxa ƥiiɓ cuc, a max o sadaxand na caf ale no joong ole, a dendand maaga a ƥil xarɓaxay fo a ƥil a ƭak, luu refna teen a refan a carind na carind xarɓaxay fo a carind a ƭak ake na xeet fee Isra’el.

⁵A hebla mboƥ ngoor Ii-isra’el da ƥoxot o Yaal oxe sadax toxel soo a nqiris qoox nen sadax fa njamsa’oor.

⁶Moyiis a yipa a qaaj a leng ale no fo’oy le no cegel ke na xa ƥaxañ, soo a qaaj a lakas ale, ta wiisin took o sadaxand ole.

⁷Cinj kaaga, a xota safe le no ngiɓoor ne soo a jangin a maak mbaambir xeet fee. A laya yee: «Xan i nanan kebil ke no Yaal oxe fop, mbi ke ta layna.»

⁸Maaga, Moyiis a janga yoq ke no fo’oy le, a wiisin Ii-isra’el we soo a lay ee: «Kene refu fo’oy le no ngiɓoor ne o Yaal oxe a dalinna fa nuun, ye ta cooxna a nuun kebil keeke fop.»

⁹Cinj kaaga, Moyiis a ŋaaya took o joong olaa, a yoon fa Aaroon fa Nadab fa Abiihu fo maak qarɓeen ɓetuu ƭik no maak we na xeet fee Isra’el.

¹⁰A nga’a a Roog fee Isra’el. Me ta dakoogna koy, kaa nand’u fo ɓil safiir, a xoolit nen a asamaan fee.

¹¹Roog fi’ee maak Ii-isra’el weene ƭomu leng. Kaa ngorooxoogun, a ñaamaa, a yeraa.

¹²O Yaal oxe a laya a Moyiis ee: «Ŋaayiidi me mi took o joong ole too geenoox teen. Kaam bugong o coox a alfa ƥil ake, too um bind teen ke hebluuma, dalnin, ndax xeet fee Isra’el a njangin.»

¹³Moyiis a yoona fa Yosuwe fee o tag um, da ndef no ŋaayaa took o joong ole Roog.

¹⁴Ye da ngelkaa fo ndet, Moyiis a laya maak waa yee: «Cungyo a in meeke bo i ndet too ngar. Aaroon fa Xuur xan a yoq fa nuun. Oxuu jegna soxla faa ta bugeena o ɗaxan, fat a diisin a den.»

¹⁵Ye Moyiis a ŋaayaa took o joong ole, eel a muura o joong ole.

¹⁶A qoolaand ale no ndam onqe no Yaal oxe a diƈooxa took o joong ole Sinayi, too eel le a muuraan boo ñaal ɓetuu fa leng. No ñaal ɓetuu ƭikandeer naa, o Yaal oxe a xoyta a Moyiis ndeer ee ndeer eel laa.

¹⁷A qoolaand ale no ndam onqe no Yaal oxe reeƭna took o jul ole no joong ole kaa nand’u na kid ake na xeet fee Isra’el nen fiɗel laa na raaɓaa.

¹⁸Moyiis a roka no eel le, a suur took o joong ole. A reeƭa maaga boo ñaal qarɓeen nahik fo xa yeng den.