Read NQAARIIT NE ROOG A sutax ale 31 Bible Online

A sutax ale 31 - NQAARIIT NE ROOG bible

A sutax ale 31

¹O Yaal oxe a laya a Moyiis ee:

²«Nan-gilooxi, jilaam a Besalel fee o ƥiy Uri fee refna o ƥiy Xuur too a fog na carind ale Yudaa.

³Soɗaanum Yiif es, soɗin o and ta jeg yiif, a waag o fi kuu refna.

⁴A waaga pexey, a waag o jal wurus fa xaaliis fa xanjar.

⁵A waaga o ɗeg a ƥil a cafeñu soo a doon a den, a waag o sex a teex, a waag o fi kuu refna.

⁶Doonanaanum a Oholyab fee o ƥiy Ahisamak fee fogna na carind ale Dan. Yaal-o-and we fop, ci’aam a den yiif, ndax da mbi keeke fop hebloonga:

⁷Ƭiif ne um bugko xetteel, arka ne saqna a alfa ke no kebil ke fo o afnir-o-fortand ole ten fo xa ƥaxañ axe no Ƭiif ne fop,

⁸a taabul ale fo xa ƥaxañ um, a pagal wurus fa nqoolu le na xa lampa xe fo xa ƥaxañ um, o sadaxand ole na cuuraay fee

⁹fo o sadaxand ole no sadax toxel ke fo xa ƥaxañ um, o roon o ɓogdinoor ole fo tiƈoor um,

¹⁰toki mosu ke fo toki tedu lakas ke Aaroon o saasadax oxe fo xa ƥeem a mbugko ndokooxaa, yaa da mbadnaa o far den

¹¹fa diwliin fee na bugko ɗuumteel fa cuuraay fa mbelu tuñ fee no Mbiñ o tedu nqe. Fat a mbi’tin fop ne heblitoonga o ten.»

¹²O Yaal oxe a laya a Moyiis

¹³ta yegin Ii-isra’el we kebil keeke: «Fat nu niw bes fee na ñootnax ale mi, yaam xan a ref o anddiloor a ndeer es fa nuun na xa taan boo na xa tanaraat, a wetandaa yee mi refu o Yaal oxe jilna a nuun, ndax nu ndef xeet es.

¹⁴Fat nu niw bes fee na ñootnax ale, yaam bes fa tedu yoo na nuun. Oxuu maasanduuna, a jaltin, fat a sutel a ndeer no fog um, a warel.

¹⁵Fat nu njalaa pes ɓetuu fa leng ke. Bes fa ɓetuu ƭikandeer fee refna bes fee na ñootnax ale kesaneema koy, o kiin oxuu jaltuuna, fat a warel.

¹⁶Nuun Ii-isra’el we, fat nu niw bes fee na ñootnax ale na xa taan boo na xa tanaraat, yaam ngiɓoor naa na refkaa boo faw a refu.

¹⁷Keene xan a ref o anddiloor olaa na refkaa boo faw a ndeer es fa nuun Ii-isra’el we, yaam mi o Yaal oxe saku asamaan fo lanq no pes ɓetuu fa leng, soo na bes fa ɓetuu ƭikandeer fee um paang calel es, ñootnoox.

¹⁸Ye o Yaal oxe a layna fa Moyiis boo a ƴut took o joong olaa Sinayi, a cooxaan a alfa ƥil a ƭak ake ta bind’ina kebil ke, ten fa xoox um.»