Read NQAARIIT NE ROOG A sutax ale 39 Bible Online

A sutax ale 39 - NQAARIIT NE ROOG bible

A sutax ale 39

¹Toki mosu ke na mbugko ndokooxeel yaa fa paɗax ale kam o Mbiñ o tedu nqe a mbi’it’e xa ƥaak axaa axeeke a nqiiyiiyna, axaana a yaxig coy, xa lakas axe a ndaalde. Toki tedu ke Aaroon oo a mbi’it’e ne o Yaal oxe a heblit’uuna a Moyiis.

²O jamb ole a riwit’e wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare.

³Xa ƭamb wurus axaa nqawneena a letin’e, a seelel, a ngemeñtel xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare.

⁴O jamb ole koy, xa kadoor xa ƭaq a fi’an’e, a ƭiisel no cat ke.

⁵O kumnoor ole no jamb ole yoo, xa ƥaak xa leng kut axe o jamb ole a riwit’eena, a riwit’e. Kaa ñambaas’el teen, ne o Yaal oxe a heblit’uuna a Moyiis.

⁶A ƥil a cafeñu a ƭak akaa na nqoyeel onik a sex’e, luu refna teen a wadel no njel wurus, a kon ake na xa ƥiy axe Isra’el a sexel teen, nen oxaa na sexnaa o anddiloor xoox um.

⁷A mbi’’e took xa kadoor axe no jamb ole, ndax o Yaal oxe a wetandooran xa ƥiy axe Isra’el, ne ta heblit’uuna a Moyiis.

⁸Safaƈ ne a riwit’e wurus fo xa ƥaak axaa axeeke a nqiiyiiyna, axaana a yaxig coy, xa lakas axe a ndaalde fa gaare, a mosandtel kemeñ nen o jamb ole.

⁹Njiba a reeƭu, o saax oo saax o cigdel um a ref o ɓay.

¹⁰A ƥil a cafeñu kaa mbi’na a cur a nahak a mosandit’e. A cur a eetaand ale a jeg’a a ƥil a cafeñu kaa ne’eena sarduwaan fa topaas fa emerod,

¹¹a cur a ƭikandeer ale a jeg a ƥil a cafeñu kaa ne’eena eskarbuukle fa safiir fa jamaa,

¹²a cur a tadkandeer ale a jeg a ƥil a cafeñu kaa ne’eena opaal fa agat fa ametis,

¹³soo a cur a nahkandeer ale a jeg a ƥil a cafeñu kaa ne’eena kirisolit fa onik fa yaspe. Ɓil jafeñu luu refna na ƥil a cafeñu keene koy, no njel a wad’e.

¹⁴No ɓil jafeñu luu refna koy, gon no leng na xa ƥiy xarɓaxay fo xa ƥiy xa ƭaq axe Isra’el a sex’e teen, nen oxaa na sexnaa o anddiloor xoox um. A ƥil a cafeñu keene kaa ndeeƭu betandoor na carind xarɓaxay fo a carind a ƭak ake Isra’el.

¹⁵Safaƈ ne a xawnan’e ceen ƭik wurus fa nqoolu kaa modeena. A fi’an’e itam cel ƭik wurus

¹⁶fo xa keɗ xa ƭaq wurus axaa oluu refna teen a fodna no leng na xa noflax axe took.

¹⁷Cat ƭik leng ke no ceen wurus ƭik ke a yuuɓ’e na xa keɗ xa ƭaq axe na xa noflax axeene,

¹⁸cat ƭik lakas ke no ceen wurus ƭik ke a yuuɓel no cel ƭik ke. Cel ƭik keene kaa yuuɓ’el na xa kadoor axe no jamb ole, a mbod mbaambir.

¹⁹Xa keɗ xa ƭaq wurus xa lakas a nqaw’e, a ngarit kam fee no safaƈ ne, a mbod na xa noflax xa ƭaq axe a lanq.

²⁰Xa keɗ xa ƭaq wurus xa lakas a nqaw’ahine, oluu refna teen a ɗugoox o gadoor no jamb ole, a fod mbaambir, paam o ƭiis ole, a yooroox o kumnoor ole no jamb ole.

²¹Xa keɗ axe no safaƈ ne fo axe no jamb ole a ngumnit’e o ƥaak olaa xiiyiiyna, ndax safaƈ ne a yoqaa yoora o kumnoor ole too bugkee o geleerooxaa no jamb ole, ne o Yaal oxe a heblit’uuna a Moyiis.

²²O forok ole o jamb ole a bugko doonooxaa a fi’it’e xa ƥaak axaa nqiiyiiyna.

²³O cok ole a ndeer ee ndeer ale a reeƭu soo a ŋorel nen o cok ndoki njelem, ndax yooɓkee o xuuyoox.

²⁴A laalanq ale no forok ole koy, a mosandit’e pic kaa na nandtaa xa tim mbos. Xa ƥaak axe da mbi’it’eena, kaa ndinq’u bo, axeeke kaa nqiiyiiy’u, axaana a yaxig coy, xa lakas axe a ndaalde.

²⁵Xa buyang wurus fa nqoolu a nqaw’e, a lokel na laalanq ale no forok ole a ndeer xa pos axe.

²⁶Ndeer o fos fo o gend um oluu refna a jeg’a o wuyang boo neen a laalanq ale no forok ole na bugko rokooxeel yaa fa paɗax ale a xetu, ne o Yaal oxe a heblit’uuna a Moyiis.

²⁷Aaroon fo xa ƥeem, oxuu refna na den gaare a riwanit’e sabadoor

²⁸fo a tañalax fo o ndip o mosu nqaa taxna ta niwel fo o njata nqaa fi’teena gaare

²⁹fo o kumnoor olaa fi’teena gaare, a gemeñel xa ƥaak axaa axeeke a nqiiyiiyna, axaana a yaxig coy, xa lakas axe a ndaalde, ne o Yaal oxe a heblit’uuna a Moyiis.

³⁰A ƈang wurus fa nqoolu laa tedna, a saxit nen mbiɗ a xaw’e, took um a sexel ee: «O Yaal oxe a kesane», nen oxaa na sexnaa o anddiloor xoox um.

³¹Kaa hum’el took tañalax ne fo o ƥaak olaa xiiyiiyna, ne o Yaal oxe a heblit’uuna a Moyiis.

³²Naaga, calel ke njofna no Ngenand ne refna ref Ƭiif ne o Yaal oxe a bugko xetteel fop a ƈuta. Ii-isra’el we a mbi’’a deŋ ke o Yaal oxe a hebil’ina a Moyiis.

³³Ii-isra’el we a ƥisiida a Moyiis ke war’eena o jalit Ngenand ne: - ƭiif ne fo ke warna o yoon fo ten: xa lokir axe, a patax ake, a kadand ake, a toodook ake fo a caf ake,

³⁴- pay naa fi’teena ƭool a suk paal kaa yaxgineena fo ƭool jiinga fo mbaƴ ne na bugko fegteel,

³⁵- arka ne na alfa ke no kebil ke fo a teex um fo o afnir-o-fortand ole ten,

³⁶- a taabul ale fo xa ƥaxañ um fop fo xa kaf puuru xe ƥoxoteena a Roog,

³⁷- a pagal ale na xa lampa xe refna wurus fa nqoolu fo xa lampa um, xa ƥaxañ um fa diwliin fee na bugko yipeel teen,

³⁸- o sadaxand wurus ole fa diwliin fee na bugko ɗuumteel fa cuuraay fa mbelu tuñ fee, - mbaƴ ne no ndokand ne no Ƭiif ne,

³⁹- o sadaxand xanjar ole fo mbiic nqanjar um fo a teex um fo xa ƥaxañ um, - o roon o ɓogdinoor ole fo tiƈoor um,

⁴⁰- coor ke no ɓit le, a ƥiiɓit den fo a caf den fo mbaƴ ne na carind ale no maax ole fo xa ƥaak axe fo xa teng axe, - xa ƥaxañ axe fop mbareena o njaltaa yaa fa paɗax ale no Ngenand ne refna ref Ƭiif ne o Yaal oxe a bugko xetteel,

⁴¹- toki mosu ke na mbugko ndokooxeel yaa fa paɗax ale kam o Mbiñ o tedu nqe, - toki tedu ke Aaroon, o saasadax o maak oxe fo toki ke xa ƥeem a mbugko ndokooxaa, yaa da mbadnaa o far den.

⁴²Ii-isra’el we a mbi’’a calel keene deŋ ne o Yaal oxe a heblit’uuna a Moyiis.

⁴³Moyiis a horooxa calel ke too a ga’a yee fop a fi’it’e ne o Yaal oxe a heblit’uuna. Maaga, a barke’a Ii-isra’el we.