Read NQAARIIT NE ROOG A sutax ale 29 Bible Online

A sutax ale 29 - NQAARIIT NE ROOG bible

A sutax ale 29

¹«Neeke o mat waro o fi, ndax o dod a Aaroon fo xa ƥeem saasadax, da njalanaxam: Fat o waaƭ o nqoox fo a suk paal a ƭak akaa ñakna sik.

²Fat o waaƭ itam mbiɗel bele, juɗ puuru canja’e fo xa kaf axaa mbosolteena diwliin too a njanja’el fo xa puudu xaa njanja’eena, a sulel diwliin.

³Fat o yip a den na cenjel a leng, ɓoxotandoor a den fo o nqoox onqe fo a suk a ƭak ake.

⁴Fat o ɓis a Aaroon fo xa ƥeem no ndokand ne no Ƭiif ne um bugko xetteel, ɓog a den.

⁵Cinj kaaga, fat o rokan a Aaroon tikoorik keeke: sabadoor ne, o forok ole, o jamb ole fo safaƈ ne soo ŋaƭanin o kumnoor ole no jamb ole.

⁶Fat o tañalin soo doonanin teen a ƈang a tedu le.

⁷Fat o jang diwliin fa ƭuumir fee, juurin took xoox um, ɗuumtin o ten.

⁸Fat o matandiid xa ƥiy axe Aaroon, rokan a den sabadoor ke.

⁹Fat o ŋaƭan a Aaroon fo xa ƥeem xa kumnoor, tañal a den. Neene, xan a ndef saasadax boo faw. Neeke Aaroon fo xa ƥeem a ndokitkaa no calel den:

¹⁰Fat o nqoox onqe a ɓisiidel mbaambir Ƭiif ne, Aaroon fo xa ƥeem a ndoon xa ƥay den took xoox um.

¹¹Fat o xirsin mbaambir es, mi o Yaal oxe, no ndokand ne no Ƭiif ne.

¹²Fat o xaf no fo’oy le no nqoox onqe, suup teen nqol of, ɗuumin na xa can axe no sadaxand ole, soo ke yoqna teen, o ɓaxin na caf ale no sadaxand ole.

¹³Fat o jang neebam fee muurna laaw ke no njegel ne fop fo ke moƴna o faax no xeeñ le fo a qisiil a ƭak ake fa neebam fee taƥna teen. Cinj kaaga, fat o dox a den took o sadaxand ole.

¹⁴Keene xan a ref sadax faa na waasantaa pakaad. Ke refna a tegeƴ ake fo ƭool ne fo fop ke refna no laaw ke, fat a ndoxel tafil saŋe ne.

¹⁵Cinj kaaga, fat suk leng le a ɓisiidel, Aaroon fo xa ƥeem a ndoon xa ƥay den took xoox um.

¹⁶Fat o xiris suk le, dek fo’oy um soo wiisin took o sadaxand ole fo me widuuna fop.

¹⁷Fat o ɗeg o fimb ole no njegel ne teɓ-reɓ, laxad laaw ke fo a caf ake, doon a den took xa ƭeg axe fo xoox le.

¹⁸Cinj kaaga, fat o dox njegel ne took o sadaxand ole, ɓoxotaam o ten, ta ref sadax fa ndoxel. Keene xan a ref na mi o Yaal oxe, sadax fa mbelu tuñ bo.

¹⁹Cinj kaaga, fat suk lakas le a ɓisiidel, Aaroon fo xa ƥeem a ndoon xa ƥay den took xoox um.

²⁰Fat o xiris suk le, xaf no fo’oy le, ɗuumin no yuuf ole no nof ñamaak ne Aaroon fo axe no nof ñamaak ke na xa ƥiy axe ten. Oxuu refna na den itam, ɗuumaneen no nqol ngoogoor ne no ɓay o ñamaak um fo ne na caf a ñamaak um. Cinj kaaga, jangi ke yoqna no fo’oy le, wiisin took o sadaxand ole fo me widuuna fop.

²¹Fat o xaf o ndik no fo’oy le refna took o sadaxand ole fo na diwliin fa ƭuumir fee, o wiisin a Aaroon, wiisin no tikoorik ke ten, cinj kaaga, o wiisin xa ƥeem fo no tikoorik ke den. Neene, Aaroon fo xa ƥeem fo tikoorik ke den xan a ted.

²²Fat o jang ring le no njegel neene fa neebam fee muurna laaw ke fo ke moƴna o faax no xeeñ le fo a qisiil a ƭak ake fa neebam fee taƥna teen fo a ñaal a ñamaak[14] ale. Na sadax fee no suk lakas leene saasadax we a ndokitkaa no calel den.

²³Fat o xot mbuuru naa moolooxna fo o gaf olaa xiiwteena diwliin fo o fuudu na cenjel ale no puuru canja’e ke diƈeena mbaambir es.

²⁴Fat o coox a den a Aaroon fo xa ƥeem, da yaand a den, a ƥoxotaam a den.

²⁵Cinj kaaga, fat o xot a den na xa ƥay den, dox a den took o sadaxand ole took sadax fa ndoxel fee. Keene xan a ref na mi o Yaal oxe, sadax fa mbelu tuñ bo.

²⁶Cinj kaaga, fat o jang ngang ne no suk dodir leene ɓoxotaneena a Aaroon, yaandin mbaambir es. Keene na refkaa a las of.

²⁷Layi a den ee ngang ne fo a ñaal ale yaandeena, a mbatnitel no suk dodir leene ɓoxotaneena a Aaroon fo xa ƥeem, xa ƭeg xa tedu a ndefu.

²⁸Ten taxu a mbanuu Ii-isra’el we a ƥoxotaxam sadax fa njamsa’oor, fat a mbatin no cegel ke xa ƭeg axeene, a coox a den a Aaroon fo xa ƥeem fo xa taan um.

²⁹Aaroon a xonangaa, fat xa ƥeem axe na mbugko ƭuumeel saasadax maak a lam tikoorik tedu keene, a ndokooxaa a den, yaa da mbugna o ndok no calel den.

³⁰O saasadax oxe na rondandkaa a Aaroon, a ref o leng na xa ƥeem, fat a rokoox a den boo pes ɓetuu ƭik soo a sogkaa o rok no Ƭiif ne um bugko xetteel, ndax ta fadin o far um kam o Mbiñ o tedu nqe.

³¹Fat o jang suk dodir leene, waƴin a tegeƴ ake no mbiñ o tedu.

³²Aaroon fo xa ƥeem fat a ñaamit no ndokand ne no Ƭiif ne um bugko xetteel a tegeƴ ake no suk le fo ke yoqna no puuru ke ndefna na cenjel ale.

³³Neene, fat a ñaam ke da njofoorandteena fa Roog, ye da ndodeena soo a ndokkaa no calel den. O pogee na den ñaamkee teen, yaam ñaamel tedu yoo.

³⁴A soƥangaa koy ee tig na tegeƴ ake na sadax fa ndodir fee fo no puuru ke kaa mbe, fat o dox a den. Neene, o leng ñaamkee a den, yaam ñaamel tedu yoo.

³⁵Fat o fi’an a Aaroon fo xa ƥeem ke hebloonga. Fat o saɗgaa a den boo ñaal ɓetuu ƭik.

³⁶Bes fuu refna fat o war o nqoox, sadaxtin, ta ref baasanir pakaad. Fat o ɓogid o sadaxand ole, cinj kaaga, ɗuumeen diwliin, ndax o tedlandin.

³⁷Fat o fi keene boo ñaal ɓetuu ƭik. Neene, xan o sadaxand ole a tedat bo, too oxuu duquuna, xan a ga’in.»

³⁸«Bes fuu refna, fo mbaal fo ƭik naa onquu refna na den a jegna o hiid a mbare o ndox took o sadaxand ole. Baa timis koy fe.

³⁹O mbaal o leng onqe fat a ɓoxoteel nqes ne, soo o lakas onqe a ɓoxoteel na kid-a-caɓru kaa.

⁴⁰O mbaal onqe o ɓoxotkaa nqes ne, fat o yoonandtin ngap kilo tadik mbiɗel kaa siiƥteena ngap o liitar fa genwal diwliin xa oliiw axaa noleena, yoonandtin itam ngap o liitar fa genwal biiñ.

⁴¹O moofangaa boo na kid-a-caɓru kaa, fat o ɓoxot o mbaal o lakas onqe, yoonandtin leng kut ke yoonandit’oona onqe no nqes ne. Xan a ndef sadax toxel kaa mbelna tuñ bo no Yaal oxe.

⁴²Sadax fa ndoxel oo, faa nu mbugkaxam o ƥoxotaa boo faw na xa taan boo na xa tanaraat nuun no ndokand ne no Ƭiif ne um bugko xetteel, mi o Yaal oxe. Meene o mat um bugko xetaa fa nuun soo layaa fa wo.

⁴³Meene o mat um bugko xetaa fo Ii-isra’el we, too xam tedlandit o mbiñ onqeene o ndam es.

⁴⁴Xam tedland Ƭiif ne um bugko xetteel fo o sadaxand ole soo tedland a Aaroon fo xa ƥeem, ndax da ndef saasadax, a njalanaxam.

⁴⁵Xam gen a ndeer Ii-isra’el we soo ref Roog den.

⁴⁶Neene, xan a and ee mi refu o Yaal oxe Roog den, sutitna a den no saax laa Misira, ndax um gen a ndeer den. Mi refu o Yaal oxe Roog den.»