Read NQAARIIT NE ROOG A sutax ale 27 Bible Online

A sutax ale 27 - NQAARIIT NE ROOG bible

A sutax ale 27

¹«O sadaxand ole koy, fat o fi’tin a saasaas. O cigdel um o saax oo saax fat a ref xa noonoong xa ƥetaq, soo geel um a ref xa noonoong xa tadaq.

²Ga’aa xa can axene, fat o weesin xa can xa nahaq axaa nandna fa den, oluu refna, o sipin no kooñ, da muum fo o sadaxand ole. Keene fop, fat o laarin xanjar.

³Xa ƥaxañ axeeke no sadaxand ole fop, fat a nqawtel xanjar: xa ƥaxañ axe na mbugko yipaa ndaw ke no niinu ke, xa ƥang axe, xa toon xa biisir axe, xa cuutir a tegeƴ axe fo fo njaq ne.

⁴Fat o fi’in mbiic nqanjar naa saxitna nen tagar, soo no kooñ nuu refna, o fi teen o heɗ xanjar.

⁵Mbiic neene koy, fat a garit o sadaxand ole a lanq, a diƈoox a ndeer ee ndeer ale.

⁶Sexnani o sadaxand ole a teex a ƭak saas, laar a den xanjar.

⁷Den na mbugko mbadeel na xa keɗ axe na xa saax xa ƭaq axe no sadaxand ole, a meeɓteel o ten.

⁸O sadaxand oleene na fi’itkeel a patax, o waaƥ a fi’kaa, too fat a nand fo ole laloonga no joong ole.»

⁹«Fat o ɓitit o maax ole no Ngenand ne njoor. O cigdel ole no njoor ne fat a ref xa noonoong teemeed no ɓemb-roog o ñamaak.

¹⁰A ƥiiɓit qarɓeen ƭik a ngeennitkeel, soo a ƥiiɓit aluu refna a diƈoox na caf xanjar, a damrandtel a liind xaaliis, a wadel xa lokir xaaliis.

¹¹Farna fo ɓemb-roog o janoon ole itam, xan a jeg njoor naa o cigdel um a refkaa xa noonoong teemeed. Leng kut ke a geennitkeel.

¹²No yaajel ole no maax ole farna fo mudand ne, o cigdel ole no njoor ne fat a ref xa noonoong qarɓeen ƥetik soo a geennitel a ƥiiɓit xarɓaxay akaa aluu refna a diƈooxkaa na caf a leng.

¹³No saax ole a carind ale a refkaa, farna fo batand ne yoo, fat o maax ole a fi xa noonoong qarɓeen ƥetik o yaajel.

¹⁴A peɗuuk aluu refna na peɗuuk a ƭak ake ndeerna a carind ale, o cigdel ole no njoor um fat a ref xa noonoong xarɓaxay fo xa noonoong xa ƥetaq, a geennitel a ƥiiɓit a tadak akaa aluu refna a diƈooxkaa na caf a leng.

¹⁶A carind ale koy, mbaƴ naa o cigdel um a fi’na xa noonoong qarɓeen ƭik a bugko singteel. Fat a riwtel xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare. Fat o geennitin a ƥiiɓit a nahak akaa aluu refna a diƈooxkaa na caf a leng.

¹⁷A ƥiiɓit ake mbidna o maax ole fop, a liind xaaliis a ndamranditkeel. Xa lokir axe yoo xaaliis a ndefkaa, ndaa a caf ake o mat, xanjar a ndefkaa.

¹⁸Yaaga boog, o cigdel ole no maax ole xan a ref xa noonoong teemeed, soo o yaajel ole a ref xa noonoong qarɓeen ƥetik. Njoor nuu refna, fat geel um a ref xa noonoong xa ƥetaq. A caf ake na ƥiiɓit ake koy, xanjar a ndefkaa.

¹⁹Tikoorik ke na njalitkeel Ngenand ne fop, xanjar a ndefkaa: xa teng axe no Ngenand ne yoo fo axe no ɓit le yoo.»

²⁰«Moyiis, fat o sim Ii-isra’el we da ƥisiidong diwliin oliiw fa nole fee moƴna o faax, ta yipeel na xa lampa xe na pagal ale, ndax kirand nuu refna da ngeƥandeel.

²¹Aaroon fo xa ƥeem xa koor, fat a topatooxaa a den kam Ƭiif ne um bugko xetteel, mbaambir mbaƴ ne na fegkaa arka ne no ngiɓoor ne, ndax da mbe’aa no kaƥ mbaambir es, mi o Yaal oxe. Fat Ii-isra’el we a ndeef kebil neene no suk boo no suk.»