Read NQAARIIT NE ROOG A sutax ale 4 Bible Online

A sutax ale 4 - NQAARIIT NE ROOG bible

A sutax ale 4

¹Moyiis a doona yee: «Ngimkiraam too nan-gilooxkee o ñuxur es. Kaa da laykaa yee: ‹O Yaal oxe feeñooxirang tus.› »

²O Yaal oxe a laamtaan ee: «Xar saqo no ɓay of?» A doonaan ee: «O loq.»

³O Yaal oxe a layin ee: «Deɓeen a lanq.» A deɓaan, too o loq ole a suptooxa fangool. Moyiis kaa ƴufoogun.

⁴Maaga, o Yaal oxe a laya a Moyiis ee: «Letni o ɓay of too damin na las.» A letna o ɓay um, a damin na las, too fangool fee a suptooxa o loq no ɓay um.

⁵O Yaal oxe a layaan ee: «Keene xan a lal a den, da ngim ee mi o Yaal oxe refna Roog fee no daan we den, ref Roog fee Abraham fa Roog fee Isaak fa Roog fee Yakoob, feeñooxong.»

⁶O Yaal oxe a layahinaan ee: «Ɓeki o ɓay of no naaplaand of.» Naaga, a ɓekaan no naaplaand um. A sutaan, too o ɓay ole a ran-ga taw nen fa liit yaam a tik a maak.

⁷O Yaal oxe a laya yee: «Dakni o ɓay of no naaplaand of.» A dakna o ɓay ole ten no naaplaand um. A sutaan, too o ɓay ole a dakooxa naa ta reeƭna.

⁸O Yaal oxe a laya yee: «A ngimangirang too njaɓee o anddiloor o eetaand ole, xan a ngim o anddiloor o ɗikandeer ole.

⁹Boo da ngimeerna na xa anddiloor xa ƭaq axeene koy too nan-gilooxee o ñuxur of, fat o xaf na foofi le no xuluɓ ole Niil, ɓaxin a lanq. Foofi leene o xafitkaa no xuluɓ ole koy, xan a suptoox fo’oy took lanq ke.»

¹⁰Moyiis a laya o Yaal oxe yee: «E, o Yaal oxe, refiim o kiin o qoolu fa lay de. Reeƭinum faak, reeƭinum feede-faak, too refee yaa o layaa fa mi fee o paɗ of yaaga boo ndiik, yaam fa lay kaa xoxaam.»

¹¹O Yaal oxe a doonaan ee: «An fi’u o don no kiin? An na muumnaa, ndi an na ramnaa, an na ga’naa, ndi an na fuulnaa o kiin? Ndax refee mi o Yaal oxe?

¹²Reti boog. Xam ref o ndimle no don of, too xam jangnong ke waroona o lay.»

¹³Moyiis a laya yee: «O Yaal oxe, luli oxuu bugoona, ndaa baa ref mi!»

¹⁴Maaga, o Yaal oxe a fuuxana a Moyiis too a layaan ee: «Ndax jegiro a Aaroon fee o maag of, o Leelewi xe? Andaam ee a naaga o layaa a qoolu. Ten oo xeene a garaa me wo sax too a ga’angaang, xan a felakinoox no xeeñ um.

¹⁵Layi fo ten, daawnin xa ƭelem axeene. Mi o mat, xam ref o ndimle no don of fo o don um. Xam jangin a nuun ke nu mbarna o mbi.

¹⁶Xan a jeetaayanong fa xeet faa, too xan a ref o don of, soo o ref nen a Roog um.

¹⁷Saqi no ɓay of o loq oleeke, yaam ten o bugko fi’taa xa anddiloor axe.»

¹⁸Moyiis a nomtooxa maa Yetro fee o seemir um, a layin ee: «Ci’aam um dab fog faap es waa ndefna Misira boo um and, ndax a maada o ñoowaa.» Yetro a laya a Moyiis ee: «Reti na jam.»

¹⁹Maaga, no saax laa Majan, o Yaal oxe a laya a Moyiis ee: «Nomtooxi Misira, yaam we mbug’ina o njang o ñis of fop a nqona.»

²⁰Moyiis a janga o teem fo xa ƥeem, a ŋaayin a den took o faam, a nomtooxaa no saax laa Misira. A saq’a no ɓay um o loq ole Roog.

²¹O Yaal oxe a laya a Moyiis ee: «Boo fadoona Misira, ba o weec o fi mbaambir Firawon fee xa anddiloor axe doxnoonga fop. Mi o mat, xam ŋajnoorin, too xaƴkee xeet fee da ndet.

²²Fat o layanaam a Firawon fee yee: ‹Mi o Yaal oxe na layaa fa wo. Xeet fee Isra’el refu taaw fa ngoor es.

²³Ten taxu mexe layang ee xaƴi o ƥees onqene ta faɗookaam. O fañangaan o xaƴ koy, xam saŋik taaw fa ngoor fee wo.› »

²⁴Ye da ndefna na ñaaƈ boo tige a yeng, a mbe’a o mbiñ. Maaga, o Yaal oxe a songaan, a bugin o war.

²⁵Sipora a janga o ƥil o mbeelu, a ɗeg o sool no ƥeem, a deɓin na caf Moyiis, a lay ee: «Kaa o ref na mi o kor fo’oy.»

²⁶O Yaal oxe a xaƴaan. Maaga, Sipora a laya yee: «O kor fo’oy refo yaam nquc ne.»

²⁷O Yaal oxe a laya a Aaroon ee: «Reti xetik fa Moyiis na koƥ-a-ƥor alaa.» Aaroon a daba a Moyiis no joong olaa Roog soo a foonin.

²⁸Cinj kaaga, Moyiis a yegna a Aaroon fop ke o Yaal oxe lul’uuna, a lay’uuna fo xa anddiloor axe ta hebil’uuna, ndax ta fi a den.

²⁹Maaga, Moyiis fa Aaroon a nqota a ƭat, too yaa da mbadna, a mbokat’a maak we no Ii-isra’el we fop.

³⁰Aaroon a wetandooxa ke o Yaal oxe a lay’ina a Moyiis fop, too Moyiis a fi’a xa anddiloor axe na kid ake na xeet fee.

³¹Maaga, a ngima. Ye Ii-isra’el we a andna yee o Yaal oxe a ɗeetiida a den, a ga coono den, a ngooknooxa soo a ngung a lanq.