Read NQAARIIT NE ROOG A sutax ale 36 Bible Online

A sutax ale 36 - NQAARIIT NE ROOG bible

A sutax ale 36

¹Besalel fa Oholyab fo yaal a yiif ake fop, o Yaal oxe a ci’’ina o and fo o jeg-yiif, ndax da mbaag o and ne fop a fi’itkeel no Ƭiif ne o Yaal oxe a xetteel, fat a njalit ne o Yaal oxe a heblituuna.»

²Moyiis a xoya a Besalel fa Oholyab fo yaal a yiif ake o Yaal oxe a ci’’ina o and fo o jeg-yiif, too a qeeñ den a let’u no mbi calel ke.

³Moyiis a doxna a den ke Ii-isra’el we a ƥisiid’ina no calel ke no Ƭiif ne o Yaal oxe a xetteel. Moyiis kaa maad’el o ɓisiidaa ci’it nqes nuu refna.

⁴Maaga, yaal a yiif ake nqot’eena fop no calel ke no Ƭiif ne o Yaal oxe a xetteel a ƭega calel den, a ndet maa Moyiis,

⁵a layin ee: «Wiin we kaa ƥisiid kaa hupna ke wareena o jalit ke o Yaal oxe a heblitna.»

⁶Ndak fo ndak, Moyiis a simta o yegnanel kam saŋe ne keeke: «Ba o koor mbaat o tew o leng a jalat kaa ta ci’tiidna no Ƭiif ne o Yaal oxe a xetteel.» Naaga, o leng ci’tiid’atee,

⁷yaam ke ɓisiid’eena kaa dey’atu no ke bug’eena o jal. Kaa hup’u sax.

⁸We moƴ’ina o njeg a yiif mbi’’u Ngenand ne. Kaa supit’u a naf xarɓaxay akaa mbi’teena gaare, a njaxas xa ƥaak axaa axeeke a nqiiyiiyna, axaana a yaxig coy, xa lakas axe a ndaalde, soo pindel yeeyetax kaa na mosandaa a den, a ngemeñel teen.

⁹A naf ake fop mbodir’u. A naf aluu refna teen, o cigdel um xa noonoong qarɓeen ƭik fo xa noonoong ɓetaa tadaq a reeƭu, soo o yaajel um a ref xa noonoong xa nahaq.

¹⁰A naf a ƥetak akuu ndefna a supit’e, a mbi salal.

¹¹No cat leng no cigdel ole no salal nuu refna, xa qooj xa qiiyiiyu a mod’e teen.

¹²Xa qooj qarɓeen ƥetik a mod’e no cat keene no salal nuu refna, o xooj oluu refna a dend fo o gend um.

¹³Xa lokir a nqaw’e, a nqawrandtel salal ƭik ke. Naaga, Ngenand ne a reeƭata leng.

¹⁴Cinj kaaga, a naf xarɓaxay fo a naf a leng akaa ndefna a ƥiñ pambe a ndiw’e, a mbombtahinel Ngenand ne.

¹⁵A naf aluu refna, o cigdel um xa noonoong qarɓeen tadik a reeƭu, soo o yaajel um a ref xa noonoong xa nahaq. A naf ake fop mbodir’u.

¹⁶A naf a ƥetak ake a supit’e, a mbi’el salal, soo a naf ɓetaa fo leng a lakas ake yoo a suptel, a mbi’el salal.

¹⁷No cat ke no cigdel ole no salal nuu refna xa qooj qarɓeen ƥetik a mod’e teen.

¹⁸Xa lokir xanjar qarɓeen ƥetik a nqaw’e, a nqawrandtel salal ke. Naaga, Ƭiif ne a reeƭata leng.

¹⁹Ƭiif ne a hulit’ahine pay naa fi’teena ƭool a suk paal kaa yaxgineena soo a doonel ƭool jiinga.

²⁰A patax saas a sex’e, ndax da ngeennitel Ngenand ne.

²¹A patax aluu refna, o cigdel um xa noonoong xarɓaxay a reeƭu, soo o yaajel um a ref o noonoong o leng fa genwal.

²²A patax aluu refna a jeg’a sal ƭik kaa ndendna. Naaga a refit’u na patax ake no Ngenand ne fop.

²³A patax qarɓeen ƭik a sex’e, a mbod no ɓemb-roog o ñamaak ole no Ngenand ne.

²⁴A caf qarɓeen nahik xaaliis a njal’e, a mbadel no sal ke na patax ake. A patax aluu refna a wad’e a caf a ƭak.

²⁵A patax qarɓeen ƭik a sex’e itam, a mbod farna fo ɓemb-roog o janoon ole no Ngenand ne.

²⁶A caf qarɓeen nahik xaaliis a njal’e, a patax aluu refna a wadanel a caf a ƭak.

²⁷A patax ɓetaa fo leng a sex’e, a mbod a cinj ale no Ngenand ne, farna fo mudand ne

²⁸fo a patax a ƭak a lakas, aluu refna a lakoox a cinj ale.

²⁹A patax akeene koy, kaa muɓrand’el no ke xotitna a lanq, soo o heɗ a fokat a den took. Neene a reeƭit’u itam na patax a ƭak ake lakoox’ina.

³⁰Neene, a patax ake mbod’ina a cinj ale no Ngenand ne fop a ndeeƭa a patax ɓetaa tadaq fo a caf xarɓaxay fo a caf ɓetaa fo leng xaaliis. A patax aluu refna a wadan’e a caf a ƭak.

³¹A teex saas akaa na ndefkaa a kadand a sex’e: A kadand a ƥetak akaa na ndamkaa a patax ake no saax o leng ole no Ngenand ne

³²fo a kadand a ƥetak akaa na ndamkaa ake no saax o lakas ole fo a kadand a ƥetak akaa na ndamkaa ake a cinj ale, farna fo mudand ne.

³³A kadand ale na wadkeel a ndeer ale na patax ake, a inoorkaa no cat boo no cat, a fi’’e.

³⁴A patax ake fo a kadand ake a laar’e wurus, xa keɗ wurus axaa a kadand a lakas ake a mbadkeel, a nqawel.

³⁵Mbaƴ ne a riwit’e xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, soo pindel yeeyetax kaa na mosandan, a ngemeñel teen.

³⁶A toodook a nahak saas a sex’e, a laarel wurus, a yoonandtel xa lokir wurus, ndax da ngeennitel mbaƴ ne. A toodook akeene a njawan’e a caf a nahak xaaliis.

³⁷O don-maax ole no Ƭiif ne a riwan’e mbaƴ naa xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, soo a gemeñel.

³⁸A toodook a ƥetak ake mbarna o ngeenin mbaƴ ne na fegkaa o don-maax ole a sex’e, a yoonandtel xa lokir, soo a qoox ake den fo a liind den a laarel wurus. A toodook aluu refna a fi’an’e a caf xanjar.