Read NQAARIIT NE ROOG A sutax ale 35 Bible Online

A sutax ale 35 - NQAARIIT NE ROOG bible

A sutax ale 35

¹Moyiis a fokata Ii-isra’el we fop, a lay a den ee: «Keeke refu ke o Yaal oxe a heblitna yee ta fi’el:

²Fat nu njalaa pes ɓetuu fa leng ke. Bes fa ɓetuu ƭikandeer fee refna bes fee na ñootnax ale kesaneema koy, o kiin oxuu jaltuuna, fat a warel.

³Muu nu ngenna, nu mbaree o ngeƥand maaga fiɗel muk na bes fee na ñootnax ale.»

⁴Moyiis a refa no yegnaa Ii-isra’el we kebil keeke no Yaal oxe:

⁵«Nqotyo no ke nu njegna, nu ci teen o Yaal oxe. Oxuu waaguuna o fi fo o fud o letu, fat a ɓisiid o Yaal oxe keeke: wurus, xaaliis, xanjar,

⁶xa ƥaak axaa nqaaɗeena, axene a nqiiyiiy, axaana a yaxig coy, xa lakas axe a ndaalde fa gaare fo a ƥiñ fambe,

⁷ƭool a suk paal akaa yaxgineena, ƭool jiinga, a teex saas,

⁸diwliin fa ngeƥandir, qeeñe-xeeñe kaa na refkaa diwliin fee na ɗuumteel, a fi’teel cuuraay fa mbelu tuñ itam,

⁹fo a ƥil a cafeñu kaa na nqoyeel onik fo a ƥil a cafeñu a lakas akaa na mbi’itkeel o jamb ole fo safaƈ ne no saasadax o maak oxe.

¹⁰Fat yaal-o-and we ndefna a ndeer nuun fop a mbokatoor, a mbi fop keeke o Yaal oxe a heblitna:

¹¹Ngenand ne fo ƭiif um fo ke na bombkan fo xa lokir axe fo a patax ake fo a kadand ake fo a toodook ake fo a caf den,

¹²arka ne fo a teex um fo o afnir-o-fortand ole ten fo mbaƴ ne ta bugko fegteel,

¹³a taabul ale fo a teex um fo xa ƥaxañ um fop fo xa kaf puuru xe um bugko ɓoxoteel,

¹⁴a pagal ale na xa lampa xe fo xa ƥaxañ um fo xa lampa xe fa diwliin fee na bugko yipeel teen,

¹⁵o sadaxand ole na cuuraay fee fo a teex um, diwliin fa ƭuumir fee fo qeeñe-xeeñe pelu fo mbaƴ ne na bugko fegaa o don-maax ole no Ngenand ne,

¹⁶o sadaxand ole no sadax toxel ke fo mbiic um nqanjar fo a teex um fo xa ƥaxañ um, o roon o ɓogdinoor ole fo tiƈoor um,

¹⁷coor ke no ɓit le fo a ƥiiɓit den, a caf ake fo mbaƴ ne na bugko fegaa a carind ale no maax ole,

¹⁸xa teng axe no Ngenand ne fo xa teng axe no ɓit le fo xa ƥaak den,

¹⁹toki mosu ke saasadax we a mbugko ndokooxaa kam o Mbiñ o tedu nqe, toki tedu ke Aaroon, o saasadax o maak oxe fo toki ke xa ƥiy axe ten a mbugko ndokooxaa, yaa da mbadnaa o far den.»

²⁰Naaga, Ii-isra’el we fop a ndiƈatooxa a Moyiis.

²¹Fop we njaɓ’ina, too a qeeñ den a let, a ci’iida o Yaal oxe no ke da njegna, ndax ta jaltel Ƭiif ne ta bugko xetteel fo ke ta bugko faɗooreel fo ke toki tedu ke a njalitkeel.

²²Goor oo, rew oo, fop a ngarooga. Oxuu xeeñ um a let’ina teen, ɓisiidoogaa o fekir mbaat o loŋ-loŋ mbaat o heɗ o ɓay mbaat ceq wurus fo kuu andoona yee wurus oo. Oxuu refna na den a yaanda ci’it wurus um, a ɓoxotin o Yaal oxe.

²³We njeg’ina xa ƥaak xa qiiyiiyu mbaat xa taalde’u mbaat xa yaxgu coy mbaat gaare mbaat a ƥiñ pambe mbaat ƭool a suk paal kaa yaxgineena mbaat ƭool jiinga, a ƥisiida a den.

²⁴We mbaag’ina o ci’it xaaliis mbaat xanjar, a ƥisiidaan o Yaal oxe. We njeg’ina a teex saas akaa mbaagna o ndet no calel ke, a ƥisiida a den.

²⁵Rew we ndeeƭna koc a mborol’a xa ƭis fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde, soo a ƥisiid a den.

²⁶Rew lakas waa ndeeƭna koc, too keene a fel’u a den, a mborol’a a ƥiñ pambe.

²⁷Kelfa ke na xeet fee a ƥisiida a ƥil a cafeñu kaa na nqoyeel onik fo a ƥil a cafeñu a lakas akaa na mbi’itkeel o jamb ole fo safaƈ ne no saasadax o maak oxe

²⁸fo qeeñe-xeeñe fa diwliin faa na bugko heƥandteel xa lampa xe soo a ɗuumteel fa cuuraay fa mbelu tuñ fee na bugko doxeel.

²⁹Neene, fop we a qeeñ den a let’ina no Ii-isra’el we, goor fo rew, a ƥisiida ke da ngeñya’’ina o Yaal oxe no calel ke ta hebil’ina a Moyiis.

³⁰Moyiis a laya Ii-isra’el we yee: «Nga’yo, o Yaal oxe a jila a Besalel fee o ƥiy Uri fee refna o ƥiy Xuur too a fog na carind ale Yudaa.

³¹Roog a soɗaan Yiif um, a soɗin o and ta jeg yiif, a waag o fi kuu refna.

³²A waaga pexey, a waag o jal wurus fa xaaliis fa xanjar.

³³A waaga o ɗeg a ƥil a cafeñu soo a doon a den, a waag o sex a teex, a waag o fi mosu kuu ndefna.

³⁴Ten fa Oholyab fee o ƥiy Ahisamak fee fogna na carind ale Dan, o Yaal oxe a ci’a a den da mbaag o njangnit keene.

³⁵A ci’a a den da mbaag o mbi calel no ƭeeɗeg a ƥil a cafeñu, a ci a den da mbaag o mbi samandaal, a mbaag o ndiw kemeñ kaa xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, a ci a den da mbaag o mbi kuu refna, a mbaag pexey.