Read NQAARIIT NE ROOG A sutax ale 34 Bible Online

A sutax ale 34 - NQAARIIT NE ROOG bible

A sutax ale 34

¹O Yaal oxe a laya a Moyiis ee: «Sexi a alfa ƥil a ƭak, da nand fo a eetaand ake, too xam bind teen a ƭelem ake ndeeƭna na eetaand ake gefoona.

²Fat o feet nqes a soƥong o ƴut, too boo a kid a nqoolaa, fat o ŋaay took o joong ole Sinayi, geenoox no jul ole, cungaxam.

³Ba o leng a yoon fa wo koy fe, too ba o leng a wiir no joong ole itam. Ba ged leng mbaat o siir a gayel paam um.»

⁴Moyiis a sexa a alfa ƥil a ƭak, da nand fo a eetaand ake. No feet olaa ƥiiɓ teel, a ŋaaya no joong ole Sinayi, ne o Yaal oxe a heblit’uuna o ten, a ɓisloox a alfa ƭak ake.

⁵O Yaal oxe a fudooxiida no eel le, a fod paam Moyiis soo a falaloox gon um le refna «o Yaal oxe».

⁶Maaga, o Yaal oxe a joonaan, a falalooxahin ee: «Mi yoo, mi o Yaal oxe refna Roog fa mayu yirmande, laabiir, muñantaa, may fo o paaxel soo gore.

⁷Kaam yirmaa wiin cuni-cuni, waasantaa njofaƭar fo tooñ fo pakaad, ndaa faritkiim oxe tooñna, too kaam rabdinooxaa njofaƭar ne no paap ke took xa ƥiy den boo no suk ndadkandeer mbaat no nahkandeer.»

⁸Ndak fo ndak, Moyiis a gunga, a xeɗ, a lay ee:

⁹«O Yaal oxe, a soƥangaa yee ci’axamo yirmande of, mexe xeɗang o ñaaƴaa fa in. Andaam ee xeet feeke wiin saƭku a qoox a ndefu, ndaa waasani a in njofaƭar in fo pakaad in soo fi a in, i ndef o jeg of.»

¹⁰O Yaal oxe a laya a Moyiis ee: «Kaam bug o dalin ngiɓoor a ndeer es fa nuun. Xam fi na kid xeet of fop comlaand kaa andoona yee mosee o njeg no saax leng mbaat na xeet fa leng. Neene, xan xeet fee widoonga fop a nga com’andtu ke um fi’kaa, reefandin na wo.

¹¹Mbootooxyo o ƭap ke um hebilkaa a nuun xaye. Xam rax mbaambir nuun Aa-amori we, Kaakanaan we, Heeheet we, Peeperisi we, Hiihiwi we fo Yeeyebus we.

¹²Mbootooxyo o ndalin ngiɓoor fo we ngenna no saax le nu ndokkaa koy fe, yaam ndik da ndef mbog a ndeer nuun.

¹³Kaa nu mbar o njiƭit xa sadaxand axe den kañ, ngef a ƥil ake da mbaɗooxaa, soo yaq xa taaƴ xa lupe xe Asera fee da mbi’na roog den.

¹⁴Nu ngungkee mbaambir roog fa lakas, yaam mi o Yaal oxe, gon es refu ‹o Naalu xe›, soo um ref Roog fa naalu itam.

¹⁵Mbootooxyo o ndalin ngiɓoor fo we ngenna no saax le, yaam ndik ne da njaga’aa fo roog ke den soo a ƥoxotaa a den sadax, da nqoy a nuun, nu ñaam no sadax ke den.

¹⁶Nu inoorangaa no keene, xan nu mbugan xa ƥiy xa koor axe nuun xa ƥiy xa tew axe den, too yaaga xan weene a njaga’aa fo roog ke den soo a ƥek teen xa ƥiy axe nuun.

¹⁷Nu mbi’kee muk nitaal roog cawne.

¹⁸Naagyo ndoofandaa Xew fee no puuru canja’e ke. No ñaal ɓetuu ƭik ke ndameena no nqool onqe ne’eena Abiib, fat nu ñaamaa puuru canja’e, ne heblitanuuma a nuun, yaam no nqool onqeene nu sutooru Misira.

¹⁹Taaw fuu refna, mi jegun boo no taaw ke no cegel ke, ta ref taaw fa ngoor naak luu refna fo taaw fa ngoor mbaal nuu refna fo taaw fa ngoor fambe luu refna.

²⁰Taaw o faam oluu refna, fat nu mbattin mbaal, too boo andoona yee nu mbatiran, fat nu nquƴ o cok ole. Taaw fa ngoor fuu refna na xa ƥiy nuun, fat nu mbatin. Ba nu ngar fo xa ƥay xa ƥor me mi.

²¹Fat nu njalaa pes ɓetuu fa leng, soo na bes fa ɓetuu ƭikandeer fee nu ñootnoox. Fat nu ñootnooxaa sax na waxtu a qooq fo na waxtu a saxad.

²²Fat nu ndoofandaa Xew fee no pes ɓetuu ƭik takooxiidu ke, yaa nu saxadaa ke eetna o foor na bele fee, fa Xew fee na saxad ale, yaa fa seek.

²³Neene, a caf a tadak o hiid oluu watna, goor we na xeet nuun fat a ngaraa me mi fee o Yaal oxe na refkaa boo faw, ref Roog fee Isra’el.

²⁴Xam rax qeet ke mbaambir nuun, riƈat xa ŋat axe, too o leng jeemkee o jaɓ saax nuun na caf a tadak akeene nu ŋaaykaa no hiid oluu watna, ndax nu ngeenoox mbaambir es, mi fee o Yaal oxe Roog nuun.

²⁵Nu ƥoxotiidkiraam fo’oy njegel naa sadaxteena, yoonandtin puuru kaa saqna poɗaxnir, too dara na sadax fee na bes fee na Colandax ale waree o fe.

²⁶Fat nu ƥoxotiidaam ke eetna o foor na xa saawit axe nuun no Mbiñ o tedu nqe mi, yaam mi refu o Yaal oxe Roog nuun. Ba nu mbaƴnit o mbambe nqe fo sis ya um.»

²⁷Maaga, o Yaal oxe a laya a Moyiis ee: «Bindi a ƭelem akeene, yaam den dalnitum ngiɓoor es fa wo fa xeet fee Isra’el.»

²⁸Moyiis a reeƭa maaga fo o Yaal oxe ñaal qarɓeen nahik fo xa yeng den too ñaamee, yeree. Yaa a pe akaaga a mbaafna, a binda took a alfa ƥil ake xa ƭelem axe no ngiɓoor ne ndefna ndef kebil xarɓaxay ke.

²⁹Moyiis a fudooxiida o joong ole Sinayi, a saq a alfa ƭak ake no kebil ke. Ye ta fudoortiidaa no joong ole koy, and’ee yee mukit um kaa meleƈoogu, yaam ne ta lay’ina fo o Yaal oxe.

³⁰Ye Aaroon fo Ii-isra’el we fop a nga’na yee mukit um kaa meleƈoogu, saɗ’iran o matiid.

³¹Maaga, Moyiis a xoya a den. Aaroon fo maak we na xeet fee fop a ngara me ten, soo Moyiis a layaa fa den.

³²Cinj kaaga, Ii-isra’el lakas we fop a matiida a Moyiis, too a yegna a den kebil ke ta daawit’ina no Yaal oxe took o joong olaa Sinayi.

³³Ye Moyiis a layna fa den boo a ƴut, a muura mukit um.

³⁴A mbanuu ta ret’ina mbaambir no Yaal oxe koy, ndax ta lay fo ten, a murtooxooga. A nomtooxiidangaa me no Ii-isra’el lakas we, ndax ta lay a den ke ta hebil’eena,

³⁵weene a nga’ooga yee mukit fee Moyiis kaa meleƈoogu. A refangee yee Moyiis kaa ret maa Roog, ndax ta lay fo ten, kaa muurooxoogu.