Read NQAARIIT NE ROOG A sutax ale 26 Bible Online

A sutax ale 26 - NQAARIIT NE ROOG bible

A sutax ale 26

¹«Ngenand ne koy, fat o bombtin a naf xarɓaxay akaa supteena, a mbi’tel gaare faa jaxasna xa ƥaak axaa axeeke a nqiiyiiyna, axaana a yaxig coy, xa lakas axe a ndaalde, pindel yeeyetax kaa na mosandaa a den, a ngemeñel teen.

²A naf ake fop na mbodkaa. A naf aluu refna, o cigdel um fat a ref xa noonoong qarɓeen ƭik fo xa noonoong ɓetaa tadaq, o yaajel um a ref xa noonoong xa nahaq.

³Fat a naf a ƥetak akeeke a suptel, a mbi’el salal, a naf a ƥetak akaana a suptel, a mbi’el salal.

⁴No cat leng no cigdel ole no salal nuu refna, fat o mod teen xa qooj xa qiiyiiyu.

⁵Fat o mod xa qooj qarɓeen ƥetik no cat ne no salal nuu refna. Fat o xooj oluu refna a waag o dend fo o gend um.

⁶Fat o xawin xa lokir wurus qarɓeen ƥetik axaa xawrandtoona salal ƭik ke, naa andoona yee xan Ngenand ne a waag o ref leng.

⁷Cinj kaaga, fat o riwin a naf xarɓaxay fo a naf a leng akaa ndefna a ƥiñ pambe, da mbombtahinel Ngenand ne.

⁸A naf aluu refna teen, o cigdel um fat a ref xa noonoong qarɓeen tadik, soo o yaajel um a ref xa noonoong xa nahaq. A naf ake fop na mbodkaa.

⁹Fat o supit a naf a ƥetak ake, fi’in salal, a naf ɓetuu fa leng ake, o supit a den itam. A naf ɓetuu fa lengandeer ale koy, fat a lipaa mbaambir Ƭiif ne.

¹⁰Fat o mod xa qooj qarɓeen ƥetik no cat leng no cigdel ole no salal nuu refna.

¹¹Fat o xawin xa lokir xanjar qarɓeen ƥetik, yuuɓ a den na xa qooj axe, naa andoona yee xan Ƭiif ne a waag o ref leng.

¹²No saax ole no cigdel ole no salal ke koy, ke na hupkaa teen, kaa bugko lipaa a cinj ale no Ngenand ne.

¹³No saax ole no cigdel ole koy, ke na bugko lipaa no saax oluu refna no Ngenand ne, fat a fi o noonoong o leng, a muur Ngenand ne.

¹⁴Fat o hulit Ƭiif neene pay naa fi’teena ƭool a suk paal akaa yaxgineena, soo a doonel ƭool jiinga.

¹⁵Fat o sexin a patax saas akaa o geennitkaa Ngenand ne.

¹⁶A patax aluu refna, o cigdel um fat a ref xa noonoong xarɓaxay, soo o yaajel um a ref o noonoong o leng fa genwal.

¹⁷A patax aluu refna fat a jeg sal ƭik kaa ndendna. Neene a refitkaa na patax ake no Ngenand ne fop.

¹⁸Fat o sexin a patax qarɓeen ƭik, da mbod no ɓemb-roog o ñamaak ole no Ngenand ne.

¹⁹Jalni itam a caf qarɓeen nahik xaaliis, da mbadel no sal ke na patax akeene. A patax aluu refna, o wadanin a caf a ƭak.

²⁰No saax o lakas ole no Ngenand ne koy, farna fo ɓemb-roog o janoon, fat o sexin itam a patax qarɓeen ƭik,

²¹jalin a caf qarɓeen nahik xaaliis. A patax aluu refna, o wadanin a caf a ƭak.

²²Na cinj ale no Ngenand ne, farna fo mudand ne, fat o sexin a patax ɓetaa fo leng

²³fo a patax a ƭak a lakas akaa aluu refna a lakooxkaa a cinj ale.

²⁴A patax akeene koy, xan a muɓrandel no ke xotitna a lanq, soo o heɗ a fokat a den took. Neene a refitkaa itam na patax a ƭak ake lakooxna.

²⁵Yaaga boog, a cinj ale no Ngenand ne a patax ɓetaa tadaq a jegkaa fo a caf xarɓaxay fo a caf ɓetaa fo leng xaaliis, a patax aluu refna a wadanel a caf a ƭak.

²⁶Fat o sexin a teex saas akaa na ndefkaa a kadand: A kadand a ƥetak akaa na ndamkaa a patax ake no saax o leng ole no Ngenand ne

²⁷fo a kadand a ƥetak akaa na ndamkaa ake no saax o lakas ole fo a kadand a ƥetak akaa na ndamkaa ake a cinj ale, farna fo mudand ne.

²⁸A kadand ale na wadkeel a ndeer ale na patax ake koy, fat a inoor no cat boo no cat.

²⁹A patax ake fo a kadand ake, fat o laar a den wurus, xawin xa keɗ wurus axaa a kadand a lakas ake a mbadkeel.

³⁰Moyiis, fat o geennit Ngenand ne ne laltoonga o ten no joong ole.

³¹Fat o riwin mbaƴ naa xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, pindel yeeyetax kaa na mosandan, a ngemeñel teen.

³²Fat o geennitin a toodook a nahak saas akaa laareena wurus, a yoonandtel xa lokir wurus, aluu refna teen a diƈoox na caf alaa fi’teena xaaliis.

³³Fat mbaƴ ne a lokel na xa lokir axeene. Laqa mbaƴ neene koy, arka ne saqna a alfa ke no kebil ke a diƈkeel. Mbaƴ ne na xaajkaa o Mbiñ o tedu nqe fo o Mbiñ onqe moƴna o ted.

³⁴Cinj kaaga, fat o jang o afnir-o-fortand ole, afnitin arka ne na refkaa no Mbiñ onqe moƴna o ted.

³⁵Fat o geenin a taabul ale no Mbiñ o tedu nqe, farna fo ɓemb-roog o janoon no Ngenand ne, a pagal ale na xa lampa xe, o diƈin farna fo ɓemb-roog o ñamaak, ta faambir fo a taabul ale.

³⁶No don-maax ole no Ƭiif ne koy, fat o riwin mbaƴ naa xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, soo a ngemeñel.

³⁷Fat o sexin a toodook a ƥetak saas, laar a den wurus, geennit a den mbaƴ ne. Wadani a den xa lokir wurus, aluu refna, o jawnanin a caf xanjar.»