Read NQAARIIT NE ROOG A sutax ale 37 Bible Online

A sutax ale 37 - NQAARIIT NE ROOG bible

A sutax ale 37

¹Besalel a fi’ta arka ne saas. O cigdel um a reeƭa xa noonoong xa ƭaq fa genwal, soo o yaajel um fo geel um a ndef o noonoong fa genwal.

²A laara wurus fa nqoolu kam fee fa tafil fee no arka ne, soo a kiig ale, ta ñiingtin wurus.

³A jawana arka ne xa keɗ xa nahaq wurus, a caf aluu refna, ta fi teen o heɗ: O saax o leng ole xa ƭaq, o saax o lakas ole xa ƭaq.

⁴A sexa a liind a ƭak saas, a laar a den wurus.

⁵A wada a teex akeene na xa keɗ axe na xa saax axe no arka ne, ndax da meeɓteel o ten.

⁶A fi’a o afnir-o-fortand ole no arka ne fa wurus fa nqoolu. O cigdel um a reeƭa xa noonoong xa ƭaq fa genwal, soo o yaajel um a ref o noonoong fa genwal.

⁷A xawa pindel yeeyetax wurus ƭik da mbod no cat ƭik ke no afnir-o-fortand ole.

⁸Mbindel yeeyetax leng ne a foda no cat leng ne, soo mbindel lakas ne a fod no cat lakas ne da muum fo o afnir-o-fortand ole.

⁹Kaa mbaambir’u, nuu refna teen a lupandoox, a nafir ake den a yookaa o afnir-o-fortand ole, da ƭeetaa farna fo ten.

¹⁰Besalel a fi’a a taabul saas alaa, o cigdel um a refna xa noonoong xa ƭaq, o yaajel um a ref o noonoong, soo geel um a ref o noonoong fa genwal.

¹¹A laaraan wurus fa nqoolu, soo a kiig ale, ta ñiingtin wurus.

¹²A widnaan a tayil alaa fi’na o ɓay soo a ñiingtin wurus.

¹³A jawna xa keɗ xa nahaq wurus, a wad a den na caf ake no kooñ nahik ke.

¹⁴Xa keɗ axe kaa mat’u a tayil ale, ndax a teex ake a mbadeel teen, da meeɓteel a taabul ale.

¹⁵A sexa a teex a ƭak saas, a laar a den wurus, da meeɓteel a taabul ale.

¹⁶A xawa xa ƥaxañ wurus fa nqoolu xeeke na mbugkeel o ndiƈaa took a taabul ale: xa afnir, a tokol, xa kuta fo xa toon axaa na sadaxtiteel biiñ.

¹⁷Besalel a xawa a pagal xa lampa wurus fa nqoolu alaa muumna: o fimb ole yoo, a naaq ake yoo, buñit le yoo, a kiɓ ake yoo, piɗ ke yoo.

¹⁸A naaq ɓetaa fo leng sax’u no fimb ole na pagal ale: A naaq a tadak no saax o leng ole, a naaq a tadak no saax o lakas ole.

¹⁹A naaq aluu refna a jeg’a puñit tadik kaa na nandtaa saqit ndaxar amaand fo a kiɓ fo piɗ.

²⁰O fimb ole koy, a jeg’a puñit nahik kaa na nandtaa saqit ndaxar amaand fo a kiɓ fo piɗ.

²¹Ɗuga a naaq a ƭak akuu ndefna na naaq akeene saxna no fimb ole koy, a jeg’a hiɓ.

²²A kiɓ ake fo a naaq ake kaa muum’u fo ke yoqna. Fop wurus fa nqoolu a xawit’e.

²³A fi’a xa lampa ɓetaa ƭaq fo caƥir fo yipir ndaw. Keene fop wurus fa nqoolu a ndeeƭu.

²⁴A pagal ale fo xa ƥaxañ um fop ngap kilo qarɓeen tadik wurus fa nqoolu a jalit’u a den.

²⁵A fi’ta o sadaxand ole na cuuraay fee saas. O yaajel um o saax oo saax a fi’’a o noonoong, soo geel um a ref xa noonoong xa ƭaq, xa can axe a muum fo ten.

²⁶A laara o sadaxand ole wurus fa nqoolu: Took fee yoo, xa saax axe yoo, xa can axe yoo, soo a kiig ale, ta ñiingtin wurus.

²⁷A xawa xa keɗ wurus, a daaƴ a den ɗuga a kiig ale: xa ƭaq no saax olene, xa ƭaq no saax olaana. Xa keɗ xa ƭaq axuu ndefna koy, kaa ndend’u, ndax a teex ake ta bugko meeɓteel a mbadeel teen.

²⁸A sexa a teex saas itam, a laar a den wurus.

²⁹A fi’a diwliin fa tedu fa nqoolu faa na bugko ɗuumteel fa cuuraay fa mbelu tuñ, ne o caajaxas qeeñe-xeeñe a fi’tan.