Read NQAARIIT NE ROOG A sutax ale 3 Bible Online

A sutax ale 3 - NQAARIIT NE ROOG bible

A sutax ale 3

¹Moyiis kaa gayoogu o siir ole Yetro fee o seemir um reeƭna o saasadax kam Majan. Bes, a ɓisa ged le a cinj a koƥ-a-ƥor alaa too a fadiida no joong olaa Roog ne’’eena Horeb.

²Maaga, malaaka fee no Yaal oxe a feeñooxaan kam ƈulfaan fiɗel laa refna ndeer ee ndeer ngol. Moyiis a deɓa a kid um too a ga’a ngol ne a jirjirnaa fa fiɗel too waagee o sooy.

³Moyiis a laya taa no yiif um ee: «Um ɗapang boo ga ke mbeeñil maak nene a refna fo ke taxna ngol ne waagee o sooy.»

⁴Ye o Yaal oxe a ga’na ta ɗapaa, ndax ta ga ke na kaƥaa, a xoytaan kam ngol ne too a lay ee: «Ee xey, Moyiis! Moyiis oo!» Maaga, a jaaɓa yee: «Oow! Mexey!»

⁵Roog a layaan ee: «Ba o matiid meeke de. Woli xa ñaaƭ of, yaam me o dakaa, lanq tedu yoo.»

⁶Maaga, a ɓaata teen ee: «Mi refu Roog fee na faap of, ref Roog fee Abraham fa Roog fee Isaak fa Roog fee Yakoob.» Moyiis a muurooxa, yaam kaa saɗaroogu o ɗeet a Roog.

⁷O Yaal oxe a layahina yee: «Ga’aam ne xeet es a xijliteel no saax laa Misira, too nanaam xa buuq den, yaam ne da ñaatlandeel. Kaam ee andaam coono den.

⁸Kaam fudooxiid, ndax um wat a den na xa ƥay axe no Miimisira we, sut a den no saax leeke, ɓis a den no saax faax yaaju laa fo sis fo suum a ndaxritaa, me Kaakanaan we fo Heeheet we fo Aa-amori we fo Peeperisi we fo Hiihiwi we fo Yeeyebus we a ngenna.

⁹Nanaam xa buuq axe no Ii-isra’el we too ga’aam o ñaat ole Miimisira we a toroxandtaa a den.

¹⁰Ndiiki koy, reti. Mexe lulang maa Firawon fee, too fat o sut Ii-isra’el we ndefna xeet es, no saax laa Misira.»

¹¹Maaga, Moyiis a laya a Roog ee: «An refum boo retaa maa Firawon fee, ndax um sut Ii-isra’el we no saax le Misira?»

¹²Roog a doona yee: «Mexey fa wo, too keeke refu o anddiloor ole o anditkaa yee mi lulong: Boo sutoona xeet fee no saax le Misira, no joong oleeke o mat nu mbaɗooritkaxam.»

¹³Moyiis a laya a Roog ee: «Xam ret boog maa no Ii-isra’el we, too xam lay a den ee: ‹Roog fee no daan we nuun luliidaxam me nuun.› Kaa koy, a laamtangaam gon of, nam um laykaa a den?»

¹⁴Maaga, Roog a laya a Moyiis ee: «MI REFU OXE REFUUMA.» A ɓaata teen ee: «Neeke o mat o doonkaa Ii-isra’el we: Oxe ne’eena MI REFU[3], luliidaxam me nuun.»

¹⁵Roog a layahina a Moyiis ee: «Fat o lay Ii-isra’el we yee: ‹O Yaal oxe refna Roog fee no daan we nuun, a ref Roog fee Abraham fa Roog fee Isaak fa Roog fee Yakoob, luliidaxam me nuun.› Keene refu gon es bo na moos boo moos. Kaam ee keene refu gon le um bugko xoyeel no suk nuu refna.

¹⁶Reti fokat maak we Isra’el fop too lay a den ee: O Yaal oxe refna Roog fee no daan we nuun, a ref Roog fee Abraham fa Roog fee Isaak fa Roog fee Yakoob, a feeñooxaxam. Kaa tee: ‹Ga’aam a nuun too andaam ke nu ndooneel Misira.

¹⁷Kaam ee xam sut a nuun Misira, me nu nqijtaa, soo ɓek a nuun kam saax le Kaakanaan we fo Heeheet we fo Aa-amori we fo Peeperisi we fo Hiihiwi we fo Yeeyebus we a ngenna, maa fo sis fo suum a ndaxritaa.›

¹⁸Xan a nan-gilooxong, too fat o ret, wo fo maak we Isra’el, paam o maad oxaa Misira, layin ee: ‹O Yaal oxe refna Roog in, in Hebre we, a feeñooxa a in. Xaƴi a in i ñaaƴ ñaal tadik kam a koƥ-a-ƥor ale, ƥoxotik o Yaal oxe Roog in sadax.›

¹⁹Andaam ee o maad oxe Misira xaƴkee a nuun nu ndet, a soƥangaa sax ee fo o ɓay o jegu doole yoo.

²⁰Xam fi podu naa na doole es, too xam xawit a Misira comlaand ke um fi’kaa a ndeer den. Cinj kaaga, xan a xaƴ a nuun nu ndet.

²¹Xam fi itam, ndax xeet feene a soƥ yirmande mbaambir Miimisira we, ndax bo nu ndetaa, nu ndetkee o ƥor.

²²O tew oxuu refna xan a xeɗ o tew o kend um fo o tew oxaa ta fogitna mbind, kaa fi’teena xaaliis fo kaa fi’teena wurus fo toki kaa nu ndokanna xa ƥiy xa koor nuun fo xa ƥiy xa tew nuun. Neene, xan nu njegit no Miimisira we halal.»