Read NQAARIIT NE ROOG A sutax ale 40 Bible Online

A sutax ale 40 - NQAARIIT NE ROOG bible

A sutax ale 40

¹O Yaal oxe a laya a Moyiis ee:

²«Na bes fa eetaand fee no nqool o eetaand onqe, fat o geenin Ngenand ne refna ref Ƭiif ne um bugko xetteel.

³Fat o diƈ teen arka ne saqna a alfa ke no kebil ke. Cinj kaaga, fat o fegtin mbaƴ ne.

⁴Fat o ɓisiid a taabul ale, doon teen xa kaf axe ɓoxoteema. Cinj kaaga, fat o ɓisiid a pagal ale, wad xa lampa xe teen, heƥand a den.

⁵Fat o diƈ o sadaxand wurus ole na cuuraay fee mbaambir arka ne saqna a alfa ke no kebil ke, lok mbaƴ ne no ndokand ne no Ngenand ne.

⁶Fat o diƈ o sadaxand ole no sadax toxel ke mbaambir ndokand ne no Ngenand ne refna ref Ƭiif ne um bugko xetteel.

⁷Fat o diƈ o roon o ɓogdinoor ole a ndeer Ƭiif ne um bugko xetteel fo o sadaxand ole, soo yip teen foofi.

⁸Fat o geenin ɓit le no maax ole, ta wid Ngenand ne, soo a carind ale, o fegtin mbaƴ ne.

⁹Fat o xot na diwliin fee na bugko ɗuumteel, ɗuumtin Ngenand ne fo fop ke refna teen, tedlandin, ten oo xa ƥaxañ um oo. Neene, xan a ted.

¹⁰Fat o ɗuum itam o sadaxand ole no sadax toxel ke fo xa ƥaxañ um fop, tedland a den, too yaaga xan a ted tigi.

¹¹O roon o ɓogdinoor ole fo tiƈoor um oo, fat o ɗuum a den, tedland a den.

¹²Fat o ɓis a Aaroon fo xa ƥeem boo no ndokand ne no Ƭiif ne um bugko xetteel, ɓogdit a den maaga.

¹³Cinj kaaga, fat o rokan a Aaroon toki tedu ke ten, ɗuumin, dodin o saasadax ta jalanaxam.

¹⁴Fat o matandiid xa ƥiy axe Aaroon, rokan a den sabadoor ke.

¹⁵Fat o ɗuum a den, dod a den saasadax nen a faap den, da njalanaxam. Na ƭuum aleene, den oo xa taan den oo, xa tanaraat den oo, xan a ndodateel saasadax boo kili.»

¹⁶Moyiis a fi’a deŋ ke o Yaal oxe a hebil’uuna.

¹⁷Na bes fa eetaand fee no nqool o eetaand onqaa, a cinj o hiid, ye Ii-isra’el we a sutooxna Misira, Ngenand ne a geenne.

¹⁸Moyiis a geenna Ngenand ne. Pitik, a diƈa a caf ake, a ɓek teen a patax ake, a wad a kadand ake soo a geenin a toodook ake.

¹⁹Cinj kaaga, a letna pay ke, a bombit a den ngenand ne, soo ke war’eena o hul teen, ta doonin took um, ne o Yaal oxe a heblit’uuna o ten.

²⁰Moyiis a janga a alfa ƥil ake kebil xarɓaxay ke a mbind’eena, a diƈ a den kam arka ne, a wad a teex ake teen soo a afnitin o afnir-o-fortand ole.

²¹Cinj kaaga, a ɓekaan kam Ngenand ne, a lok mbaƴ ne na bugko fegaa arka ne, ne o Yaal oxe a heblit’uuna o ten.

²²Moyiis a diƈa a taabul ale kam Ƭiif ne o Yaal oxe a bugko xetteel, farna fo ɓemb-roog o janoon, mbaambir mbaƴ ne fegna o mbiñ onqe moƴna o ted,

²³soo a doon teen xa kaf puuru xe ƥoxoteena o Yaal oxe, ne ta heblit’uuna o ten.

²⁴Moyiis a diƈa a pagal ale na xa lampa xe kam Ƭiif ne o Yaal oxe a bugko xetteel, farna fo ɓemb-roog o ñamaak, ta jasnoor fo a taabul ale,

²⁵soo a wad xa lampa xe teen, a heƥand a den mbaambir no Yaal oxe, ne ta heblit’uuna o ten.

²⁶Moyiis a diƈa o sadaxand wurus ole kam Ƭiif ne o Yaal oxe a bugko xetteel, mbaambir mbaƴ ne fegna o mbiñ onqe moƴna o ted,

²⁷soo a dox teen cuuraay fa mbelu tuñ fee, ne o Yaal oxe a heblit’uuna o ten.

²⁸Moyiis a loka mbaƴ ne no ndokand ne no Ngenand ne.

²⁹Cinj kaaga, a diƈa o sadaxand ole no sadax toxel ke mbaambir ndokand ne no Ngenand ne refna ref Ƭiif ne o Yaal oxe a bugko xetteel, a ɓoxot teen sadax fa ndoxel fo sadax tuufe-duufe, ne o Yaal oxe a heblit’uuna o ten.

³⁰Moyiis a diƈa o roon o ɓogdinoor ole a ndeer Ƭiif ne o Yaal oxe a bugko xetteel fo o sadaxand ole soo a yip teen foofi fo ɓogdinoor.

³¹Foofi leene Moyiis fa Aaroon fo xa ƥeem a njaptoogu xa ƥay den fo a caf den.

³²Neene a nqoolandoortoogu a mbanuu da mbar’ina o ndok no Ƭiif ne o Yaal oxe a xetteel mbaat da mbug o matiid o sadaxand ole, ne o Yaal oxe a heblit’uuna a Moyiis.

³³Moyiis a geenna ɓit le no maax ole, ta wid Ngenand ne fo o sadaxand ole, soo mbaƴ ne, ta lokin, a fegtin a carind ale. Neene mat Moyiis a paangtu calel ke.

³⁴Maaga, eel laa a muura Ƭiif ne o Yaal oxe a xetteel, too o ndam onqe no Yaal oxe a mayƭanda Ngenand tedu ne boo Moyiis waagee o rok taaga.

³⁶A mbanuu eel le a yoɗoox’ina no Ngenand ne, a jof took, Ii-isra’el we a suurooga na ñaaƈ den.

³⁷Ndetoogee, a refangee eel le kaa yoɗoox. Kaa moofoogu boo na bes faa ta yoɗooxkaa.

³⁸A ñaal’angaa, o Yaal oxe a feeñlooga a tef um fo Ii-isra’el we no eel le muuroogna Ngenand ne, soo a yengangaa, ta fi aal laa na kaƥaa. Kaaga koy, mos’ee o timis na ñaaƈ ale den.