Read NQAARIIT NE ROOG A sutax ale 30 Bible Online

A sutax ale 30 - NQAARIIT NE ROOG bible

A sutax ale 30

¹«Fat o fi o sadaxand ole na cuuraay fee o doxtaa cuuraay. Fat o fi’tin a saasaas.

²Fat o cigdel ole a ref o noonoong, den oo o yaajel ole yoo. Kaa fodirkaa o saax oo saax, soo geel um a ref xa noonoong xa ƭaq. Xa can axe kaa muumkaa fo ten.

³Fat o laarin wurus fa nqoolu, took fee yoo, xa saax axe yoo, xa can axe yoo. Fat o ñiing a kiig ale fa wurus.

⁴Xawni xa keɗ wurus, daaƴ a den ɗuga a kiig ale, xa ƭaq no saax olene, xa ƭaq no saax olaana. Fat a ndend koy fe, ndax a teex ake ta bugko meeɓteel a mbadeel teen.

⁵A teex akeene itam a saasaas a ndefkaa, a laarel wurus.

⁶Fat o diƈ o sadaxand oleene mbaambir mbaƴ ne na fegaa o afnir-o-fortand ole no arka ne no ngiɓoor ne, me um bugko xetaa fa wo.

⁷Nqes nuu refna, fat Aaroon a dox teen cuuraay fa mbelu tuñ, yaa ta bugna o forit xa lampa xe no Mbiñ o tedu nqe.

⁸Kirand nuu refna itam fat a fi neen, yaa ta bugna o heƥand xa lampa xe. Na xa taan boo na xa tanaraat, ba nu ñak o ndoxaa teen cuuraay muk mbaambir es, mi o Yaal oxe.

⁹Ba nu ndox teen cuuraay faa simeeruuma a nuun mbaat sadax toxel mbaat sadax tuufe-duufe, too sadax biiñ yipkaand took o sadaxand oleene.

¹⁰Jaf leng no hiid oluu refna, fat Aaroon a ɓogdit xa can axe no sadaxand ole fo’oy le na sadax fee na waasantaa pakaad. Fat nu mbi’aa teen keene o hiid bo no hiid, nuun fo xa taan nuun fo xa tanaraat nuun. Tig tedu tigi a refkaa na mi o Yaal oxe.»

¹¹O Yaal oxe a layahina a Moyiis ee:

¹²«Yaa o bindkaa Ii-isra’el we, ndax o lim a den, fat oxuu refna na den a rabdaam a bateer o ñis um na pindax aleene. Neene, taamaala fa leng dalkee a den teen.

¹³Oxuu refna no we na mbindkeel fat a cooxit xaaliis faa fodirna fa genwal o monjong na xaaliis fee na eedteel no Mbiñ o tedu nqe. Mi o Yaal oxe, xam ɓoxotel xaaliis feene.

¹⁴O koor oxuu fogna no bind le, a jeg xa kiid qarɓeen ƭik, a jof took, fat a cooxaam xaaliis feene.

¹⁵O yaal halal oxe rabidkee kupu, too o ndool onqe yoo rabidkee kaa danganna genwal o monjong no ke um cooxkeel, mi o Yaal oxe, ndax oxuu refna a wat o ñis um.

¹⁶Fat o xot no Ii-isra’el we xaaliis fee na bateer ale, topatooran Ƭiif ne um bugko xetteel. Neene, xam wetandooran a nuun, nuun Ii-isra’el we, ta ref a bateer o ñis nuun.»

¹⁷O Yaal oxe a layahina a Moyiis ee:

¹⁸«Fat o xawin o roon xanjar o ɓogdinoor, ta yoon fo tiƈoor xanjar. Fat o diƈin ndeer Ƭiif ne um bugko xetteel fo o sadaxand ole. Yipi teen foofi laa

¹⁹Aaroon fo xa ƥeem a mbugko njaptaa xa ƥay den fo a caf den.

²⁰A mbanuu da ndokna no Ƭiif ne um bugko xetteel, foofi leene a mbugko ƥogdinooraa, ndax nqonkee. A mbanuu da matiidna o sadaxand ole itam, ndax da mbadin o far den, a ndoxanaam sadax,

²¹fat a njap xa ƥay den fo a caf den, ndax nqonkee. Kebil neene xan a ref boo faw, a xotit na den, a jof na xa taan den boo na xa tanaraat den.»

²²O Yaal oxe a layahina a Moyiis ee: «

²³«Eedi no qeeñe-xeeñe ke moƴna o mbel: ngap kilo ƥetik na miir fee fi’na foofi, sinamom[15] fa nqeeñu fee, o eed teen ngap kilo ƭik fa genwal, eed na kanel fa nqeeñu fee ngap kilo ƭik fa genwal

²⁴fo ngap kilo ƥetik yaate. Fat a eedteel eedir ke no Mbiñ o tedu nqe. Eedi ngap xa liitar ɓetaa fo leng na diwliin oliiw fee itam.

²⁵Fat oxaa na fi’aa cuuraay a jaxasanong a den, a fi diwliin fa tedu fee na bugko ɗuumteel yaa fo ndod ne.

²⁶Fat o xot teen, ɗuum Ƭiif ne um bugko xetteel fo arka ne no ngiɓoor ne

²⁷fo a taabul ale fo xa ƥaxañ axe ndefna teen fop, ɗuum a pagal ale na xa lampa xe fo xa ƥaxañ um fo o sadaxand ole na cuuraay fee

²⁸fo o sadaxand ole no sadax toxel ke fo xa ƥaxañ um fop fo o roon o ɓogdinoor ole fo tiƈoor um.

²⁹Fat o kesanaam tikoorik keene, too yaaga xan a ted bo. Oxuu duqna a den koy, xan a ga’in.

³⁰Fat o ɗuum a Aaroon fo xa ƥeem, kes a den, da ndef saasadax, a njalanaxam.

³¹Layanaam Ii-isra’el we yee: Keene xan a ref na mi diwliin fa tedu fee na bugko ɗuumteel na xa taan boo na xa tanaraat.

³²Ba oxaa refeerna o saasadax a ɗuumooxin, too ba o leng a fi kaa nandna fo keene. Kaa ted, too kaa nu mbarin o tedland.

³³Oxuu fi’na ƭuumooxel kaa nandna fo ten soo a ɗuumin o kiin o lakas, oxeene kiin fat a sutel no fog um.»

³⁴O Yaal oxe a layahina a Moyiis ee: «Waaƭi no qeeñe-xeeñe keeke: mbiɗel ŋolotoot fo mbiɗel mbaambaar xa pako fa daakaande. Ɓaati teen cuuraay. Keene fop koy, fat a fodir.

³⁵Fat oxaa keene a refna calel um a fosolanong a den fo fo jem, a fi’in cuuraay fa tedu fa mbelu tuñ.

³⁶Fat a jeg teen kaa uneena, a doonel no Ƭiif ne mbaambir arka ne no ngiɓoor ne um bugko xetaa fa wo. Tig tedu tigi a refkaa na nuun.

³⁷Nu mbi’ankee a qoox nuun cuuraay faa nandna fa cuuraay feene, yaam mi a kesane, mi o Yaal oxe.

³⁸Oxuu fi’na cuuraay faa nandna fo ten, ndax ta ñisaa a qeeñaand ale, fat a sutel no fog um.»