Read NQAARIIT NE ROOG A sutax ale 28 Bible Online

A sutax ale 28 - NQAARIIT NE ROOG bible

A sutax ale 28

¹«Moyiis, xoyni a Aaroon fee o maag of fo xa ƥeem axe ndefna Nadab, Abiihu, Eleyasaar fa Itamaar. Fat o suudit a den a ndeer no Ii-isra’el lakas we, ndax da ndef saasadax, a njalanaxam.

²Fat o fi’nan a Aaroon toki tedu mosu kaa na taxkaa ta niwel.

³Fat o lay fo yaal a yiif ake fop ci’uuma o and, da ƭiis tikoorik ke Aaroon a rokooxkaa a koom alaa ta dodkeel no calel no saasadax um.

⁴Tikoorik keene na ndefkaa: safaƈ ne, o jamb ole, o forok ole, sabadoor naa gemeñeena fo tañalax ne fo o kumnoor ole. Fat Aaroon fee o maag of a rokooxaa a den, ten fo xa ƥeem, yaa da mbadnaa o far den.

⁵Riiriw we fat a mbaaƭ wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare.»

⁶«Fat da ndiwit o jamb ole wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare. Fat a mosandtel kemeñ.

⁷Fat a fi’anel xa kadoor xa ƭaq axaa na ƭiiskeel no cat ke.

⁸O kumnoor ole na ñambaaskeel teen koy, leng kut ke o jamb ole a riwitkeel a fi’itkeel: wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare.

⁹Waaƭni a ƥil a cafeñu a ƭak akaa na nqoyeel onik, sexin teen a kon ake na xa ƥiy axe Isra’el.

¹⁰Sexni a kon ɓetaa fo leng ake no ɓil leng le, soo a kon ɓetaa fo leng a lakas ake, o sexin a den no ɓil lakas le. Fat a xottel koy na taaw fee boo no mbat-fo-ɗeen ne.

¹¹Fat o waaƭ seesex, da sexanong a kon ake na xa ƥiy axe Isra’el took a ƥil akeene, nen yaa ta soƥ’ina yee o anddiloor xoox of o sexnaa, ɓil luu refna a wadel no njel wurus.

¹²Fat a ƥil akeene a mbi’el took xa kadoor axe no jamb ole, Aaroon a gadooxaa a den mbaambir es, ndax mi o Yaal oxe, um wetandooran xa ƥiy axe Isra’el.

¹³Cel ƭik ke fop wurus a ndefkaa,

¹⁴ceen ƭik wurus fa nqoolu kaa modeena, a yuuɓel teen.»

¹⁵«Fat o riwin safaƈ ne na ɗeetteel o bug ole Roog, ta mosandtel kemeñ. Fat a fi’tel leng kut ke o jamb ole a riwitkeel: wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare.

¹⁶Fat a ref njiba naa, o saax oluu refna, o cigdel um a refkaa o ɓay,

¹⁷ta mosandtel a ƥil a cafeñu kaa mbi’na a cur a nahak. A cur a eetaand ale fat a jeg a ƥil a cafeñu kaa ne’eena sarduwaan fa topaas fa emerod,

¹⁸a cur a ƭikandeer ale a jeg a ƥil a cafeñu kaa ne’eena eskarbuukle fa safiir fa jamaa,

¹⁹a cur a tadkandeer ale a jeg a ƥil a cafeñu kaa ne’eena opaal fa agat fa ametis,

²⁰a cur a nahkandeer ale a jeg a ƥil a cafeñu kaa ne’eena kirisolit fa onik fa yaspe. Ɓil jafeñu luu refna na ƥil a cafeñu keene fat a wadel no njel.

²¹No ɓil jafeñu luu refna, fat gon no leng na xa ƥiy xarɓaxay fo xa ƥiy xa ƭaq axe Isra’el a sexel teen, nen yaa ta soƥ’ina yee o anddiloor xoox of o sexnaa. A ƥil a cafeñu keene koy, xan a ndef betandoor na carind xarɓaxay fo a carind a ƭak ake Isra’el.

²²Fat o xawnan safaƈ ne ceen ƭik wurus fa nqoolu kaa modeena.

²³Xawnani safaƈ ne itam xa keɗ xa ƭaq wurus, da mbod na xa noflax xa ƭaq axe took.

²⁴Cat ƭik leng ke no ceen wurus ƭik ke koy, fat a yuuɓel na xa keɗ xa ƭaq axe na xa noflax axeene,

²⁵cat ƭik lakas ke no ceen wurus ƭik ke, a yuuɓel no cel ƭik ke. Fat cel ƭik keene a yuuɓel na xa kadoor axe no jamb ole, a mbod mbaambir.

²⁶Cinj kaaga, fat o xawin xa keɗ xa ƭaq wurus, da ngarit kam fee no safaƈ ne, a mbod na xa noflax xa ƭaq axe a lanq.

²⁷Fat o xawnahin xa keɗ xa ƭaq wurus xa lakas, oluu refna teen a ɗugoox o kadoor no jamb ole, a fod mbaambir, paam o ƭiis ole, a yooroox o kumnoor ole no jamb ole.

²⁸Xa keɗ axe no safaƈ ne fo axe no jamb ole fat a ngumnitel o ƥaak olaa xiiyiiyna, ndax safaƈ ne a yoqaa yoora o kumnoor ole too bugkee o geleerooxaa no jamb ole.

²⁹Neene, a mbanuu Aaroon a rokna no Mbiñ o tedu nqe, fat a rokoox safaƈ ne na ɗeetteel o bug ole Roog saqna a kon ake na xa ƥiy axe Isra’el, ta ref betandoor es fa den kili, mi o Yaal oxe.

³⁰Wo Moyiis, fat o ɓek no safaƈ ne na ɗeetteel o bug ole Roog ‹Urim fee› fa ‹Tumim fee›[13], da mbodaa a Aaroon no ngang a mbanuu ta garaa mbaambir es. Neene, xan Aaroon a saqaa a den kili no ngang um, ndax ta andaa ke buganuuma Ii-isra’el we, mi o Yaal oxe.»

³¹«Ɓiñ le no forok ole Aaroon a bugko rokooxaa, a doonooxaa teen o jamb ole, kaa xiiyiiykaa.

³²O cok ole a ndeer ee ndeer ale a refkaa soo a ŋorel nen o cok ndoki njelem, ndax yooɓkee o xuuyoox.

³³Fat a laalanq ale no forok ole a mosandtel pic kaa na nandtaa xa tim mbos. Xa ƥaak axe da mbi’itkeel koy, axeeke kaa nqiiyiiykaa, axaana a yaxig coy, xa lakas axe a ndaalde. Fat o raax teen itam xa buyang wurus.

³⁴O fi’angaa o fos o leng, doon teen o wuyang o leng, boo a laalanq ale no forok ole a xet.

³⁵A mbanuu Aaroon a fadnaa o far um, fat a rokooxin. Bo ta rokiidaa mbaat ta sutooxiidaa no Mbiñ o tedu nqe mbaambir no Yaal oxe, xan fangax le na xa buyang axe a nannoox, neene xonkee.

³⁶Fat o xawin a ƈang wurus fa nqoolu laa saxitna nen mbiɗ. Fat keeke a sexel took um: ‹O Yaal oxe a kesane›, nen yaa ta soƥ’ina yee o anddiloor xoox of o sexnaa.

³⁷Fat a humtel o ƥaak olaa xiiyiiyna no mbaambrand ne no tañalax ne.

³⁸Fat Aaroon a rokooxaa a ƈang aleene kili, ta fodan na tagid, yaa ta refna mbaambir es, mi o Yaal oxe. Keene na taxkaa um jaɓaa sadax tedu ke Ii-isra’el we a mbugkaxam o ƥoxotaa, a soƥangaa sax ee kaa tooñ, yaa da ƥisiidaxam a den.

³⁹Fat o riwanit a Aaroon sabadoor fo tañalax fo o kumnoor olaa gemeñeena gaare.

⁴⁰Xa ƥiy axe Aaroon o mat, fat o riwnan a den sabadoor fo xa kumnoor fo fo ndip fo mosu naa na taxkaa da niwel.

⁴¹Wo koy Moyiis, fat o rokan a Aaroon fo xa ƥeem tikoorik keene, ɗuum a den. Fat o dod a den saasadax, tedland a den, ndax da mbadnaa o far den mbaambir es.

⁴²Fat o riwnan xa ƥiy axe Aaroon fo njata naa mbi’teena fale fa gaare, ndax da singooran cer den. No tet ke a mbugko nqottaa boo no kuɓay ke.

⁴³Fat Aaroon fo xa ƥeem a ndokooxaa a den, yaa da ndokiidaa no Ƭiif ne um bugko xetteel mbaat yaa da matiidaa o sadaxand ole, ndax da mbadin o far den no Mbiñ o tedu nqe. Neene, ngadooxkee tooñ leng too nqonkee. Fat Aaroon fo xa taan um a ndeefaa kebil neene boo faw.»