Read NQAARIIT NE ROOG A sutax ale 38 Bible Online

A sutax ale 38 - NQAARIIT NE ROOG bible

A sutax ale 38

¹Besalel a fi’ta o sadaxand ole saas. O cigdel um o saax oo saax a reeƭa xa noonoong xa ƥetaq, soo geel um a ref xa noonoong xa tadaq.

²A weesa xa can xa nahaq, oluu refna, ta sipin no kooñ, ta muum fo o sadaxand ole, soo a laar a den xanjar.

³A xawta xa ƥaxañ axeeke no sadaxand ole fop xanjar: xa ƥaxañ axe na mbugko yipaa ndaw ke fo xa ƥang axe fo xa toon xa biisir axe fo xa cuutir a tegeƴ axe fo fo njaq ne.

⁴A fi’a mbiic nqanjar naa saxitna nen tagar, ta garit o sadaxand ole a lanq, a diƈoox a ndeer ee ndeer ale.

⁵A jawa xa keɗ xa nahaq axe, a wad a den no kooñ nahik ke no mbiic ne, ndax a teex ake a mbadeel teen.

⁶A sexa a teex a ƭak saas, a laar a den xanjar.

⁷A wada a den na xa keɗ axe na xa saax axe no sadaxand ole, da meeɓteel o ten. A fi’ta o sadaxand ole a patax, ta fi o waaƥ.

⁸A fi’ta o roon o ɓogdinoor ole fo tiƈoor um xanjar. Xanjar feene koy, na xa ƭeendoor axe no rew we mbadnoogna o far den no ndokand ne no Ƭiif ne o Yaal oxe a xetteel, a hat’u.

⁹A ɓitit’a o maax ole no Ngenand ne coor kaa mbi’teena gaare. Njoor ne farna fo ɓemb-roog o ñamaak a reeƭa xa noonoong teemeed,

¹⁰a geennitel a ƥiiɓit qarɓeen ƭik, a ƥiiɓit aluu refna a diƈoox na caf xanjar, a damrandtel a liind xaaliis, a wadel xa lokir xaaliis.

¹¹Njoor ne farna fo ɓemb-roog o janoon ole itam a reeƭa xa noonoong teemeed, a geennitel leng kut ke.

¹²Njoor ne farna fo mudand ne koy, a reeƭa xa noonoong qarɓeen ƥetik, a geennitel a ƥiiɓit xarɓaxay akaa aluu refna a diƈooxna na caf. Xa lokir axe fo a liind ake na ƥiiɓit akeene xaaliis a ndeeƭu.

¹³No saax ole na carind ale farna fo batand ne, o yaajel ole no maax ole a reeƭa xa noonoong qarɓeen ƥetik.

¹⁴A peɗuuk aluu refna na peɗuuk a ƭak ake ndeerna a carind ale, o cigdel ole no njoor um a reeƭa xa noonoong xarɓaxay fo xa noonoong xa ƥetaq, a geennitel a ƥiiɓit a tadak akaa aluu refna a diƈooxna na caf a leng.

¹⁶Coor ke ƥitit’eena o maax ole fop, gaare a ndeeƭu.

¹⁷A caf ake na ƥiiɓit ake mbidna o maax ole fop, xanjar a ndeeƭu, xa lokir axe fo a liind ake den a ndef xaaliis, soo a qoox ake den a laarel xaaliis. A ƥiiɓit ake no maax ole fop, a liind xaaliis a ndamrandit’e.

¹⁸Mbaƴ ne singtoogeena a carind ale no maax ole koy, a gemeñit’e xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare. O cigdel ole no mbaƴ ne a reeƭa xa noonoong qarɓeen ƭik, soo geel um a ref xa noonoong xa ƥetaq, nen geel le no coor ke no ɓit le.

¹⁹A ƥiiɓit a nahak ake ta geennit’eena fo a caf a nahak ake mbad’eena na ƥiiɓit akeene fop, xanjar a ndeeƭu, xa lokir axe fo a liind ake den a ndef xaaliis, soo a qoox ake den a laarel xaaliis.

²⁰Xa teng axe no Ngenand ne fo axe no ɓit le no maax ole fop, xanjar a ndeeƭu.

²¹Keeke ndefu celem ke njalteena Ngenand ne warna o sing a alfa ke no kebil ke. Moyiis a hebil’a Leelewi we da limin, soo Itamaar fee o ƥiy Aaroon fee o saasadax o maak oxe a adooxanin.

²²Besalel fee o ƥiy Uri fee refna o ƥiy Xuur too a fog na carind ale Yudaa, a fi’a fop ke o Yaal oxe a hebil’ina a Moyiis,

²³ten fa Oholyab fee o ƥiy Ahisamak fee fog’ina na carind ale Dan, a ref o qaaxaw fo o seesex, a fi’aa samandaal, a gemeñtaa xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa fale fa gaare.

²⁴Wurus fee Ii-isra’el we a ci’tiid’ina no calel ke no Mbiñ o tedu nqe, too a yaand’el a reeƭa ngap kilo teemeed ɓetuu tadik fo kilo qarɓeen ɓetuu ƭik no eedir ke no Mbiñ o tedu nqe.

²⁵Xaaliis fee we mbog’ina no bind le a ci’tiid’ina, a reeƭa ngap kilo cuni tadik fo kilo xarɓaxay fo kilo ɓetuu ƭik no eedir ke no Mbiñ o tedu nqe.

²⁶Yaaga boog, oxuu refna no wiin cuni teemeed ɓetuu fa leng fo wiin cuni tadik fo wiin teemeed ƥetik fo wiin qarɓeen ƥetik we mbog’ina no bind le too a njeg xa kiid qarɓeen ƭik, a jof took, a ci’tiid’a xaaliis faa fodirna fa genwal o monjong na xaaliis fee na eedteel no Mbiñ o tedu nqe.

²⁷Kilo cuni tadik xaaliis a naayin’e, a mbi’tel a caf ake ngeennit’eena o Mbiñ o tedu nqe fo a caf ake ngeennit’eena mbaƴ ne reeƭna kam fee. A caf ake fop, teemeed a ndeeƭu, too aluu refna teen, o meɗel um a fi’’a kilo qarɓeen tadik.

²⁸Xaaliis fee yoq’ina too a fi’’u ngap kilo xarɓaxay fo kilo ɓetuu ƭik a naayin’e, a fi’tel xa lokir axe fo a liind ake na ƥiiɓit ake, a laartel a qoox ake den.

²⁹Xanjar fee Ii-isra’el we a ci’tiid’ina, too ta yaand’el, a reeƭa ngap kilo cuni ƭik fo kilo teemeed fo kilo qarɓeen ƭik fo kilo nahik.

³⁰Ten naayin’e, a fi’tel a caf ake no ndokand ne no Ƭiif ne o Yaal oxe a bugko xetteel fo o sadaxand xanjar ole yoonna fo tagar nqanjar ne saxitna nen mbiic fo xa ƥaxañ axe no sadaxand ole fop

³¹fo a caf ake no ɓit le fo ake no ndokand ne no maax ole fo xa teng axe no Ngenand tedu ne fo axe no ɓit le no maax ole.