Read NQAARIIT NE ROOG A sutax ale 33 Bible Online

A sutax ale 33 - NQAARIIT NE ROOG bible

A sutax ale 33

¹O Yaal oxe a laya a Moyiis ee: «Inooxyo mene too nqot a ƭat, wo fa xeet fee sutoona saax le Misira. Ndetyo no saax le daaɓooxuuma yee xam cooxin xa taan Abraham fa Isaak fa Yakoob.

²Xam luliid malaaka ta adooxan a nuun, too xam rax Kaakanaan we, Aa-amori we, Heeheet we, Peeperisi we, Hiihiwi we fo Yeeyebus we.

³Neene, xan nu mbaag o ndok no saax leene fo sis fo suum a ndaxritaa. Kaa koy, mi fa xoox es yoonkiim fa nuun, ndik um saŋik a nuun na ƭat yaam a qoox a saƭku ke nuun.»

⁴Ye xeet fee a nanna fa lay fa ñexetu faaga, a ngooy’a, too o leng na den saɗatee o rokoox kaa na mosandaa.

⁵O Yaal oxe a hebil’a a Moyiis ta lay Ii-isra’el we yee: «Xeet fa saƭku a qoox nu ndefu. Boo yoon’uuma fa nuun o ngap onqaa fi’na ñaf-fo-ƭeet soom, saŋikkoogaam a nuun. Ndiiki koy, mbolyo kelax ke nu ndokooxna, soo um ɗeetkaa ke um fi’kaa a nuun.»

⁶Yaa Ii-isra’el we a nanna kaaga, a mbola kelax ke da ndokoox’ina. No kaa xotitna no joong olaa Horeb ndokoox’atee kelax leng.

⁷Moyiis a riƈatooxa saŋe ne soo a geenin maaga Ƭiif ne ta ne’’ina me o Yaal oxe a xetteel. Oxuu soxla’’ina o Yaal oxe koy, sutooxoogaa saŋe ne soo ret no Ƭiif neene.

⁸Moyiis a retoogangaa no Ƭiif ne, xeet fee fop a inooxooga, oxuu refna a geenoox no ndokand ƭiif um, a ɗeetaa a Moyiis boo yaa ta rokkaa kam Ƭiif ne o Yaal oxe a xetteel.

⁹A mbanuu Moyiis a rok’ina no Ƭiif neene koy, eel le a fudooxiidooga, a geenoox no ndokand ne, soo o Yaal oxe a layaa fa Moyiis.

¹⁰Xeet fee fop a nga’ooga eel le geenooxoogna no ndokand ne no Ƭiif ne, too oxuu refna na den a inooxooga, a gungaa no ndokand ƭiif um.

¹¹O Yaal oxe kaa jasnooroogu fa Moyiis, a layaa fo ten nen o kiin fa xaariit um. Cinj kaaga, Moyiis a nomtooxooga no saŋe ne, ndaa o fes ole ne’’eena Yosuwe too a reeƭu o tiidimle um soo a ref o ƥiy Nun, sutooxiidoogee Ƭiif ne o Yaal oxe a xetteel.

¹²Moyiis a laya o Yaal oxe yee: «Wo heblaxam um ɗox xeet feeke, too layiraamo sax oxe o yoonanditkaxam. Yaag oo toox de, wo layu yee: ‹Andaaxoong tigi, too ci’ong yirmande es.›

¹³Ndiiki koy, a soƥangaa yee daawaam yirmande of, andnooraam a ƭat of boog. Neene, xam andong tigi, and itam ee daawaam yirmande of. Ba o weec ee xeet feeke, wo jegun.»

¹⁴O Yaal oxe a doonaan ee: «Ndax kaam war o ñaaƴ fa nuun, ci a nuun a ñootnax?»

¹⁵Moyiis a doonaan ee: «O andangaa yee ñaaƴkiro fa in kañ, ba o hebil a in i ndet.

¹⁶O ñaaƴangee fa in, an na andkaa yee ci’axamo yirmande of, mi fa xeet of? A tef of fa in soom na taxkaa i ngamkaand fo qeet lakas ke na adna fee fop, mi fa xeet of.»

¹⁷Maaga, o Yaal oxe a laya a Moyiis ee: «Xam fi ke o xeɗaxam, yaam ci’aaxoong yirmande es too andaaxoong tigi.»

¹⁸Moyiis a xeɗaan ee: «Lalaam a qoolaand ale no ndam of boog.»

¹⁹O Yaal oxe a doonaan ee: «Xam reef mbaambir of, lalong o paaxel es soo falaloox gon es le refna ‹o Yaal oxe›. Xam yirim oxe buguuma o yirim, muñan oxe buguuma o muñan.»

²⁰O Yaal oxe a ɓaata o lay ee: «Waagkiro o ga mukit es, yaam o leng waagiraam o ga boo a ƴut soo a ñoowaa.

²¹Ɗeeti, o mbiñ onqene mataxama, a jega ɓil laa waagoona o geenoox.

²²Um joonangaang fo a qoolaand ale no ndam es, xam ɓekong no luf kam ɓil le, fegtong o ɓay es boo yaa waanuuma.

²³Cinj kaaga, um dontangaa o ɓay es, ndiiñ es o ga’kaa, yaam o leng waagee o ga mukit es.»